მარიამ ფოლადაშვილი

ოფლის გამოყოფა ორგანიზმის ბუნებრივი პასუხია სხვადასხვა ფაქტორზე, როგორებიცაა ცხელი ამინდი, ფიზიკური აქტივობა, სტრესი, ბრაზი.

ჭარბი ოფლიანობა კი შესაძლოა დაფიქსირდეს ნებისმიერ დროს (მაგალითად გრილ ამინდში), ყოველგვარი მიზეზის გარეშე ან იყოს რაიმე მდგომარეობის (მენოპაუზა, ჰიპერთირეოდი) თანმდევი.

არსებობს ჰიპერჰიდროზის ორი სახე:

• ლოკალური (ადგილობრივი) - ამ დროს, ოფლი ჭარბად გამოიყოფა ძირითადად: ხელის და ფეხის გულების, იღლიის და სახის მიდამოში;
• გენერალიზებული სახე - ამ დროს, ჭარბი რაოდენობით ოფლი მთელს სხეულზე გამოიყოფა

ჰიპერჰიდროზი შესაძლოა იყოს პირველადი და მეორადი.

პირველადი ჰიპერჰიდროზის დროს ძირითადად გამომწვევი მიზეზის დადგენა ვერ ხერხდება, მას უმეტესად ლოკალური ხასიათი აქვს, ასევე შეიძლება ატარებდეს მემკვიდრეობით ხასიათს და ძირითადად დღის საათებში გამოიხატება

მეორადი ჰიპერჰიდროზი, როგორც წესი, კონკრეტული დაავადების სიმპტომს წარმოადგენს და უპირატესად გენერალიზებული ხასიათი აქვს.

მეორადი ჰიპერჰიდროზის გამომწვევი მიზეზი შესაძლოა გახდეს:

• ენდოკრინული პათოლოგიები (ჰიპერთირეოზი, სიმსუქნე, შაქრიანი დიაბეტი, ჰიპოგლიკემია);
• ნევროლოგიური დაავადებები;
• კალციუმის, რკინის, თუთიის, D ვიტამინის ნაკლებობა;
• გულის დაავადებები;
• თირკმელზედა ჯირკვლის ფუნქციების დარღვევა;
• ფილტვის დაავადებები;
• სხვადასხვა მედიკამენტი

ჰიპერჰიდროზის გამოვლინებებია:

• ბოლო 6 თვის განმავლობაში განსაზღვრული მიზეზის გარეშე ჭარბი ოფლიანობა;
• ჭარბი ოფლის დიდი რაოდენობით გამოყოფა, რომელიც ხელისშემშლელი ფაქტორია ყოველდღიური აქტივობის შესრულებისას.

ოფლიანობა შესაძლოა არ დაფიქსირდეს ღამით.

ჭარბი ოფლიანობა შესაძლოა იყოს სხვა სერიოზული დაავადების სიმპტომი. ამიტომ შემდეგი ნიშნების გამოვლენისთანავე აუცილებელია ექიმთან ვიზიტი:

• წონის კლება;
• ოფლიანობა ძილის დროს;
• ოფლიანობა, რომელსაც თან ახლავს ტემპერატურა, ტკივილი გულმკერდის არეში, სუნთქვის გაძნელება, გახშირებული გულისცემა;
• ოფლიანობა, რომელიც დიდი ხნის განმავლობაში გრძელდება;
• როდესაც, ჭარბი ოფლიანობა ხელს გიშლით ყოველდღიურ საქმიანობაში.

მკურნალობა

პირველადი ჰიპერჰიდროზის შემთხვევაში, ძირითადად, საჭიროა ჰიგიენის ნორმების გაძლიერება, ალუმინის ქლორიდის შემცველი ანტიპერსპირანტების და დეოდორანტების ხმარება, გამღიზიანებელ საკვებზე უარის თქმა.

მეორადი ჰიპერჰიდროზის დროს კი მკურნალობა ეფუძნება ძირითადი დაავადების მკურნალობას, შედეგად ოოფლის ჭარბი რაოდენობის გამოყოფაც მცირდება.