კავშირი მხედველობასა და სწავლის უნარს შორის
დადგენილია, რომ ბავშვები და მოზარდები სწავლის პროცესის 80% ს მხედველობითი ფუნქციის საშუალებით ახორციელებენ.
ბავშვის განვითარების ერთ-ერთ ყველაზე მნიშვნელოვან ნაწილს წარმოადგენს მისი კოგნიტურ-შემეცნებითი და ინტელექტუალური შესაძლებლობების განვითარება.
როდესაც ბავშვს სხვადასხვა ხარისხის მხედველობის დარღვევა აქვს, იგი შეზღუდვით იღებს ამა თუ იმ ინფორმაციას, რაც ინტელექტუალური განვითარებისთვის მნიშვნელოვანია. აქედან გამომდინარე, სრულყოფილი მხედველობა აუცილებელი პირობაა ბავშვისა და მოზარდისთვის ნებისმიერ ასაკში, რათა მიაღწიოს სრულ კოგნიტურ, ასევე ფიზიკურ-ფსიქიკურ და საერთო ჯამში მთლიან განვითარებას.
მხედველობა არის რთული ფიზიოლოგიური პროცესი, რომელიც მჭიდრო კავშირშია თავის ტვინის შემადგენელ ნაწილებთან. პრობლემების დროულად აღმოჩენის და შესაბამისი კორექციის მიზნით საჭიროა ბავშვების და მოზარდების რამოდენიმე ეტაპად გასინჯვა. რომელიც მოიცავს: ახალშობილის პირველად სკრინინგს პედიატრის ან ოჯახის ექიმის მიერ. შემდგომი ვიზიტები კი უნდა მოიცავდეს მხედველობის ორგანოს სრულ კვლევას პედიატრი ოფთალმოლოგის მიერ: 6 თვიდან 1 წლამდე ასაკში, 3 წლის ასაკში, სკოლამდელ და ასევე სკოლის პერიოდში.
ბავშვთა თვალის დაავადებებიდან ყველაზე მეტად გავრცელებულია რეფრაქციის ანომალიები ჰიპერმეტროპია, ასტიგმატიზმი და მიოპია. მიჩნეულია, რომ მიოპიის განვითარებაში დიდ როლს ასრულებს ეკრანებთან დიდი დროის გატარება, რაც მხედველობის სიმახვილეს რისკის ქვეშ აყენებს. აღნიშნული პათოლოგიების დროს სათვალით და კონტაქტული ლინზით კორექცია უმეტეს შემთხვევაში უკეთესად ხედვას უწყობს ხელს.
არსებობს მხედველობის ორგანოს ისეთი დაავადებებიც, რომლის დროსაც მხოლოდ სათვალით კორექცია არ არის საკმარისი, რის გამოც იზღუდება სწავლის უნარი ბავშვებში, ხოლო მოზრდილობაში მრავალი პრობლემის მიზეზი ხდება. ასეთებია სიელმე, ამბლიოპია, კონვერგენციის სისუსტე, აღქმის პრობლემები, რომლის დროსაც არ ხდება ორივე თვალის მხედველობითი ინფორმაციის თანაბარი მიწოდება თავის ტვინში, შეზღუდულია თვალების და ტვინის შერწყმული მუშაობა.
იმისთვის რომ დადგინდეს პრობლემის გამომწვევი მიზეზი, შემდგომში მოხდეს ზუსტი და დროული კორექცია საჭიროა ოფთალმოლოგის კონსულტაცია და დროული მკურნალობის დაწყება.
მხედველობითი ფუნქციების დარღვევით გამოწვეული სწავლის უნარის შეზღუდვის დროს, ასევე თვით მისი გამომწვევი მიზეზების კორექციის მიზნით ეფექტურია მხედველობის თერაპი. კვლევებით დამტკიცებულია მხედველობის თერაპიის ეფექტურობა სწავლის უნარის შეზღუდვის დროს, რის შემდეგ ბავშვებში საგრძნობლად უმჯობესდება სწავლის და ათვისების უნარი.
მიაქციეთ ყურდღება შემდეგ სიმპტომებს:
- ტელევიზორთან ან კომპიუტერის მონიტორთან ახლოს მისვლა;
- წიგნთან და რვეულთან თავის ახლოს მიტანა;
- გაორება კითხვის დროს ან მის გარეშე;
- კითხვის ან სწავლის თავიდან არიდების სურვილი;
- კითხვის გაძნელება და ნელა კითხვა;
- ასოების ან სიტყვების გამოტოვება;
- გადაღლა კითხვის და წერის დროს;
- წაკითხულის დამახსოვრების გაძნელება;
- თავისა და თვალების ტკივილი;
- მხედველობის გაბუნდოვნება;
- თვალების ხშირი ხამხამი და მოსრესა
ერთი ან რამოდენიმე ამ ნიშანთაგანის არსებობის შემთხვევაში, აუცილებელია მხედველობის ორგანოს სრულყოფილი კვლევა სპეციალისტთან.
მხედველობის პრობლემებმა შეიძლება უარყოფითი ზეგავლენა მოახდიოს ბავშვის სწავლის უნარზე და შემდგომში მის ზოგად განვითარებაზე, ასევე სრულყოფილმა მხედველობამ შესაძლოა ხელი შეუწყოს ბავშვს მიაღწიოს სრულ განვითარებას.
