ჩვენ და მათემატიკა
ზოგიერთ ბავშვს ძალიან უჭირს არა მარტო ციფრების დასახელება, არამედ სურათზე მათი პოვნაც. მათ ხშირად ერევათ ერთმანეთში მსგავსი ციფრები - ექვსი და ცხრა, ერთი და შვიდი, სამი და რვა. ეს პატარა ბავშვის აღქმისა და მეხსიერების თავისებურების ბრალია - ის, უპირველეს ყოვლისა, აღიქვამს და იმახსოვრებს იმას, რაც კონკრეტულია, რაც შეიძლება არა მარტო დავინახოთ და გავიგონოთ, არამედ ხელში ავიღოთ, ვუსუნოთ, გავლოკოთ... ამიტომ რაც უფრო პატარაა ბავშვი, მით უფრო მეტი გამომგონებლობა და ფანტაზია სჭირდება პედაგოგს.
მათემატიკის ჯადოსნურ სამყაროში პატარა ბავშვის მიპატიჟება სწორედ თამაშით უნდა მოხდეს.
პირველი ნაბიჯი
პატარა ბავშვი დაბადებისთანავე მათემატიკის გარემოცვაშია - თამაშ-თამაშით ვითვლით მის თითებს, “ერთი-ორის” თანხლებით ვავარჯიშებთ, ვყიდულობთ ფერადი რგოლებისგან შემდგარ პირამიდას, სხვადასხვა ზომისა და ფერის კუბებს. ასე ისმენს პატარა ციფრებს და ეხება გეომეტრიულ ფიგურებს, ეცნობა მათ თვისებებს, ადარებს ერთმანეთს და შედარებითი ანალიზის “შესავალ კურსს” გადის.
ლოგიკის საფუძვლები
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
მათემატიკის საფუძვლების შესწავლა რამდენიმე ეტაპად მიმდინარეობს. “დამწყებ მათემატიკოსებს” შეიძლება შემდეგი თამაშები შევთავაზოთ:
დახარისხება
- ერთმანეთში აურიეთ რამდენიმე სხვადასხვა ფერის საგანი და პატარა ბავშვს შესთავაზეთ, ერთი და იმავე ფერის ნივთები იპოვოს.
- უფრო დიდ ბავშვს შეიძლება ვთხოვოთ, ერთი და იმავე ფერის საგნები იმავე ფერის პარკში ჩააწყოს ან რამდენიმე ფერის საგნებიდან ერთი სახისა შეარჩიოს.
- ბავშვს სთხოვეთ, ერთად დაალაგოს წინდები, მაისურები, პერანგები. შეიძლება, ამოცანა გავართულოთ - დედის, მამისა და და-ძმის ტანსაცმლის ერთმანეთისგან გაცალკევება დავავალოთ.
ამ დავალების შესრულება ბავშვს წესრიგსაც აჩვევს და შესანიშნავადაც ავარჯიშებს! თავდაპირველად პატარა ბავშვმა უნდა გაარჩიოს ტანსაცმლის ფორმა, ზომა, შეადაროს ისინი ერთმანეთს, იპოვოს საერთო ნიშნები. ეს ყველაფერი ფერების განსხვავებასთან ერთად ბავშვს სამყაროში ორიენტაციას, უფროსების დავალებათა გაგებასა და საკუთარი სურვილების გასაგებად გამოხატვას ასწავლის.
