მარიკა დვალი

.როგორ მივხვდეთ, რომ ჩვენი ოთხფეხა მეგობარი ავად არის და, საზოგადოდ, რას წარმოადგენს შაქრიანი დიაბეტი?

• წარმოადგენს შაქრიანი დიაბეტი

შაქრიანი დიაბეტი ავადმყოფობაა, რომელიც მაშინ ვითარდება, როცა ცხოველის ორგანიზმი ეფექტურად ვეღარ იყენებს შაქარს (გლუკოზას) და ვეღარ არეგულირებს სისხლში მის ნორმალურ შემცველობას. ეს მაშინ ხდება, როცა ორგანიზმში გლუკოზისა და, საზოგადოდ, ნივთიერებათა ცვლის მარეგულირებელი ჰორმონი ინსულინი სათანადო ოდენობით აღარ გამომუშავდება ან ეფექტურად ვეღარ მოქმედებს. შედეგად ორგანიზმი გლუკოზას ეფექტურად ვეღარ იყენებს ან ვეღარ აგროვებს ქსოვილებში მის მარაგს, სისხლში კი ამ ნივთიერების შემცველობა იმატებს.

შაქრიანი დიაბეტი ქრონიკული პათოლოგიაა და მისგან განკურნება თითქმის წარმოუდგენელია, მაგრამ შეიძლება, დაავადებულ ცხოველს მდგომარეობა საგრძნობლად შევუმსუბუქოთ დიეტით, წვრთნითა და აუცილებელ შემთხვევაში - პრეპარატებით.

ადამიანების მსგავსად, ცხოველებშიც შაქრიანი დიაბეტის ორ ტიპს განასხვავებენ. ინსულინდამოკიდებული დიაბეტის დროს სისხლში გლუკოზის ნორმალური დონის შესანარჩუნებლად უმეტესად ინსულინის რეგულარული ინექციები ხდება საჭირო, ინსულინდამოუკიდებელი შაქრიანი დიაბეტისას კი ამის აუცილებლობა არ არის, მდგომარეობის სტაბილიზაციისთვის საკმარისია წონის კონტროლი.

• როგორ გავიგოთ, აქვს თუ არა ცხოველს შაქრიანი დიაბეტი

სამწუხაროდ, ცხოველთა დიაბეტზე ეჭვის მიტანა სიმპტომების მიხედვით ძნელია, ვინაიდან ისინი სხვა დაავადებათა ნიშნებს ჰგავს. და მაინც, გირჩევთ, ყურადღება მიაქციოთ ქვემოთ ჩამოთვლილ გამოვლინებებს:

1. გაძლიერებულ წყურვილს;
2. გახშირებულ შარდვას, შარდის ოდენობის მომატებას;
3. წონის დაქვეითებას;
4. მადის ცვლილებას: ჯერ - მატებას, შემდეგ - დაქვეითებას;
5. ძილიანობასა და სისუსტეს;
6. ღებინებას;
7. ძაღლებში - კატარაქტის განვითარებას.

როგორც აღვნიშნეთ, ამ სიმპტომების მიღმა სხვა პათოლოგიაც შეიძლება იმალებოდეს, მაგრამ მათი ერთობლიობა დიაბეტის ეჭვს ბადებს. გახსოვდეთ, თუ ვეტექიმმა ცხოველს შაქრიანი დიაბეტის დიაგნოზი დაუსვა, მას ექიმის რეგულარული დაკვირვება დასჭირდება, რათა პერიოდულად გაიზომოს სისხლში გლუკოზის შემცველობა და დაინიშნოს მკურნალობა.

• რა იწვევს დიაბეტს?

ორგანიზმში ინსულინის გამომუშავების დარღვევა პანკრეასის დაზიანებას უკავშირდება. ზოგიერთ ცხოველს დაავადება ორგანიზმში მიმდინარე ჰორმონული ცვლილებების გამო ან იმ მედიკამენტების მიღების შედეგად უვითარდება, რომლებიც ინსულინის ეფექტს ამცირებს. ცნობილია ფაქტორები, რომლებიც ზრდის დიაბეტის აღმოცენების რისკს. ესენია:

1. ჭარბი წონა;
2. ასაკი – შაქრიანი დიაბეტი ნებისმიერ ასაკში შეიძლება აღმოცენდეს, მაგრამ მისი ალბათობა ყველაზე მაღალია დაახლოებით 8 წლისთვის;
3. ჰორმონული ცვლილებები – ხანმოკლე (მაგალითად, მძუვნობასთან დაკავშირებული) ჰორმონული ცვლილებები და ზოგიერთი მედიკამენტი შეიძლება დიაბეტის მიზეზად იქცეს;
4. ჯიში – ზოგიერთი ჯიშის ცხოველი დიაბეტისადმი უფრო მეტად არის მიდრეკილი.

• აუცილებელია ყოველდღიური მკურნალობა

ცხოველის ყველა მფლობელი უნდა შეეგუოს აზრს, რომ დიაბეტიანი ცხოველის ხანგრძლივი სიცოცხლის აუცილებელი პირობა ყოველდღიური მკურნალობაა. სწორ კვებას, წვრთნას, აუცილებლობისას - მედიკამენტების გამოყენებას რეგულარული ხასიათი უნდა ჰქონდეს. ეს ყველაფერი სისხლში გლუკოზის სტაბილური დონის შენარჩუნებაში დაგვეხმარება, ამ სამკურნალო რეკომენდაციათაგან ერთ-ერთის შეუსრულებლობა კი შესაძლოა სისხლში გლუკოზის დონის მატების მიზეზად იქცეს. ეს რომ არ მოხდეს, გირჩევთ, შეასრულოთ ქვემოთ მოყვანილი რეკომენდაციები:

1. თუ ეჭვობთ, რომ თქვენს ცხოველს შაქრიანი დიაბეტი აქვს, კონსულტაციისთვის დაუყოვნებლივ მიმართეთ ვეტერინარს.
2. დიაბეტიან ცხოველს ყოველდღიური დაკვირვება სჭირდება. ვეტერინარი აგიხსნით, რომელ სიმპტომებს უნდა მიაქციოთ განსაკუთრებული ყურადღება.
3. ცხოველი მხოლოდ იმ საკვებით და ისეთი რეჟიმით კვებეთ, როგორიც ვეტერინარმა შეგირჩიათ.
4. დანიშნული პრეპარატები ცხოველს რეგულარულად, სათანადო დროს მიაწოდეთ.
5. ნუ მიაწვდით ცხოველს ნუგბარს თქვენი სუფრიდან და სხვებსაც სთხოვეთ, ასე მოიქცნენ.
6. ოთხფეხა მეგობარს სუფთა წყალი არ მოაკლოთ.
7. აკონტროლეთ მისი წონა, ქცევა, საერთო მდგომარეობა.