დრომ საჩვენოდ რომ იმუშაოს
მოხდენილი ადამიანის სტრატეგია
გსურთ, თავიდან აიცილოთ წონასა და ჯანმრთელობასთან დაკავშირებული პრობლემები? - მიიღეთ პოლივიტამინების კომპლექსები მაკრო და მიკროელემენტებით. საქმე ის არის, რომ ორსულობის, მშობიარობის, სტრესისა და დიეტის დროს მათი მარაგი მცირდება. იზრუნეთ კუნთთა მასის მომატებაზე. კვირაში სამჯერ 5-5 წუთი დაუთმეთ ძალისმიერ ვარჯიშებს, ხოლო 15 წუთი - კარდიოვარჯიშს. 8 კვირის შემდეგ ფიზიკური აქტივობა 20%-ით მოიმატებს, ხოლო კუნთური ძალა - 25%-ით.
მოძრაობა თქვენი ცხოვრების მნიშვნელოვან კომპონენტად უნდა იქცეს. თუ უპირატესობას მიანიჭებთ მშვიდ საქმიანობას, მაგალითად, გასეირნებას, ეცადეთ, სწრაფ ტემპში მაინც ისეირნოთ. გამხდარი ხართ და ამიტომ არ მისდევთ სპორტს? ძალიანაც ცდებით! ფიზიკური პასიურობა კუნთური და ძვლოვანი მასის დაკარგვამდე და ნივთიერებათა ცვლის გაუარესებამდე მიგიყვანთ. გამხდარი ზარმაცუნები ვერც კი ამჩნევენ, როგორ ლაგდება მათ სხეულში ცხიმი. მუცლისა და თეძოების მიდამოებში თუ არა, შინაგანი ორგანოების ირგვლივ და კანქვეშ. არავითარ შემთხვევაში არ გამოტოვოთ კვება.
საკვების რეგულარული მიღება ნივთიერებათა ცვლის ერთსა და იმავე დონეზე შენარჩუნებას უწყობს ხელს. ორსულობა სულაც არ გახლავთ მოდუნების საბაბი. არსებობს ფიტნესის ნაირსახეობანი, რომლებსაც ორსულებმაც შეიძლება მისდიონ. განსაკუთრებით სასარგებლოა ცურვა. სპორტული დატვირთვა ზრდის შანსს, მომავალმა დედამ მშობიარობის შემდეგ სწრაფად დაიბრუნოს ქალიშვილობის დროინდელი წონა, მაგრამ ვარჯიშის დაწყებამდე აუცილებლად გაიარეთ კონსულტაცია ექიმთან!
35-დან 45 წლამდე
ამ დროს ნივთიერებათა ცვლა შენელებულია, ცხიმოვანი ქსოვილის შემცველობა იზრდება, ხოლო ნაკლებმოძრავ ცხოვრების წესს კუნთთა მასის შემცირებისკენ მივყავართ. 10 წლის განმავლობაში შესაძლოა ორი ზომითაც კი მოვიმატოთ.
მოხდენილი ადამიანის სტრატეგია
შენელებული ნივთიერებათა ცვლის საკომპენსაციოდ კვირაში 3-ჯერ 20-25 წუთი დაუთმეთ აერობულ და ძალისმიერ ვარჯიშებს. თუ ორივე ერთად მიუწვდომელია, სჯობს, არჩევანი ძალისმიერ ვარჯიშებზე შეაჩეროთ. მათი წყალობით დაწვავთ წუთში 10 კალორიას, წაახალისებთ კუნთებს და ისინიც, თავის მხრივ, კალორიების დაწვაში დაგეხმარებიან. ისწავლეთ საკუთარი თავის მართვა. უნდა გქონდეთ განცდა, რომ სავსებით ფლობთ საკუთარ თავს. საამისოდ შეგიძლიათ მიმართოთ იოგას ან მედიტაციას. ეს განტვირთვის არაჩვეულებრივი საშუალებებია.
ამოიღეთ მენიუდან მავნე პროდუქტები - კრემიანი ნამცხვრები, შოკოლადი, ცხარე საწებლები, სოსისი, შებოლილი ხორცი და თევზი. მიირთვით ბევრი ხილი, ბოსტნეული, მწვანილი, დაღერღილი ხორბლის პური, თევზი და ფრინველის ხორცი. ნუ დაიზარებთ, თქვენივე ხელით მოიმზადეთ ხილის წვენები, ხილისა და ბოსტნეულის სალათები. ეს გაახალისებს კანს, მოაწესრიგებს კუჭ-ნაწლავის მოქმედებას, აგავსებთ ენერგიით, გამოგიკეთებთ განწყობილებას. გარდა ამისა, ასეთი რაციონის წყალობით ორგანიზმს არასდროს მოაკლდება საჭირო ნივთიერებები, ვიტამინები, ყოველივე ეს კი ჯანმრთელი ცხოვრების საწინდარია.
ყოველდღე არანაკლებ 10 წუთი დაუთმეთ გაწელვას. ამ დროს კუნთებში ხდება სისხლის მოზღვავება, იზრდება სისხლძარღვების სიმტკიცე და მოქნილობა, რაც, თავის მხრივ, სისხლის მიმოქცევას აუმჯობესებს და სასიცოცხლო პროცესების მწყობრ მიმდინარეობას უწყობს ხელს. ასეთი ორგანიზმი დიდხანს ინარჩუნებს ჯანმრთელობას და ახალგაზრდობას.
სასარგებლო საშუალება
რას აღარ აკეთებენ ქალები ავადსახსენებელი ჭარბი წონის მოსაშორებლად. ყველამ როდი იცის, რომ საუკეთესო გასახდომი საშუალებაა უჯრედისი, რომელიც ჯანმრთელობისთვის ზიანის მიუყენებლად აქვეითებს მადას. უჯრედისით მდიდარია ხილი, ბოსტნეული, ქატო, მარცვლეული, კაკალი, ყავისფერი ბრინჯი. უჯრედისს მაქსიმალური ოდენობით (44%-ს) შეიცავს ქატო. კარგი იქნება, თუ ცოტაოდენს დაუმატებთ ხორცეულს, თევზეულს, ფაფებს.