ცხოვრებაში მთავარი სიჩქარე როდია - მკურნალი.გე

ნანა კალანდაძე

.

• პატარა ყველაფერს ნელა და ზოზინით აკეთებს?

ამის მიზეზი შეიძლება იყოს ახლახან გადატანილი ავადმყოფობა, თანდაყოლილი ცაციაობა, ეს ხშირად ხდება კრიზისულ პერიოდებშიც, მაგალითად, როცა ოჯახი იცვლის საცხოვრებელ ადგილს ან პატარა საბავშვო ბაღში მიდის.

ზოგჯერ ეს ყურადღების დეფიციტის გამოა, როცა დედას არა აქვს ხშირი ურთიერთობა თავის პირმშოსთან. შენელებული მოქმედებებით პატარა "ზოზინა" დედის ყურადღებას იქცევს და ასეთი ხერხით "ჰპარავს" მეტ დროს ურთიერთობისთვის.

მაგრამ იქნებ თქვენს ბავშვს ასეთი ტემპერამენტი აქვს? თუ ის ფლეგმატიკია, თქვენ მოგიწევთ ამასთან შეგუება და თქვენი პატარას თავისებურებების გათვალისწინება.

• ნახვამდის, კუ!

ბავშვის შენელებული მოძრაობის, მოქმედებების ყველაზე გავრცელებული მიზეზია ხელის თითების განუვითარებელი მოტორიკა. პაწია ცდილობს, მაგრამ თითები არც ისე მორჩილნი არიან. ცხოვრების "მოზრდილი" რიტმის აყოლა ბავშვის ძალებს აღემატება. მოიკრიბეთ ნებისყოფა! შეეცადეთ გაუმკლავდეთ გაღიზიანებას და დაეხმარეთ საყვარელ ზოზინას.

აი, რამდენიმე მარტივი იდეა:

სიტუაცია 1. ფაფიან თეფშზე "საძაგელი ფაფა" არ მცირდება.

ბავშვმა შეიძლება დიდხანს იჯახიროს. შეეცადეთ გაამხიარულოთ, დაუჯექით პატარას გვერდით, მასთან ერთად მიირთვით ფაფა და ამავდროულად, აღფრთოვანდით ფაფის საოცარი გემოთი. პატარა უნებურად მოგბაძავთ. ფაფაზე მურაბით გააკეთეთ რგოლები და გამართეთ შეჯიბრი: ვინ უფრო მეტ ტკბილ რგოლს მიირთმევს; მოაგონეთ ზღაპრის გმირები, რომელთაც ის აჭმევს თითო კოვზ ფაფას. დაეხმარეთ მას გმირების სახელების მოგონებაში: "ყოჩაღ, შენ შეჭამე წითელქუდასთვის, მე კი ბურატინოსთვის შევჭამ..." ასე ჩართავთ მას საინტერესო შეჯიბრებაში და მალე თეფში დაცარიელდება.

სიტუაცია 2.

საწერ მაგიდასთან ზის პატარა მოსწავლე, ამთქნარებს და ბუზებს ითვლის. საშინაო დავალების მომზადებისთვის მთელი საღამო იხარჯება. ბევრ ბავშვს უჭირს მთავარზე კონცენტრირება. ასეთ შემთხვევაში თქვენ დაგეხმარებათ საქმეების განრიგი. ის უნდა იყოს დაწვრილებითი. ყველა საქმე უნდა ჩამოწეროთ, მიუთითოთ დრო, რომელიც აუცილებელია მის შესასრულებლად: ხუთი წლის ბავშვისთვის ერთი, პირველკლასელისთვის - მეორე... თქვენ დაგეხმარებათ საათი დიდი ციფრებით. განსაზღვრეთ დრო, რომლის განმავლობაშიც ბავშვი კონცენტრირებული იქნება კონკრეტულ დავალებაზე, კონკრეტული დროით, ბოლო წუთამდე.

დასაწყისისთვის მოგიწევთ თითოეული ეტაპის გაკონტროლება. გაითვალისწინეთ მცირე შესვენებები, რომლებიც ჯილდოს როლს შეასრულებს თითოეული დროულად შესრულებული დავალებისთვის. მაგრამ თუ ბავშვი დათქმული დროისათვის ვერ დაამთავრებს თავის სამუშაოს, დასვენებისთვის განკუთვნილ დროს მოუწევს იმის დამთავრება, რასაც თავი ვერ გაართვა. სამუშაოს შესამსუბუქებლად ზეპირი საგნების მომზადებისთვის ბავშვს ნება დართეთ, ჩაჯდეს სავარძელში ან წამოწვეს.

თუ თქვენ ზოზინა ბავშვი გყავთ, გახსოდეთ:

• დასჯა და დაცინვა აბსოლუტურად არაეფექტურია, როცა გსურთ ააჩქაროთ პატარა - ეძებეთ აუჩქარებლობის მიზეზი და თანდათანობით ეცადეთ მის აღმოფხვრას;
• უფრო მეტად ითამაშეთ ბავშვთან ერთად აქტიური თამაშები;
• სულ უფრო ხშირად გაამხნევეთ, წაახალისეთ და შეაქეთ. აღნიშნეთ ყოველი, თუნდაც მცირედი წარმატება;
• არ გაიფიქროთ ბავშვის შედარება სხვებთან, უფრო მოხერხებულ და აქტიურ ბავშვებთან;
• შესთავაზეთ პატარას დახმარება, თუ ის ვერ ართმევს თავს დასახულ ამოცანას, მაგრამ არ გააკეთოთ სამუშაო მის ნაცვლად. თუ ბავშვი არ ღებულობს თქვენს დახმარებას, მიეცით მას საშუალება მიაღწიოს წარმატებას დამოუკიდებლად.
• მიმართეთ ფანტაზიას, რათა უბიძგოთ ბავშვს აქტიური მოქმედებებისაკენ. თამაში თქვენი საუკეთესო დამხმარეა.