მითხარი, რა ფერის სისხლი გაქვს და გეტყვი, რას სვამ
18.02.2009
კანადელმა ქირურგებმა, რომლებმაც 42 წლის ავადმყოფს ოპერაცია გაუკეთეს, ნამდვილი შოკი განიცადეს, როდესაც ჭრილობიდან არა წითელმა, არამედ მუქმა მწვანე სისხლმა ამოხეთქა. უცნაური სითხე დაუყოვნებლივ გაგზავნეს ლაბორატორიაში. პაციენტს სულფჰემოგლობინემია აღმოაჩნდა.
,
სულფჰემოგლობინემიის დროს გოგირდის მოლეკულა უკავშირდება ჰემოგლობინის ცილას, რომელიც სისხლის წითელ უჯრედებში - ერითროციტებში - ჟანგბადის გადამტანის როლს ასრულებს.
აღმოჩნდა, რომ ორგანიზმში მიმდინარე ქიმიურმა რეაქციამ შეცვალა ჰემოგლობინის სტრუქტურა, რის შედეგადაც შეიცვალა სისხლის ფერი.
ექიმების აზრით, ასეთი ეფექტი შეეძლო გამოეწვია შაკიკის საწინააღმდეგო მედიკამენტის - სუმატრიპტანის მეტისმეტად ხშირ მიღებას. ამ პრეპარატის მოქმედი ნივთიერება შეიცავს სულფონამიდურ ჯგუფს, რომელსაც შეეძლო, სისხლში გოგირდის წყაროდ ქცეულიყო. ოპერაციამ გართულების გარეშე ჩაიარა. ექიმების რეკომენდაციით, პაციენტმა შეწყვიტა მედიკამენტის მიღება და რამდენიმე კვირის შემდეგ მისმა სისხლმა ბუნებრივი ფერი დაიბრუნა.
