ნანა კალანდაძე

• "ჩემი მეგობარი ვაჟი ძალიან არაორგანიზებულია. მუდმივად ადგენს გეგმებს, რომლებიც არასოდეს სრულდება. მაგალითად, ამბობდა, რომ დღესასწაულის დღეებში ბაკურიანში ან გუდაურში წავიდოდით, შემდეგ კი დაივიწყა ეს. მე ვცდილობ, არ ვისაუბრო ამაზე, რათა მასზე ზეწოლა არ მოვახდინო, ხოლო თუ მაინც წამოვიწყებ ლაპარაკს, ყოველთვის ასახელებს რაიმე მიზეზს, რის გამოც გეგმები შეიცვალა: ან სამსახურის გამო, ან ნათესავებს სჭირდებოდათ მისი დახმარება, ან გადაღლილი იყო... მაგრამ ეს ხომ ჩემი გეგმებიც არის. ძალიან მწყინს ეს ყველაფერი. როგორ მოვიქცე?"

ანი, 22 წლის

ალბათ თქვენი მეგობარი ადეკვატურად ვერ აფასებს საკუთარ შესაძლებლობებს, ყველა გარემოებას. მას ნამდვილად სჯერა, რომ გამონახავს დროს, ფულსა და ძალებს იმისათვის, რომ გეგმა შეასრულოს და გაემგზავროს, მერე კი ირკვევა, რომ რაღაც არასწორად გათვალა. ამიტომ შეეცადეთ, არ უსაყვედუროთ ამის გამო. უმჯობესია უთხრათ, რომ თქვენთვის მნიშვნელოვანია, წინასწარ განსაზღვროს თავისი შესაძლებლობები და მხოლოდ იმას დაგპირდეთ, რის შესრულებასაც შეძლებს. გარდა ამისა, თქვენი მეგობარი მამაკაცი ალბათ იმ ადამიანების კატეგორიას მიეკუთვნება, რომლებსაც კარგად ეხერხებათ ახალი იდეების მოწოდება, მაგრამ არ აქვთ მათი ცხოვრებაში რეალიზების უნარი. ზოგჯერ ამისათვის შესაძლებლობებიც არ უწყობს ხელს. მაშინ შეძლებთ თქვენი პრობლემის გადაჭრას, თუ "ადმინისტრატორი" გახდებით თქვენს წყვილში, საკუთარ თავზე აიღებთ დასახული გეგმებისა და მიზნების ორგანიზებას, მათ ხორცშესხმას.

• "ვერც კი მოვასწარი ახალ სამსახურში მისვლა, რომ სამუშაომ იმედი გამიცრუა. წამოსვლას ვფიქრობ, მაგრამ ვერ ვიღებ საბოლოო გადაწყვეტილებას, რადგან კოლექტივი ნამდვილად ძალიან კარგია! მათთან დაშორება არ მინდა. არ ვიცი, როგორ გავაკეთო არჩევანი."

ზეიკო, 29 წლის

გამოსავალი ერთია - ახალი სამსახური უნდა მოძებნოთ. ყველაზე საყვარელი და სიმპათიური კოლეგებიც კი ვერ მოგანიჭებენ სიხარულს, თუ სამუშაოს ვერ მოაქვს თქვენთვის სიამოვნება და ვერ აკმაყოფილებს თქვენს მოთხოვნილებებს, ან უფრო მეტიც - ზიზღს იწვევს. რაც შეეხება იმ ადამიანებს, ვინც თქვენ მოგწონთ, მათთან ურთიერთობა ისედაც შეგიძლიათ გააგრძელოთ. ამიტომ თავს ნუ იმართლებთ და ნუ გერიდებათ თქვენი გადაწყვეტილების. თბილად დაემშვიდობეთ თანამშრომლებს. შეგიძლიათ გამოსამშვიდობებელი საღამოც მოაწყოთ, სადაც შეძლებთ უთხრათ მათ, რომ მათთან მუშაობა და ურთიერთობა თქვენთვის ძალიან სასიამოვნო იყო.

• "ახლობელი მამაკაცი მყავს. საკმარისია ერთმანეთი დავინახოთ, მაშინვე იფეთქებს ხოლმე ვნება. ყოველი შეხვედრისას ერთი და იგივე მეორდება: შემთხვევით შევხვდებით ერთმანეთს და გრძნობების ტყვეობაში ვვარდებით. მხურვალე ურთიერთობა გვაქვს. მერე კი საშინლად ვჩხუბობთ, სკანდალებს ვაწყობთ. ვიცი, რომ ხასიათით ვერ ვეწყობით ერთმანეთს. როგორ ავიცილოთ თავიდან ასეთი ხაფანგი?"

ელენე, 25 წლის

როდესაც ურთიერთობებში ერთი და იგივე სიტუაცია მრავალჯერ მეორდება, ეს მხოლოდ ერთ რამეზე მეტყველებს: ყველაფერი ბოლომდე არ არის გარკვეული. თქვენი რომანი ყოველთვის თავიდან იმიტომ იწყება, რომ თქვენთვის ის არ დამთავრებულა. ახალი შეხვედრები - ეს არის მცდელობა, ამჯერად ყველაფერი სხვაგვარად იყოს: რაღაც დაუმტკიცოთ ერთმანეთს, ურთიერთობა უფრო სერიოზული გახადოთ, თავიდან აიცილოთ განხეთქილება და ა.შ. შესაბამისად, იმისათვის, რომ აღარ გქონდეთ გულისტკენა, უნდა შეეცადოთ და ან თქვენი ფარული სურვილების რეალიზაცია მოახდინოთ, ან უარი თქვათ მათზე.

• "ჩემი დედამთილი დარწმუნებულია, რომ ჩემი გოგონასგან ყაჩაღანას ვზრდი. გამუდმებით მარწმუნებს, რომ უნდა აღვზარდო "ნამდვილი ქალი". გოგონასთვის საჩუქრად მოაქვს ლამაზი კაბები, კატეგორიულად უკრძალავს ხეებზე აძრომას, დაღმართიდან ჩამოსრიალებას, ველოსიპედით სეირნობას, რათა ახალი ტანსაცმელი არ დასვაროს და გააფუჭოს. მე კი ვერ ვხედავ დიდ უბედურებას იმაში, რომ ჩემი გოგონას შარვლებიდან ლაქები არ ამოდის - ის ხომ ჯერ მხოლოდ რვა წლისაა!"

ლიკა, 28 წლის

ყველაზე გონივრულია, გაითვალისწინოთ, უპირველეს ყოვლისა, ბავშვის სურვილები და მოთხოვნილებები. ბავშვებს კი ამ ასაკში ხმაურიანი, სწრაფი თამაშები მოსწონთ. თამაში უმთავრესია ბავშვის განვითარებისთვის. რაც შეეხება ტანსაცმელს, ბავშვები ტანსაცმლის მოხერხებულობას უფრო მეტად აფასებენ, ვიდრე სილამაზეს. გარდა ამისა, მოძრაობითი აქტივობა ძალზე მნიშვნელოვანია ბავშვის ჯანმრთელობისთვის. არ არის საჭირო, გოგონა ძალით გადავაქციოთ თოჯინად.

• "ყოფილი შეყვარებული გამუდმებით მირეკავს და საყვედურებით მავსებს, სცენებს მიწყობს. თუმცა საუბარი ყო-ველთვის იმით იწყება, რომ ბოდიშის მოხდა სურს, და იმით მთავრდება, რომ ცრემლებამდე მივყავარ. როგორ შევაჩერო? ~"

მარიკა, 19 წლის

იმ შემთხვევაშიც კი, თუ თქვენ მის წინაშე რამე დააშავეთ, მან თავისი ქცევით უკვე დიდი ხანია აიღო რევანში. უბრალოდ, შეწყვიტეთ მასთან ურთიერთობა: არ უპასუხოთ მის ზარს, არ წაიკითხოთ წერილი, არ დაელაპარაკოთ შეხვედრისას. შეცვალეთ მობილური ტელეფონის ნომერი.

---

• "გავიგე, რომ ქალაქში ერთი თვით ჩამოდის ჩემი ქმრის ყოფილი შეყვარებული. ადგილს ვერ ვპოულობ, ძალიან ვეჭვიანობ. ისინი უკვე შეთანხმდნენ შეხვედრაზე. მე კი ეჭვი მღრღნის: ნამდვილად მეგობრულად აპირებენ შეხვედრას? არ ვარ დარწმუნებული, რომ ჩემს მეუღლეს მის მიმართ ნაზი გრძნობები არ შერჩენია - მათ ხომ ოდესღაც უყვარდათ ერთმანეთი. მირჩიეთ, როგორ მოვიქცე."

რუსიკო, 31 წლის

სცადეთ, ეს ქალი თქვენთან სტუმრად მიიპატიჟოთ. უთხარით ქმარს, რომ გსურთ მისი გაცნობა, რადგან მასზე ბევრი რამ გსმენიათ და ახლა ამ მონათხრობის მთავარი გმირის ნახვა გსურთ. მერე კი ხშირად მიიწვიეთ ის თქვენთან და უმჯობესია სხვა სტუმრებთან ერთად. ასე საშუალება მოგეცემათ გვერდიდან დააკვირდეთ ქალის ქცევას და გაიგოთ, ნამდვილად გაქვთ მღელვარების მიზეზი თუ არა. იქნებ თქვენი მეუღლე მასთან შეხვედრას მხოლოდ ერთხელ გეგმავს, რათა აუხსნას, რომ ურთიერთობა აღარ ექნებათ. ამ შემთხვევაში იგი გაცნობის მიზნით მის მიპატიჟებაზე არ დაგთანხმდებათ. ეს უარი მშვიდად მიიღეთ.

• "შეყვარებულმა მიმატოვა. დეპრესიაში ვარ და ამ მდგომარეობიდან ვერ გამოვდივარ. მეგობრები მირჩევენ, მისი შემცვლელი ვიპოვო. მე კი ამაზე ფიქრიც არ მსურს! როგორ მოვიქცე?"

მარი, 21 წლის

თუ სერიოზული რომანი გქონდათ, მაშინ ამის დავიწყება ადვილი არ იქნება. ასეთ ჭრილობებს მხოლოდ დრო აშუშებს. დრო და მოქმედება, რომელიც არავითარ შემთხვევაში არ უკავშირდება სასიყვარულო ურთიერთობას და მოგონებებს მასზე. მაგალითად, ისეთ საქმიანობას უნდა მიჰყოთ ხელი, როგორიცაა სამსახურებრივი დავალებები, მოგზაურობა და სხვა.

• "მე და ჩემს მეუღლეს სულ უფრო იშვიათად გვაქვს ინტიმური ურთიერთობა, მე კი ძალიან მჭირდება სითბო და ალერსი. ის ძალიან გვიან ბრუნდება სამსახურიდან და სანამ ივახშმებს, შხაპს მიიღებს, მე, ჩვეულებრივ, დასაძინებლად ვწვები. დილაობითაც არ გვაქვს სიახლოვის დრო - სამსახურში წასასვლელად უნდა მოვემზადოთ, მერე ბავშვი უნდა წავიყვანო საბავშვო ბაღში. ორივეს დაუკმაყოფილებლობის განცდა გვაქვს, მაგრამ რა ვქნათ, არ ვიცით..."

ეკა, 35 წლის

თუ ობიექტურად ვიმსჯელებთ, დილაობით თქვენ და თქვენს ქმარს უფრო მეტი დაბრკოლება გხვდებათ სიახლოვისთვის, საღამოობით კი თავად ეუბნებით უარს საკუთარ თავს ქმართან ურთიერთობაზე მხოლოდ იმიტომ, რომ ძალიან გეძინებათ, მეუღლეს კი შია. ალბათ, ორივემ უნდა გადახედოთ ჩვეულ გრაფიკს. შეეცადეთ, დაძლიოთ დაღლილობა - ალბათ არ ინანებთ. მადა ჭამაში მოდისო - ეს ანდაზა ყოველთვის აქტუალურია.

• "აღმოვაჩინე, რომ ჩემი სტომატოლოგისადმი გულგრილი არ ვარ. როგორ ვუთხრა მას ამის შესახებ? და საერთოდ, ღირს კი ამის აღიარება? ძალიან მინდა, მან ჩემში მხოლოდ პაციენტი არ დაინახოს..."

თეონა, 23 წლის

კარგი ექიმი ყურადღებას ამახვილებს პაციენტის არა გარეგნობაზე, არამედ ჯანმრთელობის მდგომარეობაზე. როდესაც მის კაბინეტში შედიხართ, სტომატოლოგი ვერ ამჩნევს, როგორი ფიგურა გაქვთ, - ის ხომ თქვენს პირის ღრუზეა გადართული. საჭიროა "შემთხვევით" შეხვდეთ მას კაბინეტის მიღმა. აგრძნობინეთ, რომ გაგახარათ მისმა ნახვამ, ჰკითხეთ მისი საქმეებისა და დასვენების დღეების შესახებ. ძნელია წინასწარ განსაზღვროთ ამ საუბრის შედეგი, მაგრამ იმას მაინც მოახერხებთ, რომ თქვენს საყვარელ ექიმს ინიციატივის გამოჩენის შანსი მისცეთ.

• "ჩემი დაქალი არასასიამოვნო ამბებში მხვევს. ხან კაფეში მივყავარ, სადაც აღმოჩნდება ხოლმე, რომ ყველაფერი ძალიან ძვირია, ხან საეჭვო ახალგაზრდების გაცნობისკენ მიბიძგებს... უსიამოვნებები მღლის, მაგრამ ჩემი დაქალის განსაცდელში მიტოვება არ შემიძლია... "

ანა, 26 წლის

რა გიშლით ხელს, გამოავლინოთ პასუხისმგებლობის გრძნობა მანამდე, სანამ მორიგ თავგადასავალში გაეხვეოდეთ? შეეცადეთ, თქვენი გაიტანოთ - წადით მხოლოდ იმ კაფეში, სადაც თქვენ გსურთ, ნუ გააბამთ ურთიერთობას არასასიამოვნო ახალგაზრდებთან. თქვენ უფრო მეტად გაქვთ განვითარებული ზომიერების გრძნობა, ვიდრე თქვენს მეგობარ გოგონას. ასე რომ, ნუ მისცემთ მას საშუალებას, გადაწყვეტილებები თქვენს ნაცვლად მიიღოს.

• "ძალიან დამღალა დედის შენიშვნებმა და კარნახმა. უსუსური ვგონივარ თუ რა, არ ვიცი. ზეპირად ვიცი ყველა ოჯახური თარიღი, მაგრამ გამუდმებით მახსენებს: "დაურეკე, მიულოცე, ასე უთხარი, ისე უთხარი"..."

ია, 27 წლის

როგორც ჩანს, დედათქვენს უბრალოდ მოსწონს ოჯახური ტრადიციების მცველის როლი. შესთავაზეთ ექსპერიმენტი: შეუთანხმდით, რომ საღამოს შეუძლია შეამოწმოს იუბილართან, მიულოცეთ თუ არა მას. ეს დაეხმარება დედათქვენს, დარწმუნდეს, რომ თქვენი მეხსიერება ბევრ დეტალს ინახავს და მითითებების გარეშეც ყველაფერი გახსოვთ.