ნანა კალანდაძე

ჰიგიენა უამრავი დაავადებისგან იცავს ადამიანს და გამოჯანმრთელებაშიც ეხმარება. ადამიანები სხვადასხვაგვარად ეკიდებიან სისუფთავეს, რამდენი ადამიანიცაა, სისუფთავისა და წესრიგისადმი დამოკიდებულების იმდენივე ტიპი არსებობს. ისეთ ადამიანებსაც შეხვდებით, რომლებსაც შეიძლება სისუფთავის მანიით შეპყრობილები ვუწოდოთ.

• ზოგჯერ ადამიანს სისუფთავისადმი ლტოლვა აკვიატებულ ქცევაში გადასდის. ეს ქცევა ერთგვარი რიტუალებისგან შედგება. არიან ადამიანები, რომლებიც გამუდმებით განიცდიან დაბანის დაუოკებელ მოთხოვნილებას. მათ აქვთ აკვიატებული აზრი, თითქოს წამდაუწუმ ისვრებიან და უამრავ დროს ხარჯავენ წარმოსახვითი ჭუჭყის მოსაშორებლად.

არის შემთხვევები, როცა ადამიანი თავს ანებებს სწავლას, სამსახურს, რადგან აქვს აკვიატებული განცდა, რომ მის გარშემო არ არის საკმარისი სისუფთავე, და განდეგილად იქცევა. ამ მდგომარეობას აკვიატებულ მდგომარეობათა ნევროზს უწოდებენ. ამგვარი ნევროზით დაავადებული ადამიანი ერთიანად აკვიატებული აზრებით არის მოცული და მიუხედავად იმისა, რომ ესმის მათი აბსურდულობა, თავს ვერ აღწევს მათ.

• აკვიატებულ მდგომარეობათა ნევროზი ფსიქიკის ქრონიკული დარღვევაა. ამ კატეგორიის ადამიანებს ხშირად უჩნდებათ შიში, რომ გარემოში არსებული მიკრობების, ჭუჭყის, შხამიანი ნივთიერებების გამო შეიძლება ავად გახდნენ, - ეს უკვე აკვიატებული შიში ანუ ფობიაა, - ამიტომ გამუდმებით სისუფთავეზე ზრუნავენ.

მათი ქცევა, როგორც უკვე ვთქვით, ერთგვარი რიტუალებისგან შედგება. მათ ხშირი გამეორება ავსებს მთელ დღეს და შეუძლებელს ხდის ყოველდღიურ ცხოვრებას. აკვიატებული ფიქრები მეტისმეტად მტანჯველია. ადამიანს უჭირს მუშაობა და სოციალურ გარემოსთან შეგუება. ის ცდილობს, რიტუალების შესრულებით მოერიოს შიშსა და შფოთვას.

• აკვიატებული ფიქრები სავსებით ჯანმრთელ ადამიანსაც შეიძლება ჰქონდეს. ისინი ხშირად გადაღლის, უძილობის, გადატანილი სტრესის შემდეგ იჩენს თავს.

ავადმყოფი თავის განცდებს განიხილავს როგორც სისუსტეს, უნებისყოფობას, უცნაურობას. ის ბრაზობს საკუთარ თავზე უსუსურობის, უძლურების გამო, რცხვენია, ხდება გულჩათხრობილი, მარტოსული. ასეთი ადამიანები არ ქორწინდებიან ან ხშირად განქორწინდებიან.

ნევროზების მკურნალობა კომპლექსურია - მოიცავს ფსიქოთერაპიას, ფარმაკოთერაპიას, საერთო მომამაგრებელ თერაპიას. თითოეული მეთოდის წილი შეიძლება სხვადასხვა იყოს, მაგრამ შედეგის მისაღწევად ყველა ერთად უნდა იქნეს გამოყენებული.

აკვიატებებისა და ფობიების დროს ხშირად ეფექტურია სუგესტიური ფსიქოთერაპია, აუტოტრენინგი.

სუგესტიური ფსიქოთერაპია შთაგონებით მკურნალობას ნიშნავს. შთაგონება შეიძლება განხორციელდეს როგორც ჰიპნოზური ძილის, აგრეთვე სიფხიზლის დროს. გარდა ამისა, ექიმმა ავადმყოფს უნდა ასწავლოს თვითშთაგონების ანუ აუტოტრენინგის სხვადასხვა მეთოდი. აუცილებელია ოჯახური თერაპიაც, რომელიც მიმართულია ოჯახში არსებული ურთიერთობების კორექციისკენ.

კომპლექსურ მკურნალობაში დიდი ადგილი უკავია მედიკამენტებს - ანტიდეპრესანტებს, ტრანკვილიზატორებს, ფსიქოსტიმულატორებს.

ეფექტურია ჰიდროპროცედურებიც - აბაზანა, შხაპი, ცივი წყლით დაზელა, აგრეთვე - ელექტროფორეზი. ნევროზის მკურნალობა რთული და ხანგრძლივი პროცესია და ექიმისგან დიდ პროფესიონალიზმს და მოთმინების უნარს მოითხოვს.