გოგირდი ჩვენს ორგანიზმში - რამდენად საყურადღებოა მისი დეფიციტი და სიჭარბე
გოგირდის ფხვნილი სუფთა სახით გარკვეულ პირობებში თვითაალებადია და წვისას შხამიან გაზებს წარმოქმნის, ნიტრატებთან, ქლორატებთან, პერქლორატებთან გარკვეული თანაფარდობით შერევისას კი ფეთქებად ნაერთს წარმოქმნის.
გოგირდი ჩვენს ორგანიზმში
გოგირდი ჩვენს ორგანიზმში ერთ-ერთი ყველაზე გავრცელებული ელემენტია. იგი შედის ნერვული ქსოვილის, სისხლის, ღვიძლის, კუნთების, მყესების, ხრტილის, ძვლის, შემადგენლობაში. უზრუნველყოფს საყრდენ-მამოძრავებელი სისტემის მდგრადობას.
ასევე, ცილის მოლეკულების ნორმალურ აგებულებას სწორედ გოგირდი უზრუნველყოფს, ჩართულია მრავალ მეტაბოლურ პროცესში.
შედის ამინომჟავების - მეთიონინის და ცისტეინის შემადგენლობაში.
მეთიონინი კი მონაწილეობს ადრენალინის, აცეტილქოლინის, ჰემოგლობინის სინთეზში, ვიტამინ B12-ის, ასკორბინისა და ფოლიუმის მჟავების, ჰორმონების, ფერმენტების ცვლაში. მეთიონინი უზრუნველყოფს მიკროელემენტ სელენის ბიოლოგიურ (იმუნიტეტის გამაძლიერებელ) ეფექტებს და მის ტრანსპორტირებას. მეთინიონს ფარისებრი ჯირკვლის ჰორმონი აქტიურ ფორმაში გადაყავს. უზრუნველყოფს შემაერთებელი ქსოვილის, თვალების, სისხლძარღვების კედლების ჯანმრთელობას.
ცისტეინი ხელს უწყობს კოლაგენის ფორმირებას და აუმჯობესებს კანის სტრუქტურას.
ცისტეინი შედის ძლიერი ბუნებრივი ანტიოქსიდანტის (გლუტათიონის) შემადგენლობაში, რომელიც ებრძვის თავისუფალ რადიკალებს. გლუტათიონი იცავს ღვიძლისა და ტვინის უჯრედებს ალკოჰოლის, ზოგიერთი სამკურნალო პრეპარატის, სიგარეტის კვამლის ტოქსიკური კომპონენტების დამაზიანებელი გავლენისგან.
გოგირდის დეფიციტის პირობებში ორგანიზმში საკმარისი გლუტათიონი ვეღარ წარმოქმნება, რის შედეგადაც, იზრდება ოქსიდაციური სტრესი და თავისუფალი რადიკალების მიერ ქსოვილების დაზიანების ხარისხი, რაც ზრდის დაავადებების განვითარების რისკს.
გოგირდს შეიცავს ცილით მდიდარი პროდუქტები:
- ხორცი;
- ზღვის პროდუქტები;
- პარკოსნები;
- კვერცხი;
- ყველი;
- რძე;
- იოგურტი;
- ხაჭო;
- თხილეული
გოგირდის დეფიციტის მანიშნებელი შესაძლოა იყოს სახსრების, კანის, ღვიძლის პათოლოგიები.
სხვა ნიშნებია:
- სისხლის მიმოქცევის დარღვევა;
- მტვრევადი თმა;
- მყიფე ფრჩხილები;
- დეპრესია
იმისათვის, რომ დეფიციტი აღმოიფხვრას საჭიროა რაციონში ცილოვანი და გოგირდის შემცველი პროდუტების დამატება.
გოგირდი, რომელსაც საკვები პროდუქტები შეიცავს, არ არის ტოქსიკური, თუმცა დაუშვებელია გოგირდის ჭარბი მოხმარება. გოგირდის სიჭარბის ერთ-ერთი მიზეზი კი პროდუქტებში კონსერვანტების(გოგირდშემცველი ნაერთების-სულფიტების) გამოყენებაა.
გოგირდის სიჭარბეს ახასიათებს შემდეგი სიმპტომები:
- თავის ტკივილი;
- თავბრუსხვევა;
- გულისრევა;
- საჭმლის მონელების დარღვევა;
- დიარეა;
- ზოგადი სისუსტე;
- ზედა სასუნთქი გზების დაავადებები;
- კანის ქავილი;
- თვალების ტკივილი;
- ცრემლდენა;
- წონაში კლება