ეკა ჭავჭავაძე

გარემოს დაბინძურების პარალელურად წამოიჭრა.

სამწუხაროდ, წყალი, რომელიც ჩვენს ონკანებში მოედინება, სისუფთავითა და უსაფრთხოებით ყოველთვის ვერ დაიკვეხნის, ამიტომ უმჯობესია, საკუთარ ჯანმრთელობაზე თვითონვე ვიზრუნოთ და წყლის სპეციალური ფილტრები შევიძინოთ.

გახსოვდეთ: ფილტრის გაწმენდილი წყლის დიდხანს შენახვა არ შეიძლება. გაფილტრული წყალი ინახება არა უმეტეს 3 დღისა, ძლიერ სიცხეში კი მხოლოდ 24 საათს.

• ფილტრი

ფილტრის შეძენისას ზუსტად უნდა ვიცოდეთ, რისგან გვსურს თავის დაცვა: მიკრობებისგან, ბაქტერიებისა და ვირუსებისგან, მათი ცხოველქმედების შედეგად წარმოქმნილი ტოქსინებისგან, მძიმე ლითონთა იონებისგან, რომლებიც ასევე ძლიერ მავნებელია თუ ისეთი ორგანული ნაერთებისგან, როგორიც არის ქლოროფორმი, პესტიციდები, ფენოლები და ბენზოლი.

• დაქლორილი წყალი

ბევრს დაქლორილი წყალი უსაფრთხოდ მიაჩნია, რაც შეცდომაა. მართალია, ქლორი მავნე მიკროორგანიზმებს სპობს, მაგრამ ამავე დროს ქიმიურ რეაქციაში შედის წყალში გახსნილ ნივთიერებებთან და მავნე ნაერთებს ქმნის. მაგალითად, როდესაც წყალში არის ფენოლი, მისი ქლორთან დაკავშირების შემდეგ წარმოიქმნება ძლიერ შხამიანი ქლორფენოლური ნაერთები.

წყალში თავისუფალი ქლორის ნარჩენების შემცველობას იოლად ამხელს მკვეთრი სუნი. ასეთი წყალი ჯანმრთელობას ნამდვილად არ არგებს.

• წყლის ადუღება

წყლის გაწმენდისთვის არც ადუღებაა საკმარისი. ასეთ დროს ზოგიერთი (არა ყველა!) მიკროორგანიზმი მართლაც იღუპება, მაგრამ მძიმე ლითონთა მარილები რჩება, ხოლო სასარგებლო ნივთიერებები იშლება და მადუღარას კედელზე ილექება.

• წყლის გაწმენდის შინაური მეთოდები

სიამოვნებით გასწავლით საოჯახო მაგიის რამდენიმე რეცეპტს. ეს წყლის გაწმენდის ფრაქციული მეთოდია, რომელიც დამდგარ წყალში განსხვავებული სიმკვრივის ფრაქციათა სხვადასხვანაირ მდებარეობას ემყარება. თუ წყალს გამჭვირვალე ჭურჭელში ჩაასხამთ და 5-6 საათით დადგამთ, მაშინ ჭურჭლის ფსკერზე მოგროვდება ყველა მავნე შენაერთი, რადგან მათ დიდი ფარდობითი მასა აქვთ. ამის შემდეგ ჭურჭლის ზედა ფენებიდან წყალი რეზინის მილით ფრთხილად გადაასხით სხვა ჭურჭელში, ქვედა ფენა კი გადაღვარეთ.

წყლის გაწმენდის ფრაქციული მეთოდი განსაკუთრებით პრაქტიკულია აგარაკზე, სადაც არ ფუნქციონირებს ცენტრალური წყალმომარაგების სისტემა და მოსახლეობა სასმელად წყაროს ან ჭის წყალს იყენებს.

• გაყინეთ წყალი

ბევრს ჰგონია, რომ ამ მეთოდის გამოყენება მხოლოდ ზამთარში შეიძლება, როდესაც წყალი ბუნებრივად იყინება დაბალ ტემპერატურაზე. სინამდვილეში ზამთრამდე ლოდინი სულაც არ არის საჭირო. აიღეთ ჭურჭელი, აავსეთ წყლით და შედგით საყინულეში (ქვეშ ხის სადგამი ან სქელი მუყაოს ქაღალდი დაუდეთ). გაყინული წყალი გამოიღეთ, დადგით ოთახის ტემპერატურაზე და მის გადნობას დაელოდეთ.

ნაყინი წყალი ყველაზე სასარგებლოა გალღობიდან ერთ საათში, როცა მასში ჯერ კიდევ ტივტივებს ყინულის თხელი ფირფიტები. ხშირად წყალს კუბებად ყინავენ და ჩაიში, ცხელ წვნიანში ამატებენ.

• წმენდის ორმაგი ეფექტი

განსაკუთრებით სუფთა წყლის მიღების მსურველებს შეუძლიათ, წმენდის ორმაგი ეფექტი გამოიყენონ: მდგარი წყალი ჯერ ფრაქციულად გაწმინდონ, შემდეგ კი გაყინონ.

• რატომ არ არის მლაშე ზღვის გაყინული წყალი

ეს წყლის კიდევ ერთი საიდუმლოა: გაყინვისას წყალი არა მარტო დამახასიათებელ სტრუქტურას იძენს, არამედ მარილებისა და მათი მინარევებისგანაც თავისუფლდება. ჭურჭელში ჯერ სუფთა წყალი იყინება, შემდეგ კი - მისი მარილები და მინარევები. თუ მარილწყლიან ქილას საყინულეში სანახევროდ გაყინავთ, შემდეგ გაუყინავ სითხეს გადაღვრით და გაყინულს გაადნობთ, ნახავთ, რომ ის საერთოდ არ არის მლაშე. ასევეა ზღვის წყალიც: წყალი სუფთა, მარილიანი მინარევების გარეშე იყინება.

• მკვდარი ცოცხალი წყალი

როგორც უკვე მოგახსენეთ, ადუღებისას წყალი ყველა სასარგებლო მინარევს კარგავს, ამიტომ ანადუღარი წყალი მკვდარი სითხეა. თუმცა შესაძლებელია მისი ნაწილობრივ "გაცოცხლება", თუ რამდენიმე რჩევას გაითვალისწინებთ: ჩაი დალიეთ, ვიდრე ცხელია. რამდენიმე საათში იგი ყველა სასარგებლო თვისებას კარგავს.

თამამად შეგიძლიათ, დალიოთ ცხელი წყალი, რომელიც ეს-ესაა ადუღდება. კუჭ-ნაწლავის მოსალოდნელი გართულებები მხოლოდ მითია. სიფრთხილე გმართებთ აფთიაქში ნაყიდი გამოხდილი წყლის სმისას: მისი სისტემატური მიღება არ შეიძლება - ის არავითარ მინარევს არ შეიცავს, ამიტომ ორგანიზმიდან დიდი ოდენობით გამოაქვს საჭირო მარილები. თუმცა გამოხდილ წყალსაც აქვს ერთი უპირატესობა: ართრიტის, პოდაგრის და თირკმლის ზოგიერთი დაავადების დროს მეტად სასარგებლოა.