ლალი ჩხიკვაძე

მიუხედავად იმისა, რომ დატვირთული დღის განმავლობაში თვალების რამდენიმე წუთით დახუჭვა შეიძლება კარგი იდეა ჩანდეს, მნიშვნელოვანია გვახსოვდეს, რომ ძილს შეიძლება ჰქონდეს როგორც დადებითი, ასევე უარყოფითი ეფექტი. როდის და სად და რამდენ ხანს დაიძინებთ - ამ ყველაფერს აქვს მნიშვნელობა და შეიძლება მოგიტანოთ ან სარგებელი ან პრობლემები.

იფიქრეთ იმაზე, თუ რატომ გსურთ ძილი დღის განმავლობაში.

სანამ შუა დღეზე ტკბილ ძილს მიეცემით, დაფიქრდით რა არის სინამდვილეში თქვენი ძილიანობის მიზეზი? თუ წინა ღამეს მუშაობდით, ან გყავთ პატარა ბავშვი, დღისით ძილის სურვილი საკმაოდ გონივრულია.

თუმცა, თუ არც ერთი ეს ასე არ არის, მაგრამ გრძნობთ, რომ უბრალოდ არ შეგიძლიათ ნორმალურად ფუნქციონირება დღის განმავლობაში წაძინების გარეშე, მაშინ ეს შეიძლება მიუთითებდეს ჯანმრთელობის სერიოზულ პრობლემებზე და უნდა მიმართოთ ექიმს.

დღის ძილის უარყოფითი მხარეები

დღისით ცუდად ორგანიზებულ ძილს შეიძლება ჰქონდეს ორი ძირითადი უარყოფითი შედეგი:

1. "ძილის ინერცია"

• ჩვენ ვსაუბრობთ სიტუაციაზე, როდესაც ადამიანი, რომელსაც დღის განმავლობაში ეძინა, იღვიძებს დაბინდული თავით, მოთენთილ მდგომარეობაში, დეზორიენტირებული და ცუდ გუნებაზე. ეს შეიძლება იყოს პრობლემა, თუ ჯერ კიდევ გაქვთ სამუშაო დღის ბოლომდე.

2. ღამის ძილის პრობლემები

• ეს პრობლემები შეიძლება შეგექმნათ, თუ დღის განმავლობაში ძალიან დიდხანს გძინავთ ან ჩვეულებრივ ღამის ძილის წინ დაიძინებთ. თუ გაწუხებთ უძილობა ან გაქვთ ცუდი, არასრულფასოვანი ძილი ღამით, ხშირად იღვიძებთ, უმჯობესია თავი შეიკავოთ დღისით დაძინებისგან, რადგან ეს მხოლოდ აუარესებს მდგომარეობას.
• თუ ღამის ძილთან დაკავშირებული პრობლემები არ გაქვთ, მაშინ მათი განვითარების თავიდან ასაცილებლად, დღის ძილი ძალიან ხანმოკლე უნდა იყოს.

დღე ძილის სარგებელი

დღის განმავლობაში სათანადო ძილი უზრუნველყოფს ჯანმრთელობის ბევრ სარგებელს:

• აუმჯობესებს განწყობას;
• აჩქარებს რეაქციას;
• აუმჯობესებს მეხსიერებას;
• ზრდის ყურადღების კონცენტრაციის უნარს;
• მუხტავს ენერგიით;
• საშუალებას გაძლევთ დაისვენოთ და განიტვირთოთ დღის განმავლობაში.

როდის არის დაწოლისა და ძილის დრო?

• თუ გრძნობთ, რომ თქვენი ემოციური ან ფიზიკური ძალა იწურება;
• თუ დღე-ღამის განმავლობაში ძალიან ცოტა გეძინათ, მაგალითად იმიტომ, რომ გზაში იყავით ან მუშაობდით;
• თუ გადაწყვეტთ ძილი თქვენი ყოველდღიური რუტინის ნაწილად აქციოთ. ამ შემთხვევაში დაგეგმეთ თქვენი დღე ისე, რომ დაიძინოთ და გაიღვიძოთ ერთსადაიმავე დროს.

როგორ დავიძინოთ სწორად დღის განმავლობაში, რომ დღის ძილი იყოს ყველაზე ეფექტური

1. გამოყავით შეზღუდული დრო ძილისთვის. თუ გაბრუებული იღვიძებთ, ე.ი. ძალიან დიდხანს გეძინათ. დღის ძილის იდეალური ხანგრძლივობაა 15-30 წუთი.

2. დაგეგმეთ თქვენი დრო. იდეალურ შემთხვევაში, უმჯობესია დაიძინოთ სადილის შემდეგ, 14-დან 15 საათამდე, რადგან ამ დროს დიდი ალბათობით გეძინებათ და გაქვთ ცუდი კონცენტრაცია. გარდა ამისა, ამ პერიოდში ხანმოკლე ძილი უარყოფითად არ იმოქმედებს თქვენს ღამის ძილზე.

3. იპოვეთ მშვიდი, წყნარი, გრილი ადგილი დასაძინებლად მინიმალური განათებით. ძილის დროს არაფერმა უნდა გაგიტაცოთ, ამიტომ ამ 15-30 წუთის განმავლობაში უმჯობესია ტელეფონი გამორთოთ ან გადადოთ.

4. მიეცით საკუთარ თავს დრო, რომ გამოფხიზლდეთ, სანამ აქტიურ საქმიანობას დაუბრუნდებით. ამგვარად ძილის შემდეგ არ იგრძნობთ ყურადღების გაფანტვას და მოთენთილობას.