გარდერობის 7 ნივთი, რაც შვებულებაში უნდა წაიღოთ, რომ ზედმეტი ძალისხმევის გარეშე ელეგანტურად გამოიყურებოდეთ - მკურნალი.გე

ლალი ჩხიკვაძე

თხელი პერანგი

ზაფხულში და განსაკუთრებით კურორტზე, ბუნებრივი მასალის ტანსაცმელი სხეულისთვისაც სასიამოვნოა და რაც მთავარია, არ გაგაოფლიანებთ. ამიტომ შეელიეთ სინთეტიკურ სამოსს და გადადით ბამბისა და ტილოს ტანსაცმელზე.

ცხელ ამინდში იდეალურია ბამბის ქსოვილისგან დამზადებული პერანგი, ის არა მხოლოდ მოდურია, ჰაერის ცირკულაციასაც უზრუნველყოფს. ყოველდღიური ჩაცმულობისთვის თეთრი პერანგი შეუხამეთ შორტებს ან ჩინოსებს, ან თეთრ შარვალსა თუ ჯინსს.

მოკასინები

ზაფხულში ზღვაზე ყოფნისას სანაპიროზე სეირნობა კომფორტული და პრაქტიკული ფეხსაცმლის გარეშე, რა თქმა უნდა, შეუძლებელია. ფეხის ოფლიანობისა და დაღლილობის თავიდან ასაცილებლად, თან საიმედო მოკასინი იქონიეთ.

სამაჯური

მსუბუქი ტყავის სამაჯური, ვერცხლის დეკორატიული ელემენტებით, ნებისმიერ ჩაცმულობას უფრო საინტერესოს ხდის და არც განსაკუთრებულად თვალშისაცემია. მასიური სამკაულები კი მხოლოდ გარკვეულ სტილს მიესადაგება. ამიტომ, თუ ჯერ კიდევ არ ხმარობთ სამკაულებს, ზაფხული საუკეთესო დროა, სცადოთ მათი გამოყენება.

საცურაო შორტები

ტრუსები და შორტები, რა თქმა უნდა, შესანიშნავია, მაგრამ ასეთი მოდელები ყველას არ უხდება, რომ აღარაფერი ვთქვათ იმ ფაქტზე, რომ მას ვერსად ჩაიცვამთ აუზის გარდა. კლასიკური საცურაო შორტებით კი არა მხოლოდ ბანაობა და მზის აბაზანის მიღება შეგიძლიათ, არამედ პლაჟის ბარში სიარული, მხრებზე მოგდებულ მაისურთან ან პერანგთან ერთად. არ დაიზაროთ მაღაზიაში წასვლა და სასურველი მოდელის მოზომება: ის სწორად უნდა იყოს მორგებული, არც მჭიდრო, არც განიერი.

თუ ყოველდღიური სამოსის შემთხვევაში ბევრი ერიდება და სიფრთხილით ეკიდება პრინტებს, საცურაო შორტებთან დაკავშირებით თავი არ უნდა შეიზღუდოთ.

ჩანთა

შოპერი ამ სეზონზე ყველაზე პოპულარული მამაკაცის ჩანთაა. ეს ეხება არა მხოლოდ ყოველდღიურ, არამედ პლაჟის სტილსაც. ბამბის ეს მოდელი მოსახერხებელი ჯიბით, რომელიც იტევს პირსახოცს, მზისგან დამცავ საშუალებას, წიგნს, სათვალეს და სხვა აუცილებელ ნივთებს, ყველაზე პრაქტიკული აქსესუარია საზაფხულო გარდერობში. თუმცა, ეს უბრალო ჩანთა არაერთხელ გამოგადგებათ ქალაქში: ის ჰარმონიულია არა მხოლოდ შორტებსა და მაისურებთან, არამედ ტილოს კოსტიუმთანაც.

ტილოს შარვალი

შვებულებაშიც კი მხოლოდ შორტებითა და საცურაო სამოსით სიარული შეუძლებელია, ამიტომ გარდერობში უნდა იქონიოთ ისეთი ტანსაცმელი, რომლითაც საღამოს რესტორანში წასვლას შეძლებთ. ამ სიტუაციაში, ტილოს თავისუფალი შარვალი დაგეხმარებათ.

მზისგან დამცავი სათვალე

ეს არა მხოლოდ შვებულების კოსტიუმის მთავარი დეტალია, საზოგადოდ, საზაფხულო გარდერობისაც. დიზაინერები უსასრულო ექსპერიმენტებს ატარებენ ჩარჩოებზე და აფორმებენ მათ სხვადასხვა დეკორით. შესაბამისად, თქვენც თავისუფლად შეგიძლიათ შეარჩიოთ თქვენი სახის ფორმას მისადაგებული სათვალის სასურველი მოდელი.