მამას ყველაფერი შეუძლია
მატერიალურად უზრუნველმყოფელია. მან რეგულარულად უნდა მიიტანოს სახლში ”მამონტი”. ის აგებს პასუხს საგარეო ურთიერთობებზეც.
მნიშვნელოვანია არა მხოლოდ ის, რას აკეთებს მამა ოჯახის გარეთ, არამედ ისიც, რას აკეთებს შინ. უპირველეს ყოვლისა, მას ეკისრება ტიპური მამაკაცური საზრუნავი: დაჭედება, შეკეთება, ტვირთის აწევა, სპორტული თამაშების, მოგზაურობის, ქალაქგარეთ დასვენების ორგანიზება... სასურველია, ეს ყველაფერი ბავშვების თვალწინ მოხდეს. ამგვარად მათ გაუჩნდებათ დაცულობის განცდა, მამის იმედი და მისდამი ნდობა.
გარდა ამისა, ეს არაჩვეულებრივი მაგალითია ბავშვისთვის: ბიჭუნები სწავლობენ, როგორ გახდნენ მამაკაცები, უყალიბდებათ მამაკაცური თვისებები და ჩვევები, ხოლო გოგონები იღებენ მამაკაცთან ურთიერთობის გამოცდილებას. ამიტომ მამამ მუდმივად უნდა აკონტროლოს თავისი ქცევა, ვაჟთან უფრო მეგობრული, მამაკაცური ურთიერთობა და დამოკიდებულება ჰქონდეს, ხოლო გოგონას მიმართ უფრო ლმობიერი, თბილი და ფაქიზი იყოს. ასეთივე დამოკიდებულება უნდა ჰქონდეს მეუღლესთან, რათა დედ-მამის სანიმუშო ურთიერთდამოკიდებულება შვილებისთვის მისაბაძ მაგალითად იქცეს. დიდი მნიშვნელობა აქვს იმასაც, როგორ იქცევა დედა. სწორედ მან უნდა მისცეს მეუღლეს საშუალება, სათანადოდ წარმოაჩინოს საკუთარი თავი მამის როლში. დედას შეუძლია და უნდა დაეხმაროს კიდეც ქმარს, რომ მან ოჯახში ღირსეული ადგილი დაიკავოს.
ანდეთ მამას მეტი საქმე
ბევრ ქალს ჰგონია, რომ მხოლოდ მან იცის ბავშვების მოვლა და აღზრდა, ამიტომ გამუდმებით აკრიტიკებს მეუღლის ქმედებას. ასეთი დამოკიდებულება მამაკაცს უკარგავს თავდაჯერებას და ბავშვებთან ურთიერთობის სურვილს. არც ბავშვისთვის არის სასარგებლო მამის კრიტიკის მოსმენა. როგორც არ უნდა უყვარდეს მამას შვილი, არ უნდა ველოდეთ, რომ ის ზუსტად დედასავით მოიქცევა. ცოლმა უნდა მისცეს მას საშუალება, რაღაც მაინც გააკეთოს ისე, როგორც თვითონ სურს და შეუძლია - გააკეთოს მამაკაცურად.
გაინაწილეთ პასუხისმგებლობა
დახმარებას ყველა ქალი ელის, მაგრამ ყველა როდია მზად იმისათვის, რომ ქმარს ბავშვის გამო პასუხისმგებლობა გაუნაწილოს. ურჩევნია, ყველა საკითხი მარტომ გადაწყვიტოს. ამას ხელს უწყობს ფართოდ გავრცელებული აზრი იმის შესახებ, რომ მამაკაცს არ ესმის, რას ეუბნებიან ექიმი და მასწავლებელი, აუცილებლად რაღაც შეეშლება, რამეს აურევს... მაგრამ მამა ხომ ადეკვატური ადამიანია. ესე იგი, მას შეუძლია, იტვირთოს პასუხისმგებლობა საკუთარ შვილზე. პასუხისმგებლობის განაწილება ნიშნავს ერთად განიხილოთ ბავშვის პრობლემები და მიიღოთ მნიშვნელოვანი გადაწყვეტილებები. თუ ქალი მეუღლის აზრს გაითვალისწინებს, აღარ მოუწევს ხელების მტვრევა და ქმრისთვის ამ სიტყვების თქმა: ”შენ არ მონაწილეობ ბავშვის ცხოვრებაში!”
თავი დააღწიეთ ილუზიებს
ხშირად მამისადმი პრეტენზიებს საფუძვლად უდევს შეუსაბამობა მის საქციელსა და დედის მიერ გამოგონილ ”იდეალური” მამის ხატს შორის. ასეთ ქალებს მოკრძალებით შევახსენებთ, რომ იდეალური ადამიანები არ არსებობენ, კარგი მამები კი ერთმანეთს არ ჰგვანან. ბავშვისთვის წიგნის კითხვა ღლის? სამაგიეროდ მზად არის, უსასრულოდ გამოიგონოს საინტერესო ისტორიები და ზღაპრები. დიდ დროს ატარებს სამსახურში? სამაგიეროდ, მის ცოლ-შვილს შეუძლია, ისარგებლოს უამრავი სასარგებლო ნივთით.
გაინაწილეთ მოვალეობები
ხშირად მამაკაცს არ სურს, შეასრულოს მოვალეობა, რომელიც მეუღლემ დააკისრა. ეუფლება განცდა, რომ მას იყენებენ. იმსჯელეთ იმაზე, რისი გაკეთება სურს მამას ბავშვებთან ერთად. მაგალითად, ის სიამოვნებით გაასეირნებს ბავშვებს, კერძის გაკეთება კი დედას მოუწევს. გონივრული შეთანხმება თავიდან აგაცილებთ კონფლიქტს.
წაახალისეთ და მხარი დაუჭირეთ
მამებს ხშირად სჭირდებათ მხარდაჭერა და თანადგომა. ეს აუცილებელია, რათა მამაკაცმა თავი გაართვას ახალ როლს. მისთვის მნიშვნელოვანია იმის განცდა, რომ ბავშვებთან მისი ურთიერთობა ფასეულია თავისთავად და არა მხოლოდ როგორც დედის დახმარება. დედამ ყურადღება უნდა მიაქციოს მამის წარმატებას ბავშვებთან ურთიერთობაში. ყველაფერი ეს ხელს შეუწყობს ბავშვის ფსიქიკის სწორ ჩამოყალიბებას.
