როგორ შევხვდეთ აღდგომის ბრწყინვალე დღესასწაულს
გადმოცემის თანახმად, იესო ქრისტეს ზეცად ამაღლების შემდეგ მარიამი სახარების საქადაგებლად რომში გაემგზავრა და იმპერატორ ტიბერიუსის სასახლეს მიაშურა. იმხანად ყველას, ვინც იმპერატორს ეახლებოდა, მისთვის ძღვენი უნდა მიერთმია. შეძლებულ მოქალაქეებს ძვირფასეულობა მიჰქონდათ, ხოლო ღარიბებს - ის, რის საშუალებაც ჰქონდათ. მარიამ მაგდალინელმა, რომელსაც ქრისტეს რწმენის გარდა არაფერი ებადა, ტიბერიუსს ქათმის კვერცხი გაუწოდა და ახარა: "ქრისტე აღსდგა!" იმპერატორმა ქალს ეჭვით შეხედა და წამოიძახა: "მკვდრეთით აღდგომა როგორ შეიძლება?! ამის დაჯერება ისევე ძნელია, როგორც იმისა, რომ ეს კვერცხი შეიძლება გაწითლდესო". ტიბერიუსს სიტყვა დამთავრებული არ ჰქონდა, რომ კვერცხმა ფერი იცვალა...
შეღებილი კვერცხების შესახებ პირველი წერილობითი წყაროა საბერძნეთში, თესალონიკში, წმინდა ანასტასიას მონასტრის ბიბლიოთეკაში დაცული X საუკუნის ხელნაწერი. მასში მოყვანილი საეკლესიო წესდების ბოლოს ნათქვამია, რომ სააღდგომო ლოცვის შემდეგ აუცილებელია კვერცხისა და ყველის კურთხევის ლოცვის წაკითხვა. ტრადიციისამებრ, მლოცველებს ეკლესიაში მიაქვთ პასქა და შეღებილი კვერცხები, რომელთაც მღვდელი წირვის შემდეგ აკურთხებს. სადღესასწაულო ტრაპეზიც ამ დღეს პასქითა და კვერცხით იწყება და მხოლოდ ამის შემდეგ მიირთმევენ სხვა სახსნილო კერძებს.
კვერცხების შეღებვის წესები
არსებობს კვერცხების შეღებვის მრავალი წესი. ყველაზე მარტივია, შეიძინოთ სპეციალური საღებავი და შეფუთვაზე მითითებული წესისამებრ გამოიყენოთ. ჩვენ მხოლოდ იმის დამატება შეგვიძლია, რომ შეღებილ კვერცხს ბზინვარების მისაცემად მცენარეულ ზეთში დასველებული ნაჭერი უნდა გადაუსვათ.
ალბათ ყველამ იცის კვერცხის შეღებვა ხახვის ფურცლით: აგროვებენ რაც შეიძლება მეტ ფურცელს (ბევრი მის შეგროვებას აღდგომამდე ერთი თვით ადრე იწყებს) და მასში ხარშავენ კვერცხს. კვერცხმა 20-40 წუთს, სასურველი ფერის მიღებამდე უნდა იდუღოს. ასაბზინებლად მასაც მცენარეული ზეთი გადაუსვით.
არსებობს მეორე წესიც: ხახვის ფურცლები ადუღეთ ნახევარ საათს, შემდეგ ნახარში გადაწურეთ, შიგ ჩააწყვეთ უკვე მოხარშული კვერცხები და ადუღეთ ნელ ცეცხლზე, ვიდრე არ მიიღებთ სასურველ ფერს. ამგვარად შეღებვისას მიიღება უფრო თანაბარი შეფერილობა. კვერცხი შეიძლება ხახვის მშრალი ფურცლებითაც შეიღებოს. კვერცხი მოხარშეთ, ცხელ-ცხელს სათითაოდ შემოახვიეთ ხახვის მშრალი ფურცლები, გაახვიეთ ნაჭერში და ადუღეთ კიდევ 10 წუთს. წყალს დაუმატეთ ძმარი. კვერცხს მოოქროსფერო-მარმარილოსებრი ელფერი მიეცემა.
თუ მოხატული კვერცხი გსურთ, ოხრახუშის ფოთოლი მიაკარით, დოლბანდში გაახვიეთ და საღებავში ისე ჩაუშვით. შეგიძლიათ, სველი კვერცხი ამოავლოთ მშრალ ბრინჯში, მაგრად გაახვიოთ დოლბანდში და ისე შეღებოთ. ბავშვებს ძალიან უყვართ კვერცხების მოხატვა ჩვეულებრივი აკვარელის საღებავითა და ფუნჯით. ამ შემთხვევაში უნდა შეიღებოს მოხარშული კვერცხი, ვიდრე ჯერ კიდევ თბილია, რათა საღებავი მალე გაშრეს.
რამდენიმე პრაქტიკული რჩევა:
შეღებვამდე კვერცხი გარეცხეთ სოდით ან ძმრით - უფრო თანაბრად შეიღებება. ხარშვისას კვერცხი
რომ არ გასკდეს, შეღებვამდე 1 საათს სითბოში ან ოთახის ტემპერატურაზე გააჩერეთ, ხოლო წყალში ჩაამატეთ 1 სუფრის კოვზი მარილი. კვერცხი რომც გასკდეს, შიგთავსი არ გადმოიღვრება.