კბილების ამოჭრა და მასთან დაკავშირებული პრობლემები
ზოგჯერ კბილები პრობლემების გარეშე ამოდის, ზოგჯერ კი ცვლილებაზე ბავშვის ქცევა მიგვანიშნებს.
მადის დაქვეითება, გაძლიერებული ნერწყვდენა, ჭირვეულობა, ცხელება ზოგჯერ თან ახლავს კბილების ამოჭრის პროცესს.
უმეტეს ჩვილებში პირველი კბილების ამოჭრა 6-7 თვის ასაკში ხდება, თუმცა პირველი კბილი შესაძლებელია უფრო ადრე ან უფრო გვიან(12 თვის ასაკშიც კი) ამოვიდეს.
2-3 წლის ასაკისათვის ბავშვს 20-ამდე სარძევე კბილი უნდა ქონდეს. ხოლო 6-12 წლის ასაკში ისინი ეტაპობრივად მუდმივი კბილებით უნდა ჩანაცვლდნენ. სწორად და დროულად ამოჭრილი სარძევე კბილები ბავშვის სახის ფორმირებას და ჯანსაღი მუდმივი კბილების სწორ ამოჭრას უზრუნვენყოფს.
კბილების ამოჭრასთან შესაძლოა თან ახლდეს შემდეგი პრობლემები:
ნერწყვდენა - შესაძლებელია ნერწყვდენა გაძლიერდეს 10 კვირის ასაკიდან და ამოჭრამდე გაგრძელდეს.
გამონაყარი - ნიკაპზე, კისერზე და მკერდის ზედა ნაწილში შესაძლებელია წერტილოვანი, მოწითალო ფერის გამონაყარი გაჩნდეს. ის დაკავშირებულია ნერწყვით ბავშვის ნაზი კანის მუდმივ გაღიზიანებასთან.
ხველა ან წამოქაფება - ეს გაძლიერებული ნერწყვდენის მიზეზია, თუმცა სავარაუდო რესპირაციული და საჭმლის მომნელებელი სისტემის სხვა პათოლოგიების გამოსარიცხად უმჯობეისა ექიმის კონსულტაცია.
საკვებზე უარის თქმა;
ტირილი - ამ დროს ღრძილების ნაზი ქსოვილი შეშუპებული, სისხლსავსე და მგრძნობიარეა. ტკივილიც თანმხლები პრობლემაა. პირველი კბილის ამოჭრა ყველაზე მტკივნეული შეიძლება იყოს.
აღგზნებადობა - მოუსვენრობა და ჭირვეულობა შეიძლება ღამის საათებშიც გაგრძელდეს;
ღამის ჭირვეულობა - ეს ტკივილისა და დისკომფორტის შედეგია. ღამის კარგი ძილის მქონე ბავშვები კბილების ამოჭრისას იცვლიან დღის რეჟიმს და ხშირად ღამის საათებში უფრო ჭირვეულობენ
ყურის და ლოყის ხშირი ფხანა - კბილების ამოჭრისას ბავშვებს ამ არეებში დისკომფორტისა და ტკივილის შეგრძნება აწუხებთ.(თუ ეს სიმპტომები მუდმივია და თან ცხელებაც ახლავს, პედიატრს უნდა მიმართოთ).
ცხელება - ცხელება არ არის პირდაპირ დაკავშირებული კბილების ამოჭრასთან. ითვლება, რომ უშუალოდ კბილის ამოჭრას დაახლოებით 8 დღე ჭირდება. ცხელება ამოჭრის წინა და მომდევნო დღესაა მოსალოდნელი(მხოლოდ 38.5 გრადუსამდე)
რჩევები კბილები ამოჭრისას:
მოერიდეთ წვენების და შაქრის შემცველი სითხეების ღამის საათებში მიცემას, ვინაიდან კარიესის დიდ რისკს ქმნის.
არ გამოიყენოთ ბავშვის კბილების გასახეხად მოზრდილთა კბილის პასტა.
ნებისმიერ ასაკში ბავშვს თავისი ინდივიდუალური ჯაგრისი უნდა ქონდეს, რომელიც ჰიგიენური ნორმების დაცვით იქნება შენახული და თვეში ერთხელ მაინც გამოიცვლება ახლით.
ნერწყვის მოსაწმენდათ არ გამოიყენოთ ქაღალდი.
აუცილებელია, რეგულარული, წელიწადში ერთხელ, ვიზიტი პედიატრთან ან სტომატოლოგთან პირის ღრუსა და კბილების მდგომარეობის შესაფასებლად.