7 ნიშანი იმისა, რომ რკინის დონე უნდა შეამოწმოთ
რკინის დეფიციტმა შეიძლება გამოიწვიოს ჯანმრთელობის მთელი რიგი პრობლემები და პირდაპირ იმოქმედოს ტვინის ჯანმრთელობაზე. ეს არის ბოლოდროინდელი კვლევის შედეგები, რომლის თანახმადაც, რკინის დაბალმა დონემ შეიძლება გააძლიეროს შფოთვის, დეპრესიისა და შიზოფრენიის სიმპტომები. მეტა-ანალიზმა გააანალიზა გამოკითხვისა და კვლევების შედეგები და დაადგინა, რომ დეპრესიის, შფოთვითი აშლილობის, ძილის და ფსიქოზური აშლილობის მქონე ადამიანების რიგმა ასევე აღნიშნა რკინადეფიციტური ანემიის ისტორია.
რკინის დეფიციტი არა მხოლოდ ფსიქიკურ ჯანმრთელობაზე ახდენს გავლენას, არამედ მას შეუძლია გავლენა მოახდინოს გულზე და გამოიწვიოს ორსულობის პრობლემებიც კი.
ამის გათვალისწინებით, მნიშვნელოვანია რკინის დეფიციტის ნიშნების ცოდნა და ის, თუ რა უნდა გააკეთოთ, როდესაც ეჭვი გაქვთ რკინის დეფიციტზე.
ნიშნები და სიმპტომები:
დაღლილობა და სისუსტე - დაღლილობა რკინის დეფიციტის ერთ-ერთი ყველაზე გავრცელებული სიმპტომია. რკინადეფიციტური ანემიის დროს, ორგანიზმი ვერ აწარმოებს საკმარის ჰემოგლობინს, რომელიც ჟანგბადის გადატანაში მონაწილეობს. იქიდან გამომდინარე, რომ ქსოვილებში ჟანგბადის ცოტა რაოდენობა ხვდება, ვითარდება დაღლილობა. დაღლილობის ხარისხი დამოკიდებულია იმაზე თუ რამდენად მძიმეა რკინის დეფიციტი.
ჩვეულებრივზე ფერმკრთალი კანი - ამის მიზეზი მარტივია. ჰემოგლობინი ანიჭებს სისხლის წითელ უჯრედებს წითელ ფერს, ამიტომ ჰემოგლობინის დაბალი დონე კანს ნაკლებად წითელ იერს სძენს. თუმცა, გასათვალისწინებელია, რომ სხვა ბევრმა ფაქტორმა შეიძლება გავლენა მოახდინოს კანის ფერზე.
ქოშინი - ჟანგბადის დაბალი დონე, რკინის დეფიციტის გამო, ქოშინის გამომწვევი ერთ-ერთი მიზეზია. ეს იწვევს სუნთქვის სიჩქარის მომატებას, რადგან სხეული ცდილობს მეტი ჟანგბადის მიღებას, ამასთან სუნთქვა უფრო ზედაპირულია.
თავის ტკივილი და თავბრუსხვევა- რკინადეფიციტურმა ანემიამ შეიძლება გამოიწვიოს ტვინში იმაზე ნაკლები ჟანგბადის მოხვედრა (სხვა ორგანოების მსგავსად), ვიდრე მას სჭირდება მაქსიმალური მუშაობისთვის. ეს კი იწვევს თავის ტკივილს. კვლევამ აჩვენა, რომ ანემიის მქონე ადამიანების 80 პროცენტს აქვს თავის ტკივილი, ხოლო 36 პროცენტს აქვს შაკიკი.
ცივი ხელები და ფეხები - რკინის დეფიციტისას სისხლში ჟანგბადის დეფიციტია, რაც ხელებსა და ფეხებში სიცივის შეგრძნებას იწვევს. მიუხედავად იმისა, რომ ზოგიერთი ადამიანი უბრალოდ მიდრეკილია ცივი ხელებისა და ფეხებისკენ, თუ ეს სიმპტომი თქვენთვის ახალია და განიცდით მას ანემიის სხვა სიმპტომებთან ერთად, უმჯობესია, შეამოწმოთ რკინის დონე.
კოვზისებრი ფრჩხილები - კოვზისებრი ფრჩხილები (კოილონიქია) არის რბილი ფრჩხილები, რომლებსაც აქვთ აწეული კიდეები და ჩაღრმავება ცენტრში. კოვზისებრი ფრჩხილები შეიძლება იყოს რამდენიმე მდგომარეობის ნიშანი, მათ შორის გულის დაავადებისა და ჰიპოთირეოზის, ამიტომ, საჭიროა ექიმის კონსულტაცია ზუსტი მიზეზის დასადგენად.
გაღიზიანებადობა
რა უნდა გააკეთოთ, თუ რკინის დაბალი დონე გაქვთ
თუ ფიქრობთ, რომ რკინის დეფიციტი გაქვთ, მნიშვნელოვანია, მიმართოთ ექიმს. თუ თქვენ გაქვთ რომელიმე ჩამოთვლილი სიმპტომიდან, ყოველთვის კარგი იდეაა გადამოწმება. ექიმს შეუძლია დანიშნოს ძირითადი ლაბორატორიული ტესტები სისხლის წითელი უჯრედების და ჰემოგლობინის დონის შესამოწმებლად.
თუ რკინის დაბალი დონე გაქვთ, ამის გამოსასწორებლად რამდენიმე ნაბიჯის გადადგმა შეგიძლიათ. მსუბუქი დეფიციტისას, ზოგჯერ საკვების წყაროებისადმი მეტი ყურადღების მიქცევა მდგომარეობას აუმჯობესებს. ეს შეიძლება ნიშნავდეს მეტი ხორცის მიღებას, ხოლო თუ ვეგეტარიანელი ხართ, ფოკუსირება მოახდინეთ ისეთი პროდუქტების მიღებაზე, როგორიცაა ისპანახი და ლობიო.
თუ მძიმე დეფიციტია, ექიმმა შეიძლება გირჩიოთ დანამატის მიღება. დანამატის მიღება უნდა მოხდეს ექიმის რეკომენდაციით.