საკვები პროდუქტები, რომლების ფილტვების ქრონიკული ობსტრუქციული დაავადებისთვის დამახასიათებელ სიმპტომებს ამსუბუქებს
ფქოდ-ის დროს კვებას ძალიან დიდი მნიშვნელობა ენიჭება. ფილტვების ქრონიკული ობსტრუქციული დაავადება სასუნთქი გზების დაავადებათა ჯგუფს მოიცავს, მათ შორის: ემფიზემას და ქრონიკული ბრონქიტს.
უფრო ზუსტად, ფქოდ არის სასუნთქი გზების სანათურის პერსისტული ანუ მუდმივად არსებული ობსტრუქცია, რომელიც მხოლოდ ნაწილობრივ შეიძლება იყოს შექცევადი და საინჰალაციო ტოქსინების, უფრო ხშირად კი თამბაქოს კვამლის ზემოქმედების შედეგად აღმოცენებული ანთებითი რეაქციის შედეგია.
მედიკამენტოზურ მკურნალობასთან ერთად, ფილტვებისთვის განკუთვნილი დიეტა სუნთქვას აუმჯობესებს, სიმპტომებს ამსუბუქებს და სასუნთქ სისტემასაც აძლიერებს.
მაღალპროტეინული საკვები
ფქოდ-ს მქონე პაციენტების უმეტესობას კვება უჭირთ, ისინი წონაში საგრძნობლად იკლებენ და კუნთებიც უსუსტდებათ.
კვლევები აჩვენებს, რომ პაციენტები ხშირად საკმარისი რაოდენობის ცილებს არ ღებულობენ. კალორიული დეფიციტი და პროტეინების ნაკლებობა სუნთქვის პროცესში მონაწილე კუნთებს ადუნებს, ასუსტებს, რაც სუნთქვის გაძნელებას იწვევს. ამიტომ, აუცილებელია ფქოდ-ს მქონე პაციენტებმა დიდი რაოდენობით პროტეინების შემცველი საკვები მიიღონ.
ამერიკის ფილტვის ასოციაციის რეკომენდაციით, ძლიერი რესპირატორული კუნთების შესანარჩუნებლად, ფქოდ-ს მქონე პაციენტებმა ცილოვანი საკვები დღეში ორჯერ მაინც უნდა მიირთვან.
კვების რაციონი გაამდიდრეთ შემდეგი პროდუქტებით: რძე, ყველი, კვერცხი, ხორცი, თევზი, თხილეული და სხვ.
D ვიტამინით მდიდარი საკვები
ფქოდ-ს და ემფიზემას მქონე პაციენტებს ხშირად D ვიტამინის დეფიციტი უვითარდებათ.
ერთ-ერთი მიზეზი არის ის, რომ სტეროიდები, რომლებიც ფქოდ-ს დროს ინიშნება, D ვიტამინის შეწოვას უშლის ხელს. ასევე, ფქოდ-სთვის დამახასიათებელი ერთ-ერთი სიმპტომი, როგორიცაა ქოშინი შესაძლოა, D ვიტამინის ნაკლებობით იყოს გამოწვეული.
D ვიტამინი ჯანმრთელი ძვლების გარანტიაც არის, მისი დეფიციტი ოსტეოპოროზს იწვევს. ყურადსაღებია, რომ ფქოდ-ს დროს ხშირია ოსტეოპოროზის განვითარებაც.
ფქოდ-ს მქონე პაციენტებში D ვიტამინის ნაკლებობა, ფილტვების ფუნქციაა აქვეითებს და დაავადების სიმპტომებსაც აურესებს.
არსებობს კვლევები, რომელთა თანახმადაც, ფქოდ-ს გამწვავებას D ვიტამინი(დეფიციტისას) 45%-ით ამცირებს.
კვების რაციონში შეიტანეთ: კვერცხის გული, ნუშის რძე, ორაგული, სოკო, რძის პროდუქტები.
ბოჭკოვანით მდიდარი საკვები
ბოჭკოვანი საკვები ჯანსაღი საჭმლის მომნელებელი სისტემის შენარჩუნებაში გვეხმარება. ყაბზობა და შებერილობა უფრო გაართულებს ფქოდ-ს დროს სუნთქვას, ამიტომ ბოჭოთი მდიდარი საკვები ამ პრობლემას თავიდან აგაცილებთ.
ფქოდ-ს ხშირად თან ახლავს გულის დაავადებები, უჯრედისით მდიდარი საკვები კი გულისთვის სასარგებლოა, ამცირებს ქოლესტერინის დონესაც.
ფქოდ-ს მქონე პაციენტები ნახველის არსებობას უჩივიან, ამიტომ მათთვის საჭიროა დიდი რაოდენობით სითხის მიღება.
ამერიკის ფილტვის ასოციაცია გვირჩევს, ფქოდ-ს დიაგნოზის შემთხვევაში, დღეში 6-8 ჭიქა წყალი დავლიოთ. სასარგებლოა კიტრი, ნიახური, საზამთრო და ის საკვები, რომლებიც ორგანიზმის დატენიანებაში გვეხმარება.
თუმცა, ფქოდ-ს მქონე პაციენტებს, რომლებსაც გულის პრობლემები აწუხებთ შესაძლოა, სითხის მიღების შეზღუდვა მოუწიოთ.