ტელეპროგრამა
სხვადასხვა ასაკის ბავშვებისთვის სხვადასხვა არხზე შესაფერის ტელეპროგრამებს უჩვენებენ. სკოლამდე-ლთათვის არსებობს მულტფილმები, შემეცნებითი პროგრამები, მოსწავლეთათვის - ინტელექტუალური ტოკშოუები ("ყველაზე ჭკვიანი", "ეტალონი"), რომლებიც აღვივებს ცოდნის შეძენის სურვილს, ავითა-რებს სწრაფ აზროვნებას და ა.შ. 5-6 წლის ბავშვს შეიძლება შევთავაზოთ მოკლემეტრაჟიანი შემეცნებითი ფილმები ცხოველების, ქვეყნების, კულტურების შესახებ. ძალიან საინტერესოა ფილმები ზღვის ბინა-დართა ცხოვრებაზე. ასე ხელს შევუწყობთ ბავშვის თვალსაწიერის გაფართოებას და გავუღვივებთ გარესამყაროსადმი ინტერესს.
მსოფლიო კინემატოგრაფი არც საბავშვო მხატვრული ფილმების სიმცირეს უჩივის, მაგრამ სასურველია, ისეთი ფილმი შევარჩიოთ, რომ ბავშვის ასაკსა და ინტერესებს შეესატყვისებოდეს და, ამასთანავე, რამე ახალი შეიტანოს სამყაროს შესახებ მის წარმოდგენებში. ცხადია, უნდა ვარიდოთ ბავშვები ისეთ ფილმებს, რომელთაც შეუძლიათ, მას ფსიქოლოგიური ტრავმაც კი მიაყენონ. მაგალითად, სკოლამდელი ასაკის ბავშვებისთვის არაფრით არ შეიძლება საშინელებათა ფილმების, სისხლიანი "ბოევიკების", ეროტიკული და აგრესიული შინაარსის ფილმების ნახვა. ოღონდ ბავშვს ნუ ეტყვით, ეს პატარებისთვის არ შეიძლებაო, თორემ შესაძლოა, საპირისპირო რეაქცია გამოიწვიოთ - შვილმა დაჟინებით მოითხოვოს მისი ნახვა, რათა პატარად აღარ ჩათვალონ. უმჯობესია აუხსნათ, რომ მის გამო ღელავთ.
ზოგიერთი ფილმის ჩვენება ბავშვებისათვის 3-4 წლის ასაკიდანვე შეიძლება. ასეთია, მაგალითად, ფილმ-ზღაპრები, ფილმები, რომლებიც ბავშვებისა და ცხოველების შესახებ მოგვითხრობს ("მარტო სახლში", "ბეთჰოვენი", "101 დალმაციელი"), თუმცა ისიც გაითვალისწინეთ, რომ ამ ასაკის ბავშვს ფილმის თავიდან ბოლომდე ყურება გაუჭირდება, ამიტომ თავდაპირველად ყველაზე საინტერესო ეპიზოდები შეურჩიეთ. ნუ დაიზარებთ ბავშვთან ერთად ფილმის განხილვას - ეს მას ნანახის გააზრებაში დაეხმარება.
ასაკის მატებასთან ერთად ჟანრები შეიძლება გააფართოვოთ: უმცროსი სასკოლო ასაკის ბავშვებს შეურჩიოთ ფანტასტიკური, სათავგადასავლო და კომედიური ფილმები, 8-11 წლის ბავშვისათვის საინტერესო იქნება სურათები, რომლებიც სკოლის მოსწავლეთა ცხოვრებას ეხება.
თუ გსურთ, შვილს მხატვრული გემოვნება განუვითაროთ, თანდათან სხვადასხვა ჟანრისა და ავტორის ფილმები შესთავაზეთ და ნუ შეიცხადებთ, თუ არ მოეწონება ის, რაც თქვენ გიყვართ. გაამახვილებინეთ ყურადღება ფილმებზე, რომლებიც მის მიერ წაკითხული წიგნების მიხედვით არის გადაღებული. ეს საინტერესოც იქნება და კრიტიკული აზროვნების ჩამოყალიბებას, შედარებისა და ანალიზის ჩვევის გამომუშავებასაც შეუწყობს ხელს.
ომზე და სიყვარულზე
მოზარდებს აუცილებლად დააინტერესებთ ფილმები სიყვარულზე, ადამიანთა შორის ურთიერთობებზე, ცხოვრებაში საკუთარი ადგილის დამკვიდრებაზე. ასეთი ფილმები მათ განსჯისა და აზროვნებისკენ უბი-ძგებს. ფილმის განხილვაში თქვენც ჩაერთეთ - ეს ერთადერთი შანსია, შეიცნოთ მოზარდის წინააღმდე-გობრივი შინასამყარო. უნდა გააცნობიეროთ ისიც, რომ ფილმის ნახვა მოზარდისთვის მხოლოდ გარ-თობა კი არა, არამედ უამრავ კითხვაზე პასუხის მიღების მცდელობაც არის. არ დაივიწყოთ სამხედრო-პატრიოტულ და ისტორიულ თემებზე გადაღებული ფილმები. ისინი ხშირად ძლიერ შთაბეჭდილებას ახდენენ ახალგაზრდებზე, ხელს უწყობენ მათში პატრიოტული სულის ჩამოყალიბებას, აძლევენ ინფორმაციას თავიანთი ქვეყნის ისტორიისა და ისტორიული პირების შესახებ.