მარიამ ფოლადაშვილი

ტანდეგობის დარღვევა ჯანმრთელობაზე უარყოფით გავლენას ახდენს. აზიანებს საყრდენ-მამოძრავებელ სისტემას, რამაც შესაძლოა ხელი შეუშალოს სხვა სისტემების გამართულ მუშაობას. როდესაც ზურგი მოხრილია, დიდი დატვირთვა ადგება ხერხემლის სვეტს, მალათაშუა დისკოებს. ხანგრძლივმა დატვირთვამ კი შესაძლოა დისკოები დააზიანოს და თიაქარი გამოიწვიოს.

არასწორი დგომის ან ჯდომის გამო ხშირად ზურგის, მხრების და კისრის ტკივილი იჩენს თავს. ხანგრძლივად არასწორ პოზიციაში ყოფნისას კისრის კუნთები იჭიმება, მკერდისა და მუცლის კუნთები მოკლდება და ზურგის კუნთები სუსტდება, რასაც შესაძლოა ტკივილიც დაერთოს. განსაკუთრებით უარყოფითი გავლენა აქვს წინ გადახრილ ჯდომას. ამ დროს მალების კიდეები ერთმანეთს უახლოვდება და მალათაშუა დისკოებს აზიანებს.

არსებობს ტანდეგობის დარღვევის რამდენიმე ფორმა:

• მოხრილი ანუ მრგვალი ზურგი (მხრები დაშვებული და წინ მოზიდულია);
• სქოლიოზური ტანდეგობა (ტორსის წინ დახრისას ასიმეტრია სწორდება);
• ბრტყელი ზურგი (როცა ხერხემლის ფიზიოლოგიური მრუდეები გასწორებულია)

არასწორ ტანდეგობაზე უმეტეს შემთხვევაში გავლენას ახდენს მავნე ჩვევები, ერთსა და იმავე პოზაში დიდხანს ყოფნა, ყოველდღიური საქმიანობა, რომელიც მოხრით მოძრაობებს მოითხოვს.

ვარჯიშით და ცხოვრების წესში გარკვეული ცვლილებების შეტანით ტანდეგობის გამოწორება შესაძლებელია.

გასათვალისწინებელია შემდეგი რჩევები:

• დიდხანს ჯდომისას რეგულარულად იცვალეთ პოზიცია ან დროდადრო ადექით;
• ხშირად ამოძრავეთ თავი;
• ეცადეთ ისხდეთ სწორად;
• ფეხები დროდადრო გამართეთ და მაღალზე შემოაწყვეთ;
• მოძრავეთ მხრები წრიულად (ჯერ - წინ, შემდეგ - უკან);
• ხშირად ისეირნეთ;
• მიიღეთ ვიტამინებით მდიდარი საკვები.