News
მეცნიერები გვირჩევენ, კარგი მხედველობის შესანარჩუნებლად რაციონი გავიმდიდროთ სტაფილოთი, მწვანე ფოთლოვანი ბოსტნეულით, კვერცხით, ციტრუსებითა და კენკრით, თხილეულითა და ნუშით, ცხიმიანი თევზით.
- სტაფილო შეიცავს A ვიტამინს (ბეტა-კაროტინს), რომელიც აუცილებელია ბადურა გარსისა და თვალის სხვა ნაწილებისთვის.
- მწვანე ფოთლოვანი ბოსტნეული შეიცავს ანტიოქსიდანტებს ლუთეინსა და ზეაქსანთინს. თანამედროვე კვლევები მოწმობს, რომ ეს ნივთიერებები ამცირებს მაკულარული დეგენერაციისა და კატარაქტის განვითარების რისკს.
- კვერცხი ლუთეინის, ზეაქსანთინისა და თუთიის წყაროა, რომელიც ასევე უშლის ხელს კატარაქტისა და მაკულარული დეგენერაციის განვითარებას.
- ციტრუსები და კენკრა უხვად შეიცავს C ვიტამინს, რომლის ნაკლებობაც ხელს უწყობს კატარაქტისა და მაკულარული დეგენერაციის განვითარებას.
- თხილეული და ნუში გაჯერებულია E ვიტამინით, რომელიც ასევე უმნიშვნელოვანეს როლს ასრულებს მაკულარულ დეგენერაციასთან ბრძოლაში.
- ცხიმიანი თევზი - თინუსი, ორაგული, სკუმბრია, ქაფშია, კალმახი - მდიდარია ომეგა-3 ცხიმოვანი მჟავებით, რომლებიც ბადურას ერთ-ერთი კომპონენტია და რომლის ნაკლებობაც მშრალი თვალის სინდრომს იწვევს.
ასაკობრივი მაკულარული დეგენერაცია
- ცენტრალური მხედველობა ხუნდება და სიმკვეთრეს კარგავს, სწორ ხაზებს დაკლაკნილად ხედავს ადამიანი
- დაავადებისთვის დამახასიათებელი ცვლილებების აღმოჩენა ექიმს ხელის ოფთალმოსკოპით შეუძლია
- დეგენერაციის პროგრესირების შენელება საკვები დანამატებით შეიძლება
- ზოგჯერ საჭირო ხდება თვალშიდა ინექციები და ლაზერით მკურნალობაც
ასაკობრივი მაკულარული დეგენერაცია ცენტრალური მხედველობის შეუქცევადი დაკარგვის ყველაზე ხშირი მიზეზია ხანში შესულებში. იგი თანაბარი სიხშირით გვხვდება ქალებსა და მამაკაცებში.
მიზეზები
დაავადების რისკ-ფაქტორებია:
- უფროსი ასაკი
- მწეველობა
- თეთრკანიანობა
- ზოგი გენეტიკური დარღვევა
- მაღალი არტერიული წნევა
- საკვებში ომეგა-3 ცხიმოვანი მჟავების (შეიცავს ზოგი თევზი) და მუქი მწვანე, ფოთლოვანი ბოსტნეულის ნაკლებობა
ტიპები: ასაკობრივი მაკულარული დეგენერაციის ორი ფორმა არსებობს:
დაავადება შემთხვევათა ოთხმოცდაათ პროცენტში მშრალი ფორმით მიმდინარეობს. თუმცაღა, მის მიერ გამოწვეულ სიბრმავეთა 90% პაციენტთა სწორედ იმ დანარჩენ, სველი ფორმის მქონე 10%-ში ვითარდება.
მშრალი მაკულარული დეგენერაციის დროს ყვითელი ხალი თხელდება მისი უჯრედების განლევასთან ერთად. ამ შემთხვევაში დაავადებამ შეიძლება ორივე თვალი დააზიანოს. ბადურაზე არ აღინიშნება ნაწიბუროვანი ქსოვილი, სისხლდენა ან სითხის ჟონვა.
სველი მაკულარული დეგენერაცია თავდაპირველად მშრალი ფორმით ვლინდება. ამ დროს ყვითელი ხალის ქვეშ ახალი სისხლძარღვები ვითარდება. მათგან შესაძლოა სისხლი და სითხე გამოიჟონოს და ბადურას ქვეშ დაგროვდეს (აქედან მოდის სახელწოდება "სველი"). მისგან საბოლოოდ ამობურცული, ნაწიბუროვანი ქსოვილი ვითარდება. სველი ფორმა თავდაპირველად ერთ თვალს აზიანებს, მაგრამ დროთა განმავლობაში ორივე შეიძლება მოიცვას.
თემის გაგრძელებას გაეცანით ბმულზე
https://merki.mkurnali.ge/sections/1303/asakobrivi-makularuli-degeneracia/
