გულის უვნებელი და პათოლოგიური შუილები
წარმოქმნილი ხმა. შუილი წარმოიქმნება სისხლის ტურბულენტული დინების გამო, გულში, ან გულთან ახლოს.
გულის შუილი შესაძლოა შეგვხვდეს დაბადებიდან (თანდაყოლილი) ან განვითარდეს მოგვიანებით. შუილი არ არის დაავადება, მაგრამ შესაძლოა იყოს გულის პრობლემის სიმპტომი.
ხშირად, გულის შუილი უვნებელია და მკურნალობას არ საჭიროებს. ზოგიერთი ტიპის შუილს სჭირდება გარკვეული გამოკვლევები, რათა დადგინდეს, რისი ნიშანია ეს სიმპტომი. მკურნალობა, თუ საჭიროა, მიმართულია გულის დაავადების, შუილის გამომწვევი მიზეზის აღმოსაფხვრელად.
არსებობს ორი ტიპის შუილი: უვნებელი შუილი და პათოლოგიური შუილი. უვნებელი შუილის მატარებელი ადამიანის გული ნორმალურად ფუნქციონირებს. ამ ტიპის შუილი ხშირია ახალშობილებსა და ბავშვებში.
პათოლოგიური შუილი ბავშვებში რაიმე პრობლემის მანიშნებელია, ძირითადად გულის თანდაყოლილი დაავადებების დროს. მოზრდილებში, პათოლოგიურ შუილს ყველაზე ხშირად გულის სარქვლოვანი დაავადებები იწვევს.
უვნებელი შუილი
უვნებელი შუილი წარმოიქმნება, როცა სისხლი უფრო სწრაფად მიედინება, ვიდრე ადრე. მდგომარეობები, რომლებიც სისხლის დინების აჩქარებას იწვევენ, ასევე შესაძლოა გამოიწვიონ უვნებელი შუილი. ესენია:
- ფიზიკური აქტივობა ან ვარჯიში;
- ორსულობა;
- ცხელება;
- ანემია;
- ჰიპერთიროიდიზმი– თიროქსინის მომატებული კონცენტრაცია სისხლში;
- სწრაფი ზრდის პერიოდები, მოზარდობა
უვნებელი შუილი შესაძლოა გაქრეს ან დარჩეს მთელი ცხოვრების მანძილზე, რაიმე პრობლემის გამოწვევის გარეშე.
პათოლოგიური შუილი
ბავშვებში პათოლოგიური შუილის ყველაზე ხშირი გამომწვევი მიზეზი გულის თანდაყოლილი დაავადებაა.
გულის თანდაყოლილი დეფექტების გავრცელებული ფორმებია:
- გულის კუნთში არსებული ხვრელები ან შუნტები. ძგიდის დეფექტი გულის კუნთში არსებული ხვრელია, რომელიც შეიძლება ქმნიდეს პრობლემას, ზომისა და მდებარეობის მიხედვით. გულის შუნტები ყალიბდება, როცა გულის საკნებს ან სისხლძარღვებს შორის პათოლოგიური კავშირია;
- გულის სარქველოვანი დაავადებები
პათოლოგიური შუილების სხვა გამომწვევი მიზეზებია ინფექციები და გულის სტრუქტურული დაზიანების გამომწვევი დაავადებები, რომლებიც უფრო მოზრდილებში გვხვდება:
- ენდოკარდიტი - ეს ინფექცია აზიანებს გულის შიდა ქსოვილებს, სარქველებს და გამოწვეულია ბაქტერიით ან სხვა მიკროორგანიზმით, სხეულის სხვა ორგანოდან, როგორიცაა პირის ღრუ;
- სარქვლის კალციფიკაცია - სარქველი შესაძლოა შევიწროვდეს, არ გაატაროს საკმარისი სისხლი და წარმოიშვას შუილიც;
- რევმატიზმი - რევმატიზმი საკმაოდ მძიმეა და ვითარდება, თუ სტრეპტოკოკალური ყელის ინფექციების ადეკვატური მკურნალობა არ მოხდა. რევმატიზმი აზიანებს საარქველებს და ხელს უშლის სისხლის ნორმალურ დინებას
თუ გაქვთ უვნებელი შუილი, სავარაუდოდ არ გექნებათ სხვა ასოცირებული ნიშნები და სიმპტომები.
პათოლოგიური შუილი ზოგჯერ არ იწვევს სხვა სიმპტომებსა და ნიშნებს და მხოლოდ პათოლოგიური ხმით გამოიხატება, რომელიც გულის მოსმენისას ისმის. თუ გაქვთ სხვა ასოცირებული ნიშნები და სიმპტომები, შესაძლოა ეს გულის დაავადებაზე მიანიშნებდეს:
- სუნთქვის უკმარისობა;
- ქრონიკული ხველა;
- კანის ლურჯი შეფერილობა, განსაკუთრებით თითებზე და ტუჩებზე;
- შეშუპება ან წონის უეცარი მომატება;
- გადიდებული ღვიძლი;
- გადიდებული კისრის ვენები;
- უმადობა და ზრდაში ჩამორჩენა (ჩვილებში);
- ჭარბი ოფლიანობა დატვირთვის გარეშე;
- ტკივილი გულმკერდის არეში;
- თავბრუსხვევა;
- გულის წასვლა
გულის შუილის უმეტესობა სერიოზულ პრობლემაზე შეიძლება არ მიანიშნებდეს, მაგრამ უმჯობესია ექიმის კონსულტაცია, იმის დასადგენად უვნებელია თუ არა ეს გამოვლინება და გჭირდებათ თუ არა გულის ფუნქციათა მეტი გამოკვლევა ან მკურნალობის დაწყება.