ხუმრობა და სიცილი როგორია გონივრული ფლირტი
პოტენციური პარტნიორის იუმორის გრძნობას აფასებენ. ხანგრძლივი ურთიერთობისთვის მნიშვნელოვანია რესურსების გაზიარებისა და პასუხისმგებლობის აღების დემონსტრირებაც.
ფლირტი არის ქცევა, რომელიც მიმართულია პოტენციურ პარტნიორთან საწყისი კონტაქტის დასამყარებლად, ან უფრო რომანტიკული ან სქესობრივი კონტაქტისკენ ბიძგი. ამასთან, კონკრეტული მოქმედება და პარტნიორის დამოკიდებულება შეიძლება განპირობებული იყოს სქესით, ასაკით, კულტურით და სხვა ფაქტორებით.
რა სურთ ქალებს ან მამაკაცებს პოტენციური პარტნიორისგან? ამის გარკვევას შეეცადნენ ნორვეგიის საბუნებისმეტყველო და ტექნიკური მეცნიერებების უნივერსიტეტის ფსიქოლოგები ამერიკელ კოლეგებთან ერთად.
ფლირტი მოიცავს სხვადასხვა სიგნალს, რომლებსაც ადამიანები ერთმანეთს უგზავნიან. ეს იმისათვის კეთდება, რომ პოტენციური პარტნიორის ყურადღება მიიქციონ და მიაღწიონ მასთან სექსუალურ ან რომანტიკულ ურთიერთობებს.
ფლირტის ტაქტიკა შეიძლება დავყოთ ვერბალურად (სიყვარულის ახსნა, გულახდილი საუბარი) და არავერბალურად (მიმიკა, ყურადღების გამოჩენა საჩუქრებით, ჩაცმის მანერით, ცეკვითა და ა.შ.). ზოგიერთი ტაქტიკა, მაგალითად, სიყვარულის ახსნა, არის მოვალეობებისადმი მზადყოფნის აღიარება, სხვები კი – საკუთარი სხეულის დემონსტრაცია.
მეცნიერები ვარაუდობდნენ, რომ მნიშვნელოვანი ფაქტორი იქნებოდა პოტენციური პარტნიორის შესაბამისობა სილამაზის მიღებულ სტანდარტებთან. მაგრამ, როგორც აღმოჩნდა, ეს პრაქტიკულად არ არის მნიშვნელოვანი. ფლირტის ყველაზე მნიშვნელოვანი ელემენტი აღმოჩნდა იუმორის გრძნობა.
ქალები უპირატესობას ანიჭებენ მხიარულ და გულუხვ მამაკაცებს. მამაკაცებისათვის კი მნიშვნელოვანი აღმოჩნდა ქალების მხრიდან საკუთარი სექსუალობის დემონსტრირება და მათ ხუმრობებზე სიცილი.
ქალებმა, რომლებსაც ხანგრძლივი რომანი სურთ, მამაკაცს უნდა აჩვენონ საკუთარი გულუხვობა, კეთილშობილება და პასუხისმგებლობის აღებისთვის მზადყოფნა.
იგივე შეიძლება ითქვას მამაკაცებზე. ხანგრძლივი ურთიერთობისათვის კაცი მზად უნდა იყოს პასუხისმგებლობის ასაღებად.
მამაკაცები, საზოგადოდ, უფრო დადებითად არიან განწყობილნი ისეთი სახის კონტაქტისადმი, როგორიცაა ჩახუტება, მეგობრული კოცნა. ქალები კი – არც ისე დადებითად იმის მიმართ, როდესაც კაცი გადადის ფიზიკურ ურთიერთობაზე იმ შემთხვევაში, თუ მას ხანგრძლივ პარტნიორად განიხილავს.
პირად თემებზე საუბარი უფრო მნიშვნელოვანია ქალებისათვის, განსაკუთრებით, ხანგრძლივი ურთიერთობის დაგეგმვისას.
ნებისმიერ შემთხვევაში ურთიერთობა უნდა დაიწყოს ღიმილით და მხედველობითი კონტაქტით. და თუ პარტნიორი ფლირტის საპასუხოდ მზადყოფნას ამჟღავნებს, შესაძლებელია უფრო მჭიდრო ურთიერთობაზე გადასვლა.