თინათინ ქორიძე

სამი წლისაა და თევზი ჯერ არ მიგვიცია. შეიძლება გავასინჯოთ? ის ხომ ბავშვის ორგანიზმისთვის აუცილებელია…

ათიდან შვიდ შემთხვევაში ალერგიისადმი მიდრეკილება მემკვიდრეობით გადაეცემა, მაგრამ ეს არ ნიშნავს, რომ მემკვიდრეობითი განწყობის მქონე ადამიანს აუცილებლად განუვითარდება ალერგიული დაავადება. არცთუ იშვიათად ასეთი განწყობა მთელი სიცოცხლის განმავლობაში არ რეალიზდება.

შესაძლოა, დედას ან მამას რომელიმე პროდუქტზე ალერგია ჰქონდეთ, მაგრამ ბავშვი მშვიდად მიირთმევდეს იმავეს, ანდა ალერგიული რეაქცია სულ სხვა პროდუქტზე განუვითარდეს. ასეა თუ ისე, როდესაც მშობელი ალერგიულია, საჭიროა, ბავშვმა გაიაროს ალერგოლოგის კონსულტაცია და მხოლოდ ამის შემდეგ გავასინჯოთ თევზი.

რა უნდა გაითვალისწინონ მშობლებმა

მეტ-ნაკლებად აგრესიული ალერგენების მატარებელია ზღვის თევზის ზოგიერთი სახეობა: ქაშაყი, ვირთევზა, წითელი ქორჭილა. სუსტი ალერგიული თვისებები აქვს თინუსს. იშვიათად იწვევს ალერგიულ რეაქციებს მტკნარი წყლის თევზი: კალმახი, ქორჭილა. თერმული დამუშავება ამცირებს ნებისმიერი პროდუქტის ალერგენობას - ხარშვისას ალერგიის გამამძაფრებელი ექსტრაქტული ნივთიერებები ნახარშში გადადის.

ალერგიული განწყობის მქონე ბავშვისთვის საუკეთესო კერძი იქნება მოხარშული თევზის სუფლე.

კალმახის სუფლე

დაგჭირდებათ:

• 300 გ კალმახის რბილობი (1-1,5კგ მთლიანი თევზი);
• 40 გ ნაღების კარაქი;
• 2 სადილის კოვზი პურის ფქვილი;
• 1 ცალი კვერცხი, 80 მლ რძე.

დაახლოებით 1-1,5 კგ კალმახისგან მოხარშვისა და ფხების გამოცლის შემდეგ მიიღება 300 გ რბილობი. გაატარეთ იგი ხორცსაკეპ მანქანაში. რძისა და ფქვილისგან მოამზადეთ სოუსი, დაამატეთ თევზის ფარში, უმი კვერცხის გული და 10 გ ნაღების კარაქი, კარგად ათქვიფეთ. შემდეგ ნელ-ნელა შეურიეთ ცალკე ათქვეფილი კვერცხის ცილა, მწიკვი მარილი, გადაიღეთ კარაქწასმულ ფორმებში და მომზადებამდე (15-20 წუთი) ხარშეთ ორთქლზე.

სუფრასთან მიტანამდე თითოეულ ულუფას - ცხელ-ცხელს - დაადეთ კარაქის პატარა ნაჭერი. პატარას თავდაპირველად ერთი ჩაის კოვზი გაასინჯეთ. დანარჩენი შეგიძლიათ შეინახოთ მაცივარში მეორე დღისთვის.

თევზი - ჯანსაღი საკვები

გიფიქრიათ, რატომ არის, რომ ზოგიერთ ოჯახში უფროსებიც და ბავშვებიც ტანადები არიან, ზოგიერთი ოჯახის წევრები კი მოშვებული, უფორმო სხეულით ჩამოღვენთილ სანთელს ჰგვანან? გენეტიკა? შესაძლოა, მაგრამ ცხოვრების წესიც ხომ გარეგნული იერსახის განმსაზღვრელია. ჩვენი ჯანმრთელობა 25%-ით რაციონზეა დამოკიდებული. თუ გენეტიკას ვერ შევცვლით, სწორი კვების უზრუნველყოფა ხომ ჩვენს ხელთაა.

კვებითი ჩვევები, ისევე როგორც ნებისმიერი კარგი თუ ცუდი ჩვევა, ბავშვობიდან იღებს სათავეს. უფროსები ხშირად ვერც კი ვამჩნევთ, როგორ ვუყალიბებთ შვილებს მცდარ დამოკიდებულებას ამა თუ იმ საკითხის მიმართ. მაგალითად, თუ დედას ბაყაყისა ეშინია, ბავშვსაც იგივე განწყობა ჩამოუყალიბდება მის მიმართ. პატარები უფროსების ერთგვარი რადარები არიან. გაიხსენეთ, რამდენჯერ გაგიგონიათ: "თევზი ბავშვობიდან არ მიყვარს". არადა, როგორ შეიძლება, არ გიყვარდეს ასეთი ნაზი სტრუქტურის საკვები, რომელიც ენაზე დნება და მსუბუქ სასიამოვნო არომატს ტოვებს?!

თუ თქვენ არ გიყვართ თევზი, ნუ შეაძულებთ მას შვილებსაც. გვერწმუნეთ, ამით მათ ორგანიზმს ბევრ სასარგებლო და აუცილებელ ნივთიერებას მოაკლებთ.

მხოლოდ სასარგებლო

მთელი მსოფლიოს დიეტოლოგები ამტკიცებენ, რომ თევზი, განსაკუთრებით - ზღვისა, აუცილებლად უნდა შედიოდეს როგორც მოზრდილი ადამიანის, ისე ბავშვის რაციონში, განსაკუთრებით მაშინ, თუ ადამიანი ცხოვრობს ზღვის სანაპირო ზოლიდან მოშორებით, სადაც ნიადაგი იოდით ღარიბია. გარდა ამისა, ზღვის თევზი ომეგა-3 ცხიმოვანი მჟავების წყაროცაა. ისინი დიდ როლს ასრულებენ ტვინისა და ნერვული ქსოვილის, თვალის უჯრედების განმტკიცებაში, რაც ბავშვის მოზარდი ორგანიზმისთვის ძალიან მნიშვნელოვანია, ხოლო მოზრდილებისთვის ომეგა-3 წარმოადგენს გულ-სისხლძარღვთა დაავადებების პროფილაქტიკის საიმედო ფაქტორს. ყოველივე ამის გამო თევზი ბავშვებისა და მოზრდილების რაციონის შეუცვლელი კომპონენტია.

ბავშვები ძნელად ეგუებიან სიახლეებს მენიუში, მაგრამ ნუ დაყრით ფარ-ხმალს! მისი თანდასწრებით ჯერ თქვენ დააგემოვნეთ თევზი და მოთმინებით დაელოდეთ შედეგს. ადრე თუ გვიან ისიც გასინჯავს თევზს და მასთან ერთად ორგანიზმს ბევრი სასარგებლო ნივთიერებით შეივსებს.

ზღვის თევზის ცილები შეიცავს 20 ამინმჟავას, რომელთაგან 8 შეუცვლელია ჩვენი ორგანიზმისთვის. ეს ამინმჟავები ჩვენს ორგანიზმში არ წარმოიქმნება, ამიტომ აუცილებელია მათი მიღება საკვების მეშვეობით, თანაც სწორედ ისეთი თანაფარდობით, როგორითაც შეიცავს მათ თევზი.

ასე რომ, გირჩევთ, ყველაფერი იღონოთ, რათა პატარა თევზის ჭამას შეაჩვიოთ. ომეგა-3 ცხიმოვანი მჟავები დაიცავენ მის გულს, ხოლო იოდი იმაზე იზრუნებს, რომ ბავშვი ჭკვიანი, გონიერი გაიზარდოს, ადვილად ისწავლოს და აითვისოს ყველა სიახლე. ნურც იმას დაივიწყებთ, რომ ზღვის თევზი ლამაზი სხეულის საწინდარია. დედამ იცის, რა ძნელია დიეტის დაცვა, ზედმეტ კილოგრამებთან ბრძოლა. ნუთუ შვილსაც იმავე მომავალს უმზადებთ?! მაშ, ასწავლეთ მას სწორი კვება. დაე, თქვენდა გასახარად, პატარა ჯანმრთელი, ლამაზი და ბედნიერი გაიზარდოს.