5 სიმპტომი, რომლებიც ღრძილების ანთების შესახებ მიგანიშნებთ
ღრძილების ანთება ის პრობლემაა, რომელსაც ბევრი სათანადო ყურადღებას არ აქცევს და მოგვიანებით ის საკმაოდ სერიოზულ გართულებებში გადაიზრდება ხოლმე.
ევროპის მოწინავე ინსტიტუტების მიერ ჩატარებულმა კვლევებმა ცხადყო, რომ ყოველი ათი ზრდასრული ადამიანიდან შვიდს აქვს პირის ღრუს რბილი ქსოვილების ანთება იგივე გინგივიტი. ღრძილების ანთების გამომწვევი მრავალი მიზეზი არსებობს, უპირველესად კი, პირის ღრუს არასრულფასოვანი ჰიგიენა. თითქოს ერთი შეხედვით მარტივი პრობლემის მოგვარებას სახლში, ხალხური მეთოდებით ცდილობენ, თუმცა რეალურად ეს უშედეგოა. მნიშვნელოვანია დროულად, დაავადების პირველივე სიმპტომების გამოვლენისთანავე მიაქციოთ მას ყურადღება, მიმართოთ კვალიფიციურ ექიმ პაროდონტოლოგს და მისი რჩევების შესაბამისად იმკურნალოთ.
იმისთვის, რომ სწორად მოვახდინოთ ღრძილების ანთების დიაგნოსტიკა და დროულად დავიწყოთ მისი მკურნალობა, საჭიროა ვიცოდეთ იმ სიმპტომების შესახებ, რომლითაც ეს დაავადება ხასიათდება. გაგაცნობთ დაავადების 5 მთავარ ნიშანს, რომლის აღმოჩენისთანავეც აუცილებელად უნდა მიმართოთ ექიმის.
ღრძილებიდან სისხლდენა
ღრძილებიდან სისხლდენა ღრძილების ანთების პირველი და ამავდროულად, ყველაზე გავრცელებული სიმპტომია. თავდაპირველად, სისხლდენა თავს იჩენს მხოლოდ კბილების გახეხვის დროს. მოგვიანებით კი სისხლდენა საკვების ღეჭვის დროსაც იწყება. ძალიან გართულებულ ეტაპზე ღრძილებიდან სისხლი შეიძლება სრულიად უმიზეზოდ, პროვოცირების გარეშეც წამოგივიდეთ.
უსიამოვნო სუნი
უსიამოვნო სუნი (იგივე ჰალითოზი) ბევრი დაავადების მანიშნებელი სიმპტომია. თუმცა ის ყველაზე ხშირად ღრძილების ანთებას ახასიათებს. დაავადების საწყის ეტაპზე უსიამოვნო სუნი დამახასიათებელია მხოლოდ დილით, საკვების მიღებამდე. გართულებულ შემთხვევაში კი შეიძლება ის მთელი დღის განმავლობაში გაგყვეთ.
სიწითლე
ღრძილების ანთების დროს ღრძილები ფერს იცვლის და წითლდება. რაც უფრო მწვავეა დაავადება, მით უფრო ფერშეცვლილია ღრძილები. თავიდან ეს შეიძლება მარტივად შესამჩნევი არ იყოს, თუმცა, თუ დააკვირდებით, აუცილებლად დაინახავთ ფერშეცვლილ ღრძილებს განსაკუთრებით იმ ზონებში სადაც პაციენტი უჩივის ტკივილს, შეშუპებასა და უსიამოვნო შეგრძნებას.
შეშუპება
დაავადების დროს ხშირად შუპდება ღრძილები, რაც შესამჩნევია ვიზუალურად და ასევე იგრძნობა შეხების დროს (მაშინ, როდესაც პაციენტი ეხება პირის ღრუს რბილი ქსოვილების ზედაპირს). შეშუპებულ ღრძილებს მარტივად იგრძნობთ ენით შეხებითაც. შეშუპებული ადგილები მტკივნეულია და ამიტომ, ხშირად მისი სათანადოდ გახეხვა/გასუფთავება ვერ ხერხდება. ეს კი თავის მხრივ იწვევს ბაქტერიების გამრავლებას, კლინიკური სურათის დამძიმებას და დაავადების კიდევ უფრო გამწვავებას.
კბილების მორყევა
თუ ღრძილების ანთების ზემოთ ხსენებულ სიმპტომებს დროულად არ უმკურნალებთ, ჯანმრთელი კბილები იწყებს მორყევას და ადგილის ცვლილებას კბილთა რკალში, რასაც საბოლოოდ ღეჭვითი ფუნქციის დარღვევამდე და შემდგომ კბილების დაკარგვამდე (ადენტია) მივყავართ.
ხანგრძლივად მიმდინარე ღრძილების ანთება იწვევს კბილის ირგვლივ მდებარე რბილი და მაგარი ქსოვილების დესტრუქციას, ყალიბდება პაროდონტული ჯიბე.
მაშინ, როდესაც არ ხდება ღრძილების ანთების მედიკამენტოზური მკურნალობა და პროცესი შეუქცევადად მიმდინარეობს, დროთა განმავლობაში ხდება კბილის ირგვლივ მდებარე საყრდენი ქსოვილების სრულ დაშლა, რასაც საბოლოოდ კბილების მორყევამდე მივყავართ, რაც შემდგომ მათ დაკარგვას იწვევს.