ევას შთამომავლები
გულუბრყვილო ლამაზმანი - მისკენ ყოველთვის გატაცებით ილტვიან ძლიერი სქესის წარმომადგენლები. მას არაფერი აინტერესებს, გარდა ჩაცმა-დახურვისა, გართობისა და სიამოვნებისა. მამაკაცებს აღაფრთოვანებთ ასეთ ქალებთან ურთიერთობა, რადგან იმედი აქვთ, მათ ფონზე საკუთარი ინტელექტით უფრო მეტად გაიბრწყინებენ. განსაკუთრებით ახალგაზრდები ვერ აცნობიერებენ, რომ ქალი, რომელიც თავდაპირველად მათ აღფრთოვანებას იწვევს, ქორწინების მეორე დღესვე ტვირთად იქცევა - ქმარმა მის ნაცვლად უნდა იფიქროს, მიიღოს გადაწყვეტილება და სისრულეშიც თავადვე მოიყვანოს.
ძლიერი ქალი - სწორედ მასზეა ნათქვამი, ცხენიან კაცს ძირს დასცემსო. იგი ძლიერი და ამტანია. სწრაფად პოულობს თავისზე სუსტ მამაკაცს. ენერგიულია, თავდაუზოგავად შრომობს და ქმარს საკუთარი ძალით აშინებს. მასზე ალერსიანი და მომხიბვლელი ნამდვილად არ ითქმის, ამიტომ ყველაზე უკეთ ასევე შრომისმოყვარე მამაკაცს ეწყობა, რომელსაც მასავით ნაკლებად აინტერესებს "სექსუალური თამაშები".
შინაური კატა - ქალია, რომელზეც აღტაცებით საუბრობენ ნებისმიერი ასაკისა და პროფესიის მამაკაცები. მას სახლი ყოველთვის მოწესრიგებული აქვს, შესანიშნავი მზარეულია, სამაგიეროდ, უსუსურია სახლის გარეთ. თავის რჩენა არ შეუძლია. მამაკაცები მას აფასებენ იმ კომფორტისა და მყუდროებისთვის, რომელსაც სახლში ქმნის და თუ საშუალება აქვთ, გულუხვადაც ასაჩუქრებენ.
მტაცებელი - ასეთი ქალის გვერდით დიდხანს ვერ ჩერდებიან. ის მამაკაცისგან ყოველთვის მორჩილებას მოითხოვს. იმდენად ჭკვიანია, რომ თავდაპირველად მისი ამოცნობა ძნელია. მხოლოდ ფულისა და ძვირფასი საჩუქრების დანახვაზე დნება. სექსუალური გარეგნობის მიუხედავად, სექსუალობით არ გამოირჩევა და არც პარტნიორისგან ითხოვს ბევრს, მთავარი საფულის სისქეა.
მორცხვი და თავმდაბალი - მამაკაცების იდეალია, ქალი, რომელსაც ფულის შოვნაც შეუძლია, სადილის მომზადებაც და სახლის მოწესრიგებაც. იგი თავს ივიწყებს გაჭირვებაში ჩავარდნილი საყვარელი მამაკაცის გადასარჩენად, ყველაფერს პატიობს: ლოთობას, სხვა ქალებთან ურთიერთობას, ჩხუბს... ღვრის ცრემლებს და ელის, როდის სთხოვენ პატიებას, რომ მყისვე აპატიოს.
თამამი და თავისუფალი - მას არ გააჩნია კომპლექსები, საკმაოდ უშიშარი და მედგარია, ბევრს ეწევა და სვამს, სიყვარულზეც არასდროს ამბობს უარს. არც საკუთარ თავზე ზრუნავს და არც გვერდით მყოფებზე. თავყრილობებსა და წვეულებებზე ყურადღების ცენტრშია. სოლიდურ მამაკაცებთან ურთიერთობისას ფიასკოს განიცდის. მიდრეკილია მავნე ჩვევებისადმი. კარგი მეგობარია, მაგრამ ცუდი ცოლი და დედა.
საქმიანი ქალი - ასეთ ქალს არა მხოლოდ თავისი სამყოფი, არამედ მთელი ოჯახის სარჩენი ფულის შოვნა შეუძლია. ის საქმიანია, ენერგიული, ერუდირებული და, რაც მთავარია, დამოუკიდებელი. ზოგჯერ - საკმაოდ კარგი მზარეულიც, მაგრამ მოუცლელობის გამო სამზარეულოში იშვიათად ტრიალებს. ზოგჯერ საქმე მეუღლესა და შვილებსაც კი ავიწყებს, თუმცა გარკვეული ხნის შემდეგ აცნობიერებს, რომ ფულით ბედნიერებას ვერ იყიდის, ამიტომ შინაურ კატად ან მორცხვი ტიპის ქალად ტრანსფორმირდება.
გამოუსწორებელი ცრუპენტელა - ასეთი ქალების ორი ტიპი არსებობს. ერთნი თავის მოსაწონებლად ცრუობენ, მეორენი კი მაშინაც ტყუიან, როცა მათი სიცრუე აშკარაა. ისინი ყველაზე ადვილად აღვიძებენ მამაკაცში ოტელოს.
გოგონათა ტიპები
პროვოკატორი - განზრახ იწვევს კონფლიქტს შეყვარებულთან, ისეთი ვაჟები მოსწონს, რომლებიც არ ეთანხმებიან და მორჩილებას აიძულებენ. ხიბლავს "ნამდვილი მამაკაცის" მძიმე ხელის შეგრძნება.
მამიკოს გოგო - უზრუნველი გოგონა, რომელიც უფროსი ასაკის მამაკაცებს ამჯობინებს, რადგან მათში მამას ეძებს. ზოგჯერ მხოლოდ სიყვარულს ითხოვს, ზოგჯერ - სიმდიდრესა და უზრუნველ ცხოვრებას. ბავშვობიდანვე ფუფუნებას მიჩვეულს ერთი სანუკვარი მიზანი აქვს - მეუღლემ მის გამო ყველაფერი დათმოს. ხშირად მეუღლისგან არარეალურს ითხოვს.
გოგონა-გვირილა - ქალური, მორცხვი, რომანტიკული. წერს ლექსებს. ცხოვრებას ვარდისფერი სათვალით უყურებს და სწამს ნამდვილი სიყვარულისა და ერთგულების საზღაურად მიღებული ბედნიერი მომავლისა. მისთვის თავბრუს დახვევა ძალიან ადვილია, ასევე ადვილია მისი გულის დამსხვრევაც.
ქალაბიჭა - გოგონა, რომელშიც მამაკაცური სჭარბობს ქალურს. ადვილად გადააქვს განცდები და განშორება, მამაკაცი მხოლოდ იმისთვის სჭირდება, რომ შვილები ჰყავდეს.
გოგონა-დედა - მკვეთრად აქვს გამოხატული დედობრივი ინსტინქტი. დედობის იდეა ბავშვობიდანვე არ ანებებს თავს. უყვარს დალაგება, წესრიგის დაცვა, შეყვარებულზე ისე ზრუნავს, როგორც შვილზე. არის შესანიშნავი დედა და ერთგული მეუღლე, თუმცა ზოგჯერ ოდნავ მოსაწყენი ხდება.
ბიზნესლედი - ცხოვრების თანამგზავრს ინტერესების მიხედვით ირჩევს. მისთვის რომანტიკა სამსახურებრივი რომანებია. პრაგმატული, პრაქტიკული და ეგოისტია, სექსიც კი მხოლოდ საქმისთვის სურს, იშვიათად უჩნდება ჭეშმარიტი გრძნობა.