მარიამ ფოლადაშვილი

Helicobacter Pylori კუჭ-ნაწლავის დაავადებების გამომწვევი ერთ-ერთი ფაქტორია. იგი გადაეცემა ჰაერ-წვეთოვანი გზით, ნერწყვთან, ასევე დაბინძურებული საკვებისა და წყლის მეშვეობით.

ჰელიკობაქტერია იწვევს კუჭისა და თორმეტგოჯა ნაწლავის სხვადასხვა ტიპის დააზიანებას, როგორიცაა: ანთება, ეროზიების და წყლულების განვითარება, გასტრიტი. დიდია მისი როლი კუჭის კიბოს განვითარებაში და პირველი რიგის კანცეროგენად არის მიჩნეული.

მიუხედავად იმისა, რომ ადამიანთა ნაწილს ინფიცირების ნიშნები არ გააჩნია, რიგ შემთხვევებში ვლინდება: მუცლის არალოკალური ტკივილი, სიმძიმის შეგრძნება, გულძმარვა, შებერილობა.

დიაგნოსტირების სტანდარტს წარმოადგენს სწრაფი სუნთქვითი ტესტი, რომელიც განსაზღვრავს პაციენტის მიერ ამოსუნთქულ ჰაერში ჰელიკო ბაქტერიის არსებობას და მის კონცენტრაციას. აღნიშნული კვლევა ტარდება ექიმის რეკომენდაციით კუჭ-ნაწლავის ტრაქტის დაავადებების დიაგნოსტირების, მკურნალობისა და პროგნოზირებისთვის. ამ ტიპის კვლევა განსაკუთრებით ხშირად ინიშნება იმ პაციენტების შემთხვევაში, რომელთაც შემდეგი რისკ-ფაქტორები გააჩნიათ: ოჯახის წევრის ინფიცირება ჰელიკობაქტერიით, კუჭ-ნაწლავის სხვადასხვა ტიპის წყლულოვანი დაავადების გენეტიკური ისტორია, ხანგრძლივი დროით ანთების საწინააღმდეგო არასტეროიდული პრეპარატების გამოყენება.

ეს პროცედურა საჭიროებს სწორ მომზადებას. საჭიროა შემდეგი რეკომენდაციების შესრულება:

დილით, გამოკვლევამდე, აუცილებელია კბილების გახეხვა და პირის ღრუს გამორეცხვა.

გამოკვლევა აუცილებლად უნდა ჩატარდეს დილით უზმოზე (ბოლო კვება დასაშვებია ტესტამდე 12 საათით ადრე და საკვები მსუბუქი უნდა იყოს ნუ მიიღებთ ხორცს, თევზს და სოკოს), 3 დღით ადრე არ მიიღოთ ალკოჰოლური სასმელი, პარკოსნები.

გამოკვლევის დღეს არ დაღეჭოთ საღეჭი რეზინა.

კვლევამდე არანაკლებ 3 საათის განმავლობაში არ შეიძლება სიგარეტის მოწევა. სიგარეტის მოწევის შემდეგ აუცილებელია კბილების გახეხვა.

კვლევამდე არ უნდა გქონდეთ მიღებული შემდეგი მედიკამენტები:

• 4 - 6 კვირით ადრე - ანტიბიოტიკები;
• 14 დღით ადრე - ანტაციდები ან ანთების საწინააღმდეგო არასტეროიდული საშუალებები, ანტისეკრეტორული პრეპარატები და ანალგეტიკები.