ვუმკურნალოთ თუ არა სარძევე კბილებს
ამ კითხვას ერთმნიშვნელოვანი პასუხი აქვს: დიახ, საჭიროა. უფრო მეტიც - აუცილებელია.
დაზიანებული სარძევე კბილი ბევრ უსიამოვნებას აყენებს პატარას - ტკივილს, დისკომფორტს ჭამის დროს; გარდა ამისა, ის წარმოადგენს ორგანიზმში მუდმივად არსებულ ინფექციის წყაროს და შესაძლოა, შინაგანი ორგანოების დაზიანებისა და მთელი ორგანიზმის ინტოქსიკაციის მიზეზადაც იქცეს, ამიტომ ძალიან მნიშვნელოვანია, ყურადღება მივაქციოთ ბავშვის პირის ღრუს და დროულად მივმართოთ ბავშვთა სტომატოლოგს.
ბავშვებს კარიესი ძალიან სწრაფად უვითარდებათ. იმას, რაც დიდებთან შესაძლოა წლობით გაგრძელდეს, ბავშვებთან რამდენიმე თვე, ზოგჯერ რამდენიმე კვირაც კი ჰყოფნის. მალევე ყალიბდება პულპიტი, რომელიც სერიოზულ მკურნალობას მოითხოვს.
სარძევე კბილები, მიუხედავად იმისა, რომ დროებითია, ძირითად კბილებზე არანაკლებ მნიშვნელოვანია ორგანიზმისთვის, ამიტომ ბავშვის კბილებს დროულად უნდა ვუმკურნალოთ, რომ მათი ნაადრევი ამოღება არ მოგვიხდეს. სარძევე კბილების შენარჩუნება მათ დროულ და ბუნებრივ მოცვლამდე თავიდან აგვაცილებს არასასურველ შედეგებს. მაგალითად, სრულფასოვანი ღეჭვის აქტის დარღვევას, რაც კუჭ-ნაწლავის დაავადებებს იწვევს. გარდა ამისა, კბილთა რიგის მთლიანობა უზრუნველყოფს სწორ მეტყველებას. კბილების ნაადრევ ამოღებას კი თანკბილვის დარღვევამდე მივყავართ.
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
საქმე ის არის, რომ სარძევე კბილები მუდმივი კბილებისთვის “იკავებს“ ადგილს. მათი ფესვების ქვეშ ძირითადი კბილების ჩანასახებია განლაგებული. ამიტომ ერთი სარძევე კბილის ამოღების შემთხვევაშიც კი ხდება სხვების შეცილება და მუდმივი კბილები ამოიჭრება არა იქ, სადაც ეკუთვნის, არამედ სხვაგან. ამრიგად, სარძევე კბილები, მიუხედავად იმისა, რომ დროებითია, მუდმივ ყურადღებას მოითხოვს.
უპირველესად,სათანადო ყურადღება უნდა დაეთმოს პირის ღრუს ჰიგიენას. კბილების გამოხეხვას ბავშვი პირველი კბილის ამოსვლისთანავე უნდა მივაჩვიოთ.
24 თვემდე ბავშვს კბილებს მშობელი უწმენდს. ყბის უკბილო ნაწილს ასუფთავებენ სპეციალური ჰიგიენური ხელსახოცით, რომელიც რბილია, აქვს სასიამოვნო გემო და გაჟღენთილია ბავშვისთვის უსაფრთხო, ქსილიტის შემცველი ხსნარით. მოგვიანებით ბავშვმა კბილები თავად უნდა გაიწმინდოს უფროსის მეთვალყურეობით, მისი ასაკისთვის განკუთვნილი კბილის ჯაგრისითა და პასტით.
ბავშვებისთვის არსებობს სპეციალური სითხეებიც პირის ღრუში გამოსავლებად. ეს სითხეები სხვადასხვა ასაკისთვის განკუთვნილი კონცენტრაციით შეიცავს სასარგებლო დანამატებს: ფთორს, ქსილიტოლს. ამგვარი სავლების გამოყენება კარიესის პროფილაქტიკის კიდევ ერთი საშუალებაა.
გაცილებით უკეთესია პროფილაქტიკური ვიზიტი სტომატოლოგთან, ვიდრე საქმე კბილის ამოღებამდე მივა. გარდა ამისა, პროფილაქტიკური გასინჯვა ბავშვს მიაჩვევს ექიმსა და მის ინსტრუმენტებს და მომავალში ამ პროცედურებისა აღარ შეეშინდება.
პირველი ვიზიტის დროს ბავშვი რომ არ შეშინდეს, წინასწარ დაათვალიერებინეთ სტომატოლოგიური ინსტრუმენტების კომპლექტი და მისთვის გასაგებ ენაზე აუხსენით ჩასატარებელი მანიპულაციების არსი. ფსიქოლოგიური მხარდაჭერისთვის სტომატოლოგიურ კაბინეტში ბავშვთან ერთად შეიძლება დარჩეს მშობელიც. სასურველია, სარძევე კბილების მკურნალობა ადგილობრივი გაუტკივარებით ჩატარდეს. ინექციის წინ ღრძილზე უსვამენ გამაუტკივარებელ ტკბილ გელს, მერე კი ბავშვისთვის შეუმჩნევლად შეჰყავთ წამალი.
სასურველია რამდენიმე მარტივი პირობის დაცვა:
- ნუ მიიყვანთ ბავშვს დიდების სტომატოლოგთან; ბავშვთა სტომატოლოგი უფრო ადვილად გამონახავს მასთან საერთო ენას.
- ნუ დაელოდებით პრობლემებს - მიიყვანეთ ბავშვი სპეციალისტთან უბრალო პროფილაქტიკური გასინჯვისთვის.
- ბავშვი სტომატოლოგთან უნდა მიიყვანოთ წელიწადში 2-ჯერ, აუცილებლობის შემთხვევაში - უფრო ხშირადაც.
- ნუ დააშინებთ ბავშვს თეთრი ხალათით, ნემსითა და ექიმით. სტომატოლოგიურ კლინიკაში ვიზიტის წინ არავითარ შემთხვევაში არ ახსენოთ ისეთი სიტყვები, როგორებიცაა, მაგალითად, „ნუ გეშინია“, “ნემსი”, “ბურღი”, “წამალი”, რომლებიც არათუ პატარას, დიდსაც კი საგონებელში ჩააგდებს.
