ნანა კალანდაძე

ამიტომ ახალ წელს, როცა სუფრასთან საზეიმოდ ჩაცმულ-დახურულ-შეღებილ-დავარცხნილი ოჯახის წევრები იკრიბებიან, მე სარკეში ჩახედვისაც მეშინია. როგორ მოვიქცე, რომ მეც კომფორტულად ვიგრძნო თავი?

ახალი წლის წინა დღეებში საქმეს რა გამოლევს: საჩუქრების ყიდვა, სახლის დალაგება, სადღესასწაულო ვახშმის მომზადება... და ხშირად ქალს საკუთარი თავისთვის დრო აღარც კი რჩება. მაგრამ თუ გსურთ, ლამაზად გამოიყურებოდეთ, ხელს ვერაფერი შეგიშლით, თანაც ამ საოცარი დღესასწაულის წინ ადამიანს თითქოს მეორე სუნთქვა ეხსნება...

რით დავიწყოთ?

ყველაფერს აჯობებს, თუ დღეს კონტრასტული შხაპით დაიწყებთ. ის ენერგიით აგავსებთ, ხოლო კანს სინორჩესა და ელვარებას შესძენს. სასურველია, პილინგიც ჩაიტაროთ, მით უმეტეს, თუ გულამოღებული კაბის ჩაცმას აპირებთ. კანის მკვდარი უჯრედების მოსაცილებლად არსებობს სპეციალური სამურველი, თუმცა შეგიძლიათ გამოიყენოთ ასეთი რეცეპტიც: მაწონს ან არაჟანს შეურიეთ მარილი, წაისვით მთელ სხეულზე და თბილი წყლით ჩამოიბანეთ. შემდეგ ტანზე თაფლი წაისვით (რა თქმა უნდა, თუ ალერგია არ გაქვთ), ორიოდე წუთი მოიცადეთ, რომ ოფლი მოგივიდეთ, შემდეგ კი ჩამოიბანეთ. ამ პროცედურის შემდეგ კანი აბრეშუმივით დარბილდება და განაზდება. მომდევნო ეტაპი სახის მოვლაა. მოსინჯეთ უმარტივესი კოსმეტიკური საშუალებები:

* თოვლის ან ყინულის კომპრესი - თოვლი ან ყინული ხელსაწმენდში გაახვიეთ და დაახლოებით 8 წუთით დაიდეთ სახეზე. ნუ დაივიწყებთ ქუთუთოებს, ღაბაბს და ყელს. ამ პროცედურისთვის საუკეთესო დრო დილაა. ცივი კომპრესის წყალობით კანი ხასხასა და გლუვი გახდება და სასიამოვნო ვარდისფერს მიიღებს.

კომპრესამდე კი ორთქლის მარტივი ნიღაბი უნდა გაიკეთოთ: აიღეთ რბილი პირსახოცი, მისი შუა ნაწილი მდუღარე წყლით დაასველეთ და ფრთხილად დაიდეთ სახეზე. როცა პირსახოცი გაცივდება, სახე თხელი ხელსახოცით შეიშრეთ და დამატენიანებელი კრემი წაისვით. შეშუპებულ უპეებს ვერავითარი კოსმეტიკა ვერ უშველის. უმჯობესია, ასე მოიქცეთ: თვალებქვეშ წაისვით არაჟანი, 15 წუთით დაიტოვეთ, შემდეგ კი ცივი წყლით ჩამოიბანეთ. გამოგადგებათ ჩაიც, თუმცა შეშუპების დასაცხრობად კი არა, არამედ დაქანცული ფეხების დასასვენებლად - მათ ხომ დიდი დატვირთვა ელით. ჩაასხით თასში თბილი წყალი და ჩაამატეთ საშუალო სიმაგრის ჩაის ნაყენი. ასეთი აბაზანა შესანიშნავად ხსნის დაღლილობას და არბილებს ფეხის გაუხეშებულ ქუსლებს. დღეს განსაკუთრებით მოდურია ფრანგული პედიკიური: ფრჩხილები ვარდისფერი რომ გამოჩნდეს, მათი ბოლოები თეთრი ლაქით დაიფარეთ, ზემოდან კი ვარდისფერი ან გამჭვირვალე ლაქი გადაისვით. როცა საახალწლო სამზადისი დამთავრდება, წესრიგში მოიყვანეთ ხელები, დაიმუშავეთ ფრჩხილები და გადაისვით ლაქი. დაბოლოს, შესანიშნავი იქნება, თუ წვეულების დაწყებამდე რამდენიმე წუთით თვალს მოატყუებთ. კონტრასტული შხაპისა და ნიღბის შემდეგ ვარცხნილობასა და მაკიაჟს მიხედეთ.

* უპირველეს ყოვლისა, დაიბანეთ თავი. რა თქმა უნდა, იცით, რომ შამპუნი თმის ტიპის მიხედვით უნდა შეარჩიოთ.

* წაისვით და ჩამოიბანეთ ბალზამ-კონდიციონერი (გირჩევთ, შამპუნიცა და ბალზამიც ერთი და იმავე ფირმისა შეარჩიოთ).

* ისხურეთ (ან წაისვით - ფორმის შესაბამისად) ვარცხნილობის დამაფიქსირებელი საშუალება.

* ვარცხნილობამ დიდხანს რომ გაძლოს, მიიფრქვიეთ თმის ლაქი.

ვიდრე თვალების მაკიაჟს შეუდგებოდეთ, ქუთუთოებზე გადაისვით ფონი და თითით თანაბრად გაანაწილეთ. ახლა შეგიძლიათ თვალის ჩრდილი წაისვათ. ამისთვის ძალიან მოხერხებულია მსხვილი ფუნჯი. ფანქარი ფრთხილად წაისვით, რათა კონტური არც ფართო იყოს და არც წამწამების სიგრძეს აჭარბებდეს. ტუში ორ ფენად უნდა წაისვათ. დაელოდეთ, ვიდრე პირველი კარგად გაშრება და მხოლოდ ამის შემდეგ გადაისვით მეორე. პატარა ეშმაკობა, რათა `გამომწვევი~ ტუჩების ეფექტი მიიღოთ: ფანქრით შემოხაზეთ კონტური ორივე ტუჩის ირგვლივ, მერე კი ზედა ტუჩის შუაში სამკუთხედი დაიხატეთ. ძალიან მოხერხებულია ტუჩის საცხის წასმა ფუნჯით, როგორც პროფესიონალი ვიზაჟისტები იქცევიან. ქვედა ტუჩსა და ზედა ტუჩის სამკუთხედზე პომადის ძირითადი ტონი წაისვით, ტუჩების დანარჩენი ნაწილი კი უფრო ბაცი ფერის სადაფისებრი პომადით დაიფარეთ. დასასრულ გადაისვით მბზინავი ფენა. ის უფერული უნდა იყოს, რათა მოცულობის ეფექტი არ დაიკარგოს. გაითვალისწინეთ: მწვანე და თაფლისფერ თვალებს იასამნისფერი და წითელი ფერის ჩრდილი მეტ გამომსახველობას შესძენს. ცისფერ თვალებს შეიძლება ყვითელი და მოწითალო-მოყავისფრო ჩრდილებით გავუსვათ ხაზი. ქერა ქალბატონებს ძალიან მოუხდებათ მოვარდისფრო პომადასთან შეხამებული მუქი რუხი და მოწთალო-მოყავისფრო ტონები. წაბლისფერთმიანებს შოკოლადისფერი გამის ფერები უხდებათ, წითურებს - მუქი მწვანე და მუქი რუხი. შავთმიან ქალებს ძალიან შვენით თვალის მოყავისფრო ჩრდილები, ვარდისფერი და ატმისფერი ტუჩების საცხი. თვალები უფრო დიდი და მეტყველი გამოჩნდება, თუ ქუთუთოზე მუქ ჩრდილებს წაისვამთ, ხოლო წარბებს ქვემოთ - უფრო ბაცს. ძალიან ეფექტურია ერთი ფერის გამაში გადაწყვეტილი მაკიაჟი (პომადა, ფერ-უმარილი, თვალის საღებავი). თუ ყველა რჩევას გულდასმით შეასრულებთ, საახალწლო ვახშამზე იდეალურ ფორმაში იქნებით.