ლალი ჩხიკვაძე

საუნა, როგორც თერაპიის საშუალება, დიდი ხანია არსებობს, თუმცა ყველასათვის დასაშვები არ არის.

აბანოს შესაძლო სარგებელი ჯანმრთელობისთვის

აბანოში ადამიანის გულისცემა ხშირდება და სისხლძარღვები ფართოვდება. ეს, დაბალი ან ზომიერი აქტივობის, ფიზიკური ვარჯიშის ანალოგიურად, ზრდის სისხლის მიმოქცევას. აბანო ამცირებს კუნთების ტკივილს, ზრდის სახსრების მოძრაობის ამპლიტუდას, ამსუბუქებს ტკივილს ართრიტის დროს და ხელს უწყობს მოდუნებასა და განწყობის გაუმჯობესებას. ამას გარდა, აბანო აქვეითებს სტრესის დონეს, რის შედეგადაც მცირდება გულ-სისხლძარღვთა სისტემის დაავადებების განვითარების რისკი. კვლევებით დადგინდა, რომ ადამიანებს, რომლებიც ხშირად სარგებლობდნენ საუნით, ნაკლებად ჰქონდათ გულ-სისხლძარღვთა სისტემის დაავადებებით განპირობებული სიკვდილის რისკი.

საუნა - ჯანმრთელობისთვის რისკის შემცველი

პირველ რიგში, მნიშვნელოვანია არტერიული წნევის მატების რისკი. არაა რეკომენდებული თბილი საუნისა და აუზის ცივი წყლის მონაცვლეობა, რადგანაც ამან შეიძლება გამოიწვიოს არტერიული წნევის მომატება. საუნამ შეიძლება გამოიწვიოს არტერიული წნევის დაქვეითებაც. ამიტომ დაბალი არტერიული წნევის მქონე ადამიანებმა საუნით სარგებლობის წინ, უმჯობესია, კონსულტაცია გაიარონ ექიმთან.

გაუწყლოების რისკი

გაუწყლოების მიზეზი შეიძლება გახდეს ოფლის გამოყოფის შედეგად სითხის დაკარგვა. მაგალითად, თირკმელების დაავადებების მქონე ადამიანებს გაუწ­ყლოების რისკი მეტად აღენიშნებათ.

მითები საუნასა და აბანოზე

მითი 1: ოფლის გამოყოფით გამოიდევნება ტოქსინები. საუნაში მართლაც ხდება ოფლის გამოყოფა, მაგრამ სამეცნიერო კვლევებით არ დასტურდება, რომ ტოქსიკური ნივთიერებები ორგანიზმიდან გამოდის. ისეთი ტოქსინები, როგორებიცაა ალკოჰოლი, ვერცხლისწყალი, ალუმინი, ძირითადად გამოიყოფა თირკმელებით, ღვიძლითა და ნაწლავებით.

მითი 2: საუნა გახდომაში გვეხმარება. საუნის შემდეგ შეიძლება დავიკლოთ 500 გრამი, მაგრამ მასის შემცირება ხდება სითხის და არა ცხიმის დაკარგვით.

უნდა გვეშინოდეს თუ არა აბანოსი

• საუნით ზომიერი სარგებლობა ადამიანთა უმრავლესობისთვის უსაფრთხოა. ამას გარდა, უნდა დავიცვათ სიფრთხილის გარკვეული წესები, რათა თავიდან ავიცილოთ გაუწყლოება, ჰიპოტონია, არითმია და უეცარი ლეტალური გამოსავალი.
• საუნის წინ არ მივიღოთ ალკოჰოლი და ისეთი წამლები, რომლებმაც შეიძლება გააუარესოს ოფლის გამოყოფა და გამოიწვიოს გადახურება.
• უნდა შევზღუდოთ საუნაში გატარებული დრო - ერთჯერადად, არა უმეტეს 20 წუთისა. ახალბედებმა ეს დრო უნდა შეამცირონ 5-10 წუთამდე და თანდათანობით გაზარდონ.
• აბანოში ყოველი ვიზიტის შემდეგ უნდა მივიღოთ საკმარისი რაოდენობით - 2-4 ჭიქა წყალი, რათა ავანაზღაუროთ ოფლის გამოყოფით განპირობებული წყლის დანაკარგი.