რა უნდა ვიცოდეთ ეპილაციის შესახებ
ელექტროეპილაციის მეთოდი გასული საუკუნის 30-ანი წლებიდან დაინერგა პრაქტიკაში. ეს მეთოდი გულისხმობს თმის მოცილებას მაღალი სიხშირის გალვანური ან ცვლადი ელექტრული დენის გამოყენებით. პროცედურის დროს კოსმეტოლოგს გამადიდებელი მინის ქვეშ წვრილი ნემსი თმის ღერის მიმართულებით ბოლქვში შეჰყავს. მიწოდებული დენის ზემოქმედებით კი თმის ბოლქვი იმ დონეზე ზიანდება, რომ აღარ შესწევს ახალი ღერის წარმოქმნის უნარი. სასურველია, თმის ღერი მისი აქტიური ზრდის პიკში იქნეს მოცილებული. წინააღმდეგ შემთხვევაში პროცედურა არაეფექტური აღმოჩნდება, ანუ თმის ღერი კვლავ გაიზრდება. ამის გამო სასურველი შედეგის მისაღწევად ჩვეულებრივ ელექტროეპილაციის 2-3 პროცედურა ხდება საჭირო.
ელექტროეპილაციისათვის იზოლირებული მოოქროვილი ან მოვერცხლილი ნემსები გამოიყენება. ზოგიერთ კოსმეტოლოგს ოქროს ან სამედიცინო ფოლადისგან (ნიკელისა და ქრომის შენადნობი) ჩამოსხმული ნემსებიც აქვს. იზოლირებული ნემსის გამოყენება მაქსიმალურად ამცირებს კანქვეშა ნაწიბურების განვითარებას და ზრდის პროცედურის ეფექტურობას. ოქროს ნემსით ელექტროეპილაციის ჩატარება აუცილებელია იმ პირებისათვის, რომელთაც კანის მომატებული მგრძნობელობა ან სხვადასხვა სახის ალერგიული რეაქცია აღენიშნებათ. პროცედურის შემდეგ, როგორც წესი, კანი წითლდება, სიწითლე ორიოდე საათის შემდეგ ქრება და ე. წ. ტრავმირებულ უბნებზე ქერქისმაგვარი ფუფხები ჩნდება. ამ უკანასკნელთა ძალით მოცილება ყოვლად დაუშვებელია. რამდენიმე დღეში ანთების ჩაცხრობისა და კანის მოშუშების კვალად ისინი თავისით ძვრება.
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
მიუხედავად იმისა, რომ ელექტროეპილაცია საკმაოდ მტკივნეული პროცედურაა, მიღებული შედეგის გამო ის ჭარბთმიანობასთან ბრძოლის ყველაზე ეფექტურ მეთოდად ითვლება. თუმცა ისიც უნდა აღინიშნოს, რომ არასწორად ჩატარებულ პროცედურას თავისი გართულებები და გვერდითი მოვლენები აქვს _ დამწვრობის, ლაქებისა და ნაწიბურების განვითარების სახით. ელექტროეპილაციას ჩვეულებრივ სხეულის მცირე უბნებზე მიმართავენ (სახის, ბიკინის არე და სხვა).
თინათინ გოცაძე
