ღამით შარდვის პრობლემები - რა არის ენურეზი და როგორია დაავადების ბუნება?
და ზრდასრული ადამიანებიც იტანჯებიან.
ენურეზი - ეს არის შარდის შეუკავებლობა, შარდის ბუშტის უნებლიე დაცლა. ერთმანეთისგან უნდა განასხვაოთ დღის და ღამის ენურეზი, მეორე მათგანი უფრო ხშირია და აქვს ორი ფორმა : პირველადი და მეორეული. პირველადი ენურეზის დროს, მოშარდვის რეფლექსი არ არის გამომუშავებული, ხოლო მეორეულისას უკვე გამომუშავებული რეფლექსი ქრება.
დაავადების გამომწვევი მიზეზი შეიძლება იყოს ფიზიოლოგიური, გენეტიკური და ხშირად ფსიქოლოგიური. 5 წლამდე ბავშვებში ღამის ენურეზი პათოლოგიად არ ითვლება, 5 წლიდან კი მისი მკურნალობა აუცილებელია. 5 წლის ასაკზე უფროს ბავშვებს, რომლებსაც ჩვილობიდანვე არ ჰქონიათ მშრალი პერიოდი, საშარდე გზების დაზიანებაც არ უდასტურდებათ და ძილში შარდის ბუშტის დაცლა კვირაში ორჯერ მაინც აღენიშნებათ, უსვამენ პირველადი ღამის ენურეზის დიაგნოზს. მისი მიზეზი მენტალური და ქცევითი არ არის,არც ძილის წინ სითხის დიდი ოდენობით მიღების შედეგია.
არ დაგავიწყდეთ, ენურეზს სპონტანური გამოჯანმრთელებაც ახასიათებს. მნიშვნელოვანია, ბავშვებში და მოზრდილებშიც იმართოს სტრესული ფაქტორი, ვინაიდან დიაგნოზს დაბალი თვითშეფასება და სოციალური იზოლაცია მოჰყვება. უნდა მიმართოთ ექიმს, ის დეტალურ ინფორმაციას შეკრებს პაციენტზე. ენურეზის დაწყების დრო, სიხშირე, ხასითი,მემკვიდრული დატვირთვა, უროდინამიკური დარღვევები, ფსიქოლოგიური ფაქტორი, ეს ყველაფერი ექიმმა უნდა გამოიკვლიოს.
თუ პაციენტს აღენიშნება მეორეული ენურეზი აშკარაა, რომ მისი მიზეზი ფსიქოლოგიურია და ის ფსიქოთერაპიით ინკურნება. ამგვარად, აუცილებელია თავდაპირველად, განისაზღვროს ენურეზის ტიპი და შემდეგ შეირჩეს მკურნალობის ტაქტიკა.
• მკურნალობის რა გზები არსებობს ?
როგორც, უკვე აღვნიშნეთ 5 წლამდე ბავშვებში არ ითვლება ენურეზი პათოლოგიად. მოზრდილებში მკურნალობის პირველი ეტაპი გულისხმობს მარტივ ქცევით ჩართულობას, მოზარდის ქცევაზე ზემოქმედებას. ასევე აქტუალურია სპეციალური სასიგნალო, განგაშის სისტემის ე.წ "მშრალი ღამის" გამოყენება. ეს არის სენსორული, სასიგნალო მოწყობილობა, რომელიც აქტიურდება სისველეზე და მოზარდს აიძულებს გაიღვიძოს ან შეწყვიტოს მოშარდვა.
მაღვიძარა მას უყალიბებს შესაბამის რეფლექსებს.ფარმაკოლოგიური საშუალებებით თერაპია ინიშნება 7 წელზე მეტი ხნის ბავშვებში, როდესაც აღნიშნული ღონისძიებები არაეფექტურია. ამავდროულად, ჩართული უნდა იყოს მკურნალობაში ფსიქოლოგი.
და ბოლოს, ენურეზის დაძლევას საკმაოდ დიდი ენერგია და დრო სჭირდება, მას ახასიათებს რეციდივიც, სწორედ ამ მიზეზით, მორალური მხარდაჭერა, მოთმინება და მოტივაცია არის უპირველესი დაავადების წინააღმდეგ ბრძოლაში.