როგორ გავუმასპინძლდეთ პატარას ხილით
ერთი წლის ბავშვს, უკვე შეიძლება, ხილი კი აღარ გავუხეხოთ, არამედ წვრილად დავუჭრათ. ერთიდან ორ წლამდე ასაკის პატარას, თუ მას კარგი კუჭის მოქმედება აქვს, აძლევენ ფორთოხალს, ატამს, ყურძენს, გარგარს, ჭერამს, ქლიავს, ყურძენს, ოღონდ - ძალიან მწიფეს. თუ არ გათლით, ხილი საგულდაგულოდ გარეცხეთ, რომ კარგად მოაშოროთ ქიმიური ნივთიერებები, რომლებიც ხეხილს მოასხურეს.
ზამთარში, ხილის ნაკლებობისას, კარგ სამსახურს გაგვიწევს ჩირი. წლამდე ასაკის პატარებს მისგან კომპოტი მოუხარშეთ, ორი წლიდან კი შეგიძლიათ უმიც მისცეთ. განსაკუთრებით მარგებელია ატმის, გარგარის, შავი ქლიავის ჩირი, ქიშმიში. გირჩევთ, ყოველგვარი ხილი პატარას პირველად მცირე ულუფად მისცეთ, დააკვირდეთ, ხომ არ გამოაყარა ან კუჭის მოქმედება ხომ არ დაურღვია და ულუფა ამის შემდეგ გაუზარდოთ. ვიდრე ბავშვი კარგად ღეჭვას არ ისწავლის, სასურველია, კენკრა დაუსრისოთ, ალუბალს კი კურკა გამოაცალოთ. ნუ მიაჩვევთ პატარას დაშაქრულ ხილს, მაგალითად, ალუბალს ან მარწყვს. ნატურალური სიტკბო - ფრუქტოზა ბავშვისთვის სავსებით საკმარისია.
-
კენკრა
არომატული, წვნიანი კენკრა მდიდარია ვიტამინებით, რომლებიც პატარა ორგანიზმის იმუნიტეტს აძლიერებს.
რომელი კენკრა შევთავაზოთ?
- შავი მოცხარი - ის განსაკუთრებით მდიდარია ჩ ვიტამინით. ამაგრებს გულსა და სისხლძარღვებს, ამცირებს გაციების რისკს, აწესრიგებს კუჭ-ნაწლავის მუშაობას, ზრდის სისხლში ჰემოგლობინის ოდენობას. აქვს დამამშვიდებელი ზემოქმედება.
- წითელი მოცხარი - შეიცავს ბევრ სასარგებლო პექტინს, რომელიც ხელს უწყობს ორგანიზმის გაწმენდას.
- ჟოლო - შეუცვლელია გაციებისას და, რაც მთავარია, სიცხის დამწევი ქიმიური პრეპარატებისგან განსხვავებით, არ აღიზიანებს კუჭს.
- ალუბალი - ძალიან კარგია ანემიის დროს.
- ბალი - ბავშვის ორგანიზმს კალციუმით ამარაგებს, რაც მეტად სასარგებლოა გულის მუშაობისთვის.
- მოცვი - მდიდარია ვიტამინებითა და მიკროელემენტებით, რომლებიც აუცილებელია თვალების, გულისა და კუჭის ზრდისა და მუშაობისთვის.
- მარწყვი - ამაგრებს გულის კუნთს, კუჭსა და ღრძილებს.
თუ პატარა წლამდე ასაკისაა, შეგიძლიათ, ჩაისა და წყლის მაგივრად კენკრის ახალმოხარშული, ოდნავ დამტკბარი კომპოტი მისცეთ. თუ არ ესიამოვნა, ნუ დააძალებთ. როდესაც მეძუძური დედა თვითონ მიირთმევს კენკრას, ამით იგი თავის პატარასაც უზრუნველყოფს მასში შემავალი სასარგებლო ვიტამინებითა და მინერალებით. ასე რომ, ნუ იტყვით უარს ბუნების ნობათზე. მიირთვით ზაფხულის საუკეთესო ნუგბარი - კენკრა.