ქალი, განწყობა და ფერები...
მისი დაკვირვება დადასტურდა და დღეს ამ კანონზომიერებას ფსიქიატრიულ პრაქტიკაშიც კი იყენებენ: საგანგებოდ მოწყობილ კლინიკებში დეპრესიულ ავადმყოფებს ნარინჯისფრად განათებულ ოთახში ათავსებენ, ხოლო მეტისმეტად აღგზნებულებს - ცისფრად განათებულში. განათების ფერი მხოლოდ ემოციების წყარო როდია; ექსპერიმენტულად დამტკიცებულია მისი გავლენა ადამიანის მოძრაობის ბუნებრივ ტემპზე. მაგალითად, წითელი განათების დროს ტემპი უფრო სწრაფია, ვიდრე ლურჯის დროს. ფერი მოქმედებს ადამიანის კუნთურ ძალაზეც: თბილი განათებისას დინამომეტრის მაჩვენებლები უფრო მაღალია, ვიდრე ცივი ფერებით განათებისას.
ქალები განსაკუთრებით ემოციურები და მგრძნობიარენი არიან ფერთა მიმართ, განსაკუთრებით ტანსაცმლის, აქსესუარების, ინტერიერის ფერების შერჩევის დროს. ქალთა უმრავლესობა ასეთია.
ნაირფერი ინტერიერი
თუ ბინაში რემონტს გადაწყვეტთ, გირჩევთ, კედლები ფერთა თერაპიის სპეციალისტთა რეკომენდაციების შესაბამისად შეღებოთ.
- ცივი, ბაცი ტონები, ცისფერის ან ბაცი იისფერის ტიპისა, შეესატყვისება დასვენებას, მოდუნებას, ასეთი ფერები მიზანშეწონილია საწოლი ოთახისთვის.
- ბაცი ყვითელი ადამიანს ყურადღების კონცენტრირებასა და გონების მოკრებაში ეხმარება. ასეთი ფერით კარგი იქნება კაბინეტის, ასევე ბავშვის ოთახის შეღებვა. უკიდურეს შემთხვევაში, იმ კუთხისა მაინც, სადაც ბავშვი მეცადინეობს.
- გარგარისფერი ხსნის დაძაბულობას და ქმნის კომფორტის, უსაფრთხოების განცდას. ის იდეალურია სასტუმრო ოთახისთვის.
- შეღებეთ ნარინჯისფრად სამზარეულო და თქვენთვის ყოველი დილა მზიანი და ნათელი იქნება.
დღესასწაული იქნება!
წითელი, ყვითელი, ოქროსფერი, ვარდისფერი, იასამნისფერი... რაც უფრო მეტია ფერი, მით უფრო მხიარული იქნება დღესასწაული. ალბათ, ეს თქვენც შეგიმჩნევიათ. ამიტომ თქვენი ან ოჯახის რომელიმე წევრის დაბადების დღეს ოთახი ფერადი ბუშტებით მორთეთ, წვეულების შემდეგ კი ისინი სტუმრებს გაატანეთ, რომ ზეიმი მათთვისაც გაგრძელდეს.
არტთერაპია
გიყვართ ხატვა? მაშინ არტთერაპია ნამდვილად მოგეწონებათ. არის შემთხვევები, როცა უეცრად შფოთვა და პანიკა გეუფლებათ? ამ არასასიამოვნო გრძნობას თავი რომ დააღწიოთ, არტთერაპიის სეანსი ჩაიტარეთ: აიღეთ ფურცელი, ფერადი ფანქრები ან აკვარელის საღებავები, დახუჭეთ თვალები, ეცადეთ წარმოიდგინოთ, რა ფერისაა თქვენი განწყობილება. დაინახეთ? მაშინვე აიღეთ ამ ფერის ფანქარი ან ჩააწეთ ფუნჯი ასეთივე ფერის საღებავში და დახატეთ ყველაფერი, რაც თავში მოგივათ: ლაქები, გეომეტრიული ფიგურები, ადამიანები - მნიშვნელობა არ აქვს. მთავარია, ნეგატიური ემოციებისგან გათავისუფლდეთ.
ფერადი სუნთქვა
ტიბეტში მკურნალობის ერთ-ერთი სახეა “ფერადი მედიტაცია”. შეგიძლიათ, თქვენც სცადოთ:
- იმისთვის, რომ თავი ბედნიერად იგრძნოთ, წარმოიდგინეთ, რომ ჩაისუნთქეთ ნარინჯისფერი სურნელი, ხოლო ამოისუნთქეთ ლურჯი.
- თვითშეფასების ასამაღლებლად “ჩაისუნთქეთ” იისფერი სურნელი და “ამოისუნთქეთ” ყვითელი.