რა არის კუჭის პეპტიკური წყლული და რა უწყობს ხელს მის განვითარებას
წყლულის მთავარი გამომწვევი ჰელიკობაქტერიაა, რომელიც ლორწოვანი გარსის დაცვით ფუნქციას არღვევს. წყლული ასევე შეიძლება გამოიწვიოს სხვადასხვა მედიკამენტის ხანგრძლივმა მოხმარებამ. წყლულის განვითარების ხელშემწყობ ფაქტორებად მიჩნეულია თამბაქოსა და ალკოჰოლის მოხმარება,საფუარით მდიდარი საკვების ხშირი მიღება. კუჭის წვენის მაღალი მჟავიანობა, ხოლო, სტრესი, კვებითი ფაქტორები (ცხარე საკვები) წყლულს არ იწვევს, თუმცა ხელს უწყობს მის გაღრმავებას.
წყლულოვანი დაავადების სიმპტომები წყლულის ლოკალიზაციაზეა დამოკიდებული.
კლინიკური სიმპტომებიდან ყველაზე ხშირად ვითარდება:
- გულძმარვა;
- ცხიმიანი საკვების აუტანლობა;
- წვა და ტკივილი ეპიგასტრიუმის არეში;
- კუჭის გადავსების შეგრძნება;
- გულისრევის შეგრძნება
თორმეტგოჯა ნაწლავის ბოლქვის წყლულს ახასიათებს ღამის ტკივილი.
წყლულოვან დაავადებისას შეიძლება გამოვლინდეს გართულებებიც. გართულებაზე მიუთითებს სისხლიანი ღებინება, წონის კლება, მადის დაკარგვა.
სისხლდენას თან ახლავს საერთო სისუსტე, თავბრუხვევა, ოფლიანობა, გონების დაკარგვა.
- შეიძლება განვითარდეს კუჭის ან თორმეტგოჯა ნაწლავის კედლის მთლიანობის დარღვევა;
- კუჭის წყლული შეიძლება ავთვისებიან სიმსივნედ – კიბოდ გადაგვარდეს;
- შესაძლოა განვითარდეს კუჭის გასავლის დახშობა. ეს გართულება ახასიათებს თორმეტგოჯა ნაწლავის ბოლქვის წყლულებს, რომლებიც სანათურს ავიწროებს ან ახშობს. ვლინდება ღებინებით, შებერილობით, უმადობით, კუჭის სისავსის შეგრძნებით
წყლულის პრევენციის რაიმე კონკრეტული მეთოდი არ არსებობს, თუმცა წესების დაცვით შესაძლებელია მის განვითარებას ხელი შევუშალოთ.
სასურველია, კვების რეჟიმის დაცვა: რეგულარულად კვება, ზომიერი ულუფებით კვება, საფუარით მდიდარი საკვების მიღებისგან თავის შეკავება და ალკოჰოლურ სასმელებზე უარის თქმა.