ისევ ტირი, პატარავ!
დაღლილობა და ზედმეტი აგზნება
ჩვილ ბავშვს მოზრდილ ადამიანზე გაცილებით მეტი ძილი სჭირდება. მას ძუძუთი კვება და მცირე ხანს ხელში რწევაც კი ღლის. დისკომფორტს პატარა კრუსუნით, ზოგჯერ კი ხმამაღალი ტირილით გვამცნობს. ჩვილს არც აურზაური, ხმაური და ხალხმრავლობა სიამოვნებს. სწორედ ამიტომ გვირჩევენ ექიმები, პატარა წყნარ სიტუაციაში, ხმადაბალი მშვიდი სიმღერით დავაძინოთ.
თუ ბავშვი ძლიერ აგზნებულია, სიმშვიდე საკმარისი არ არის. გამოსავალი აქაც არსებობს: დაგვეხმარება წყნარ ქუჩაში საბავშვო ეტლით გასეირნება. ეტლის რიტმული მოძრაობა და წყნარი ფონი ჩვილს მალე დააძინებს.
მოწყენილობა და მარტოობა
ტირილი და ყვირილი შესაძლოა არა მარტო აქტიური ცხოვრებით გადაღლის, არამედ გართობისა და ადამიანებთან კონტაქტის მცდელობის გამოხატულებაც იყოს. როცა ჩვილი თავის საწოლში მარტო იღვიძებს, უჩნდება სურვილი, ვინმემ ხელში აიყვანოს, მიუალერსოს. ნაზად ჩაიკარით პატარა გულში, წაიღიღინეთ, მოუყევით, რა მოხდა, ვიდრე ეძინა... როცა ჩვილი დაწყნარდება, შეგეძლებათ, კვლავ საწოლში ჩასვათ და თქვენს საქმიანობას დაუბრუნდეთ. ზოგჯერ ბავშვისთვის საკმარისია დედის ხმის გაგონება, მისი შეხების შეგრძნება, თუმცა არ არის გამორიცხული, მალე პატარამ მის გვერდით ჯდომა და თამაში მოგთხოვოთ.
შიმშილი
შიმშილი ის გრძნობაა, რომელიც პატარას აიძულებს, მთელი ხმით შეგახსენოთ, რომ მისი ჭამის დრო მოვიდა. თუ ბავშვი საკვების მიღების შემდეგაც წუხს, ის ვერტიკალურ მდგომარეობაში უნდა ატაროთ ან დაიჭიროთ რამდენიმე წუთის განმავლობაში - შესაძლოა, მას ჭამის დროს ჩაყლაპული ჰაერი აწუხებდეს.
ნაწლავებში აირების დაგროვება
ნაწლავებში აირების დაგროვება ჩვილ ბავშვთა ტირილის ერთ-ერთი უმნიშვნელოვანესი მიზეზია. ამ დროს დაგეხმარებათ "თვითმფრინავობანა" – პატარა მუცლით დაიწვინეთ წინამხარზე და მსუბუქად გააქან-გამოაქანეთ. ტკივილის შემსუბუქებაში დაგეხმარებათ მუცლის არის ზედაპირული მასაჟი, აღნიშნულ არეზე უმნიშვნელო ზეწოლით ან ფეხების მოძრაობით "ველოსიპედის" იმიტირება. თუ ხედავთ, რომ ნაწლავებში აირების დაგროვება პატარას მნიშვნელოვან პრობლემებს უქმნის, ჯობს, კონსულტაციისათვის ექიმს მიმართოთ. დღეს მედიკოსების არსენალში ამ პრობლემის საწინააღმდეგო მრავალი ეფექტური საშუალებაა.
პირველი კბილი
პირველი კბილის ამოჭრას მშობლების დიდ სიხარულთან ერთად მნიშვნელოვანი პრობლემებიც ახლავს. ეს ბავშვის ცხოვრების საკმაოდ რთული პერიოდია. ერთი შეხედვით უმიზეზოPტირილი ჭამის დროს და მაგარი საგნების ღეჭვის მცდელობა შესაძლოა სწორედ პირველი კბილის ამოჭრის მაუწყებელი იყოს.
დისკომფორტის შესამცირებლად არსებობს სპეციალური რეზინები და მედიკამენტები, რომელთაც პატარებს ღრძილებზე უსვამენ.
სხვა მიზეზები
ზოგჯერ ბავშვი ტირის არა შიმშილის ან ტკივილის გამო, არამედ იმიტომ, რომ დაიღალა. ასეთ დროს გვირჩევენ, ის ხელში ავიყვანოთ, ოთახში გავატაროთ, ჩუმად ვუმღეროთ, თუ ამინდი ხელს გვიწყობს, გარეთ გავასეირნოთ. მთავარია, მშობლებმა სიმშვიდე შეინარჩუნონ, ვინაიდან მათი მღელვარება ბავშვსაც გადაეცემა. ზოგჯერ ჯობს, ბავშვს რამდენიმე წამით თავისი ემოციის გამოვლენის საშუალება მივცეთ. არ არის საჭირო მისი ყოველი გაფაჩუნებისას საწოლთან მივარდნა - ინტუიცია გიკარნახებთ, როდის არის ტირილი უმიზეზო და როდის მოასწავებს რაიმე დაავადებას.