თინათინ გოცაძე

მაგრამ, მედიკამენტების საკვებ პროდუქტებთან შეთავსება­დობასაც რომ უნდა მიექცეს ყურადღება, ეს ბევრმა არ იცის. ამა თუ იმ სამკურნალო პრეპარატის მიღებისას ძალიან დიდი მნიშვნელობა აქვს საკვებ რაციონს, დღის განმა­ვლობაში საკვებად გამოყენებულ პროდუქტებსა და სითხეებს, ჩაის ვსვამთ, ყავასა თუ რძეს.

მკითხველის ყურადღებას რამდენიმე მნიშვნელოვან საკითხზე გავამახვილებთ:

• სამკურნალო პრეპარატებთან შეთავსების თვალსაზრისით ერთ-ერთი ყველაზე „სახიფათო“ პროდუქტი გრეიპფრუტი და მისგან მიღებული წვენია. სამწუხაროდ, დაფიქსირებულია გარდაცვალების ფაქტიც კი იმ ახალგაზრდა მამაკაცისა, რომელიც სისხლში ქოლესტერინის დონის დამაქვეითებელი პრეპარატის მიღების პარალელურად დღეში რამდენიმე ჭიქა გრეიპფრუტის წვენს სვამდა. როგორც ცნობილია, გრეიპფრუტი და მისი წვენი შეიცავს ღვიძლის ფუნქციობის რამდენადმე დამაქვეითებელ, მედიკამენტების ცალკეულ კომპონენტებად დაშლის შემაფერხებელ ნივთიერებებს. ძნელი მისახვედრი არ არის, რომ სამკურნალო საშუალებათა დაშლის შეფერხება, შესაბამისად, ორგანიზმში მათი გავრცელების პროცესსაც აფერხებს. ამის შედეგად კი სამკურნალო წამლის ჰიპერდოზირება (გადაჭარბება) ხდება. მაგალითად, თუ ადამიანი იღებს არტერიული წნევის დამაქვეითებელ პრეპარატს და იმ დღესვე დალევს გრეიპფრუტის წვენს, ხელს შეუწყობს წამლის დოზის გაორმაგებას. გრეიპფრუტს ვერ „ეწყობიან“ ანტიბიოტიკები, სიმსივნის საწინააღმდეგო საშუალებები, საგულე პრეპარატები და სხვა მრავალი მედიკამენტი. დღეისათვის ამ სიაში 50-ზე მეტი დასახელების პრეპარატია.
• მედიკამენტების მიღებისას ფრთხილად უნდა გამოვიყენოთ რძეც. ეს უკანასკნელი კოფეინის შემცველი პრეპარატების მოქმედებას ანეიტრალებს. რძესთან შეუთავსებელია ანტიბიოტიკები, ასკოფენი, ციტრამონი. რძე გარკვეულწილად შემაფერხებელია რკინის შემცველი პრეპარატებისთვის.
• მწარე აბების მიღებისას ადამიანები მათ ხშირად ტკბილ გაზიან სასმელს ან უბრალოდ მინერალურ წყალს აყოლებენ. ეს ყოვლად დაუშვებელია. მედიკამენტებს მხოლოდ წყალი უნდა მივაყოლოთ. არავითარ შემთხვევაში გაზიანი სასმელი! ნახშირორჟანგი ხომ ცვლის მედიკამენტების მჟავიანობას და ე. ი. მათ თვისებებს. გაზიან სასმელებზე ბევრად ნაკლებ უარყოფით გავლენას ახდენს ჩვეულებრივი წვენების მიყოლება. თუმცა არც მათი გამოყენებაა რეკომენდებული მედიკამენტის მისაღებად. წვენები აქვეითებენ ანტიბიოტიკების, ნო-შპის აქტივობას, აძლიერებენ სოკოს საწინააღმდეგო პრეპარატების ტოქსიკურობას. წვენებისადმი „მეგობრული დამოკიდებულებით“ გამოირჩევა პოლივიტამინური კომპლექსები და რკინის პრეპარატები. როდესაც აღნიშნულ საშუალებებს წვენებს აყოლებენ, ორგანიზმში მათი შეწოვა უმჯობესდება.
• წამლის მოქმედების ეფექტურობა მხოლოდ იმაზე კი არ არის დამოკიდებული, რა სახის სასმელს ვიღებთ დღის განმავლობაში, უშუალოდ რას ვაყოლებთ მედიკამენტს, არამედ იმაზეც, თუ რა სახის საკვებს ვჭამთ დღის განმავლობაში, რა პროდუქტებითაა წარმოდგენილი ჩვენი საუზმე, სადილი და ვახშამი. დიდი მნიშვნელობა აქვს საკვები რაციონის შემადგენლობას და რაოდენობას. მაგალითად, იმისათვის, რომ A ვიტამინი დროულად და სათანადოდ შეითვისოს ორგანიზმმა, საკვები რაციონი ცხიმებით უნდა გავამდიდროთ. ასეთივე საკვები რეკომენდებულია მეტრონიდაზოლის, სისხლის შედედების დამაქვეითებელი პრეპარატებისა და ტრანკვილიზატორების მიღებისას. ამასთან, არ უნდა დაგვავიწყდეს, რომ ცხიმიანი საკვები აქვეითებს თირკმლის ინფექციების სამკურნალოდ განკუთვნილი პრეპარატების მოქმედებას. ტუბერკულოზის სამკურნლოდ გამოყენებული პრეპარატი – იზონიაზიდი „ვერ ეწყობა“ მარილიან და მჟავე პროდუქტებს. სამაგიეროდ, ცილებით მდიდარი საკვები მასთან კარგად „ურთიერთქმედებს“. ჭიების საწინააღმდეგო პრეპარატების მიღებისას უნდა გვახსოვდეს, რომ მათი მოქმედების ეფექტურობას ცხიმებითა და შაქრებით მდიდარი საკვები აქვეითებს.
• ხილი, ბოსტნეული და კენკროვნები მეტად სასარგებლო და უვნებელ საკვებადაა მიჩნეული. თუმცა ზოგიერთ შემთხვევაში მათ შეიძლება გარკვეული საფრთხე შეუქმნან ორგანიზმს. მაგალითად, საკმარისია, ჰიპერტონიული დაავადების მქონე პირმა მარწყვის ან შავნაყოფიანი ცირცელის წვენი მიიღოს, რომ მას არტერიული წნევა მკვეთრად დაუქვეითდება. ეს იმიტომ ხდება, რომ მარწყვიც და ცირცელიც სისხლძარღვთა გამაფართოებელ ნივთიერებებს უხვად შეიცავს. ბოლოკი, ბოლოკურა, კომბოსტო (თეთრთავიანი), მწვანე სალათი მდიდარია ისეთი ნივთიერებებით, რომლებიც ფარისებრი ჯირკვლის ჰორმონთა გავლენას ასუსტებს.
• ისპანახი, მჟაუნა და სხვა მწვანე ბოსტნეული მდიდარია K ვიტამინით, რომელიც ხელს უწყობს სისხლის შედედებას. ამიტომაც მათი გამოყენება არ არის რეკომენდებული იმ შემთხვევაში, თუ ადამიანს სისხლძარღვებში თრომბების წარმოქმნის შემაფერხებელი პრეპარატები აქვს დანიშნული. ათეროსკლეროზის სამკურნალო საშუალებებთან ერთად ხილისა და ბოსტნეულის მიღება კი, პირიქით, სასარგებლოა. ამ შემთხვევაში საკვებ რაციონში განსაკუთრებით აუცილებელია კიტრის, პომიდვრის, სტაფილოს, ჭარხლისა და კომბოსტოს ჩართვა, რათა ორგანიზმმა წარმატებით შეძლოს ქოლესტერინის სათანადო რაოდენობის შეთვისება და წიდების გამოდევნა. ჰომეოპათიური საშუალებების გამოყენებისას არ არის რეკომენდებული ყავის, სპირტიანი სასმელების, პიტნის ნაყენის, სუნელებით შეზავებული კერძების, არომატიზატორებითა და საღებავებით გაჯერებული საკვების მიღება.
• მცენარეული ნაყენებისა და ნახარშების უმრ­ავლესობა ჭამამდე უნდა მიიღოთ. ჭამის შემდეგ, ჩვეულებრივ, ინიშნება ის მედიკამენტები, რომლებიც კუჭის ლორწოვან გარსს აღიზიანებს – მეტრონიდაზოლი, ინდომეტაცინი, ანტიბიოტიკების უმრავლესობა, სტეროიდები. იმისათვის, რომ ამ პრეპარატების მავნე მოქმედება განეიტრალდეს, მათ ბრინჯის ნახარშს აყოლებენ. ნაღველმდენი მცენარეული საშუალებებისა და მადისაღმძვრელი პრეპარატების მიღება ჭამადე 15-20 წუთით ადრეა რეკომენდებული, საჭმლის მომნელებელი ფერმენტებისა – კვების დაწყებისთანავე, პოლივიტამინებისა კი – ჭამის პროცესში.