ფრთხილად, ბავშვია!
სამზარეულო
სამზარეულო ყველაზე საშიში ადგილია, ამიტომ საუკეთესო საშუალებაა კარი, რომელიც ძალზე მჭიდროდ იხურება ან საერთოდ იკეტება. მაშინაც კი, როცა ბავშვი სამზარეულოში თქვენთან ერთადაა, აუცილებელია განსაზღვრული წესების დაცვა. არ მოადუნოთ ყურადღება არც ერთი წუთით, განსაკუთრებით იმ შემთხვევაში, როცა გაზქურა ჩართულია. არ მოხადოთ ქვაბს თავი, როცა ხელში პატარა გიჭირავთ. ცხელი ქვაბი გაზქურის უკანა ნაწილში დადეთ, რათა ბავშვისთვის მიუწვდომელი იყოს. წვეტიანი და მჭრელი ინსტრუმენტები, რომელთაც ხშირად ვხმარობთ სამზარეულოში, ბავშვის თვალს უნდა მოაფაროთ. ზედა თაროზე გადაიტანეთ წვრილი საგნები (თხილი, კანფეტი), რათა მცდელობის მიუხედავად, პატარა ვერ მისწვდეს. ასე დარწმუნებული იქნებით, რომ ისინი უეცრად თქვენი ბავშვის პირის ღრუში არ აღმოჩნდებიან და მოხრჩობის საშიშროებას არ შეუქმნიან. მაგიდასთან ბავშვთან ახლოს არ დადგათ ჩაიდანი ან ჭიქა ცხელი წყლით. გახსოვდეთ, რომ სუფრაზეც უნდა თქვათ უარი, რადგანაც პატარა ერთ წამში მოახერხებს, ის ჭურჭელთან ერთად იატაკზე აღმოჩნდეს. დამალეთ სარეცხი საშუალებები. ეცადეთ ბავშვის ყურადღება არ დაფიქსირდეს საშიშ საგნებზე, სამაგიეროდ, შეგიძლიათ შესთავაზოთ კოვზი. საკუთარი მნიშვნელობა რომ იგრძნოს პატარამ, სთხოვეთ დახმარება სუფრაზე კოვზებისა და ხელსახოცების დალაგებაში.
აბაზანა
აბაზანა ერთ-ერთი ყველაზე საყვარელი ადგილია. იქ ხომ შეიძლება იბანაო, იწუწაო, გაერთო... მართალია, ეს ძალიან კარგია, მაგრამ აბაზანის ოთახში ყოფნა სასიამოვნოსთან ერთად უსაფრთხოც უნდა იყოს. ბანაობისას პატარა უყურადღებოდ წუთითაც არ უნდა დატოვოთ. აბაზანაში რომ არ დაეცეს, სასურველია სპეციალური რეზინის ხალიჩა დაუგოთ, ხოლო კედელზე სახელური დაამაგროთ.
აუცილებლად შეამოწმეთ დაგროვილი წყლის ტემპერატურა სპეციალური თერმომეტრით. თქვენმა ხელმა შეიძლება უცებ ვერ იგრძნოს, რომ წყალი ცხელია, რაც დამწვრობისა და ბანაობის მიმართ უარყოფითი განწყობის მიზეზი გახდება. მოზრდილთათვის გამიზნული შამპუნები, კრემები, საპარსები, ფენი და მსგავსი საგნები პატარასთვის მიუწვდომელი უნდა იყოს.
ოთახი, რომელშიც ცხოვრობთ
ყველა ფანჯარა დაცული უნდა იყოს, კარგად იკეტებოდეს, რათა ბავშვმა მისი გაღება ვერ შეძლოს. ღია ფანჯარასთან ბავშვის მარტო დატოვება დაუშვებელია. ყურადღება მიაქციეთ ჩამრთველებს. დაამაგრეთ მათზე სპეციალური დამხშობი, რათა ბავშვმა ვერ შეძლოს რაიმეს ჩართვა. პატარასთვის მიუწვდომელ ადგილას შეინახეთ ელექტროდამაგრძელებელი. იმ შემთხვევაშიც კი, როცა თქვენი კოსმეტიკა სავსებით უსაფრთხოა, მისი ადგილი რაც შეიძლება მაღლა და ბავშვისგან შორს მოძებნეთ. წინააღმდეგ შემთხვევაში ნუ გაოცდებით, როცა ახალგარემონტებული ბინის კედლებზე თქვენი ძვირფასი პომადით შესრულებულ ნახატებს დაინახავთ. ტაბლეტები, რომელთაც ბავშვი სხვადასხვა ფერის ლამაზ ბურთებად აღიქვამს, უმალვე იპყრობენ ყურადღებას. ბავშვი სწრაფად აღმოაჩენს მსგავსებას კანფეტებთან და დაუყოვნებლივ უსინჯავს გემოს. ეს რომ არ მოხდეს, უსიტყვოდ მოგიწევთ შესრულება რჩევისა - "შეინახეთ მედიკამენტი ბავშვებისთვის მიუწვდომელ ადგილზე". სასურველია, თუ საოჯახო აფთიაქის ყუთს ბოქლომით ჩაკეტავთ. ნურასდროს ეტყვით ბავშვს (წამლის იოლად დალევის მიზნით), რომ კანფეტს სთავაზობთ, წინააღმდეგ შემთხვევაში პატარას განუმტკიცდება რწმენა, რომ წამალი სასწაულმოქმედი კანფეტია.
სათამაშო მოედანი
უსაფრთხო სივრცის შექმნაზე ზრუნვა მხოლოდ სახლში როდია საკმარისი. ეზოში ბავშვის მხიარულმა თამაშმა მხოლოდ სიამოვნება რომ მოგანიჭოთ, ყურადღება მიაქციეთ შემდეგ ფაქტორებს:
პატარები ეზოში ცალკე უნდა თამაშობდნენ. მათსა და ზედმეტად აქტიურ უფროსი ასაკის ბავშვებს შორის აუცილებლად უნდა იყოს დისტანცია. სამწუხაროდ, სათამაშო მოედანზე არცთუ იშვიათად შეიძლება შევნიშნოთ შუშის ნამსხვრევები, ლითონის წვეტიანი საგნები, ცარიელი ბოთლები თუ სხვა სახის ნაგავი. ამის გათვალისწინებით გირჩევთ მიაქციოთ ყურადღება, როგორ გარემოში თამაშობს ბავშვი და მასაც ასწავლეთ, რომ სისუფთავის დაცვა აუცილებელია.
ყველაზე მთავარი
გახსოდეთ, რომ ბავშვის ცნობისმოყვარეობა, რაც მშობლების შეშფოთებას იწვევს, მანკიერი თვისება კი არ არის, არამედ მისი "გასვლაა" სამყაროში, განვითარების ეტაპია. ყველა მშობელს სურს, პატარა დაიცვას ნებისმიერი უმნიშვნელო უსიამოვნებისგანაც კი. ეს სავსებით ბუნებრივია და შვილზე ზრუნვის ერთ-ერთი ფორმაა. თუმცა ნებისმიერი მშობელი აცნობიერებს, რომ შეუძლებელია შვილი გაზარდო მცირე ტრავმის, მაგალითად, დაზიანებული მუხლის თუ დალურჯებული წვივის გარეშე. მთავარია გვახსოვდეს, რომ "ჯობს თავი დავიცვათ, ვიდრე ვუმკურნალოთ".