ოქროსფერი სკუმბრიის ტაჟინა
300 გ პომიდორი, 400 გ კარტო-ფილი, 1 ცალი ფორთოხალი, ნახევარ-ნახევარი კონა ქინძი, ოხრახუში და თავშავა, 100 გრამი უკურკო ზეთისხილი, 1 ჩაის კოვზი ძირა, 4 კბილი ნიორი, 1 ჩაის კოვზი მიხაკი, 3 სუფრის კოვზი ლიმონის წვენი, 3 სუფრის კოვზი ზეთი, თითო ცალი ყვითელი და მწვანე ბულგარული წიწაკა, 100 გ ნაღების კარაქი.
ქინძი, ოხრახუში და თავშავა დაარჩიეთ, დარეცხეთ და წვრილად დაჭერით. ასევე წვრილად დაჭერით ზეთისხილი. დასრისეთ ძირა. 3 ცალი პომიდორი დამდუღრეთ, გაფცქვენით, სათითაოდ გაჭერით შუაზე, თესლი ამოაცალეთ, რბილობი დაჭერით კუბებად. ეს ყველაფერი აურიეთ ერთმანეთში, დაამატეთ დაკეპილი ნიორი, დაფქვილი მიხაკი, ლიმონის წვენი, 2 სუფრის კოვზი ზეთი და კარგად აურიეთ.
სკუმბრია კარგად გარეცხეთ, გაასუფთავეთ, მოაყარეთ მარილი, მუცელი ამოუვსეთ სუნელებისა და მწვანილის ნარევით (ნარევის ნახევარი მოიტოვეთ) და დაჭერით. 250 გ პომიდორი გარეცხეთ და რგოლებად დაჭერით. კარტოფილი გარეცხეთ, გათალეთ და ისიც რგოლებად დაჭერით. ასევე დაჭერით გაფცქვნილი ფორთოხალი. ბულგარული წიწაკა გარეცხეთ, გული ამოუღეთ და მსხვილად დაკეპეთ.
ღუმელი 180 გრადუსამდე გაახურეთ. ფორმას ან ღრმა ტაფას წაუსვით 100 გ ნაღების კარაქი, ფენა-ფენა ჩააწყვეთ თევზი, კარტოფილი, პომიდორი, თითოეულ ფენას მოაყარეთ მწვანილისა და სუნელების ნარევი. მოასხით 1 სუფრის კოვზი წყალი და 1 სუფრის კოვზი ზეთი და 40 წუთით შედგით ღუმელში.
ექიმის კომენტარი
მაროკოული სამზარეულო არომატებით მდიდარი და მრავალფეროვანია. ტაჟინა ამ ქვეყნის ერთ-ერთი ყველაზე პოპულარული კერძია. ის თიხის ქოთნებში მზადდება. მიირთვით სადილად, მიაყოლეთ ერთი ნაჭერი პური და აუცილებლად დააყოლეთ ხილის ახალგამოწურული წვენი.
პომიდვრის ნამცხვარი
9 ულუფა,
თითოეული - 380 კკალ
ცილები - 11 გ,
ცხიმები - 29 გ,
ნახშირწყლები - 19 გ
საჭიროა:
ნამცხვრისთვის - 100 გ ყველი, 4 კვერცხი, 200 გ ფქვილი, 100 გ ნაღების კარაქი, 8 მოზრდილი პომი-დორი, 150 გ არაჟანი, 100 გ ნაღები, გახეხილი ჯავზი, მარილი, შავი პილპილი; სალათისთვის - 2 კონა მჟაუნა, 5 სუფრის კოვზი ძმარი, ნახევარი ფორთოხლის წვენი, 4 სუფრის კოვზი ზეითუნის ზეთი.
75 გ ყველი გახეხეთ. ერთი კვერცხის ცილა და გული გააცალკევეთ. ფქვილისგან, ნაღების კარაქისგან, ცილისგან, ყველისა და მწიკვი მარილისგან მოზილეთ ცომი, შეახვიეთ პოლიეთილენის პარკში და 30 წუთით შედეთ მაცივარში. პომიდორი გარეცხეთ, გააშრეთ და თხელ რგოლებად დაჭერით. აურიეთ ერთმანეთში ნაღები, არაჟანი, სამი კვერცხი (მთლიანად), ერთი კვერცხის გული და კარგად ათქვიფეთ.
შეაზავეთ მარილით, პილპილით და ჯავზით. გაახურეთ ღუმელი 200 გრადუსამდე. ცომი გააბრტყელეთ, დააფინეთ ცხიმწასმულ თუნუქის ფურცელზე და ოდნავ აუმაღლეთ გვერდები. ზემოდან მოაწყვეთ პომიდვრის ნაჭრები, მოასხით ნაღები და შედგით ღუმელში. 35 წუთის შემდეგ ღუმელი გამორთეთ და ნამცხვარი კიდევ 5 წუთს დატოვეთ შიგნით. მჟაუნა გაარჩიეთ, გარეცხეთ და გააშრეთ. აურიეთ ერთმა-ნეთში ძმარი, ფორთოხლის წვენი, მარილი და პილპილი, დაამატეთ ზეითუნის ზეთი. დარჩენილი ყველი გახეხეთ, აურიეთ მჟაუნაში და მოასხით ფორთოხლისა და ძმრის ნარევი.
ექიმის კომენტარი
პომიდვრის ნამცხვარი შესანიშნავია დილით, ფინჯან ჩაისთან ერთად. შეგიძლიათ, სადილზეც მიირთვათ დესერტის ნაცვლად. ის მოგცემთ ენერგიას და ორგანიზმისთვის საჭირო ნივთიერებათა მარაგს შეგივსებთ. აუცილებლად მიაყოლეთ ზემოთ მოყვანილი რეცეპტით მომზადებული სალათი.