"მერე რა, რომ ავად ვარ!"
ასეთ შემთხვევაში შეიძლება, პატარ-პატარა ეშმაკობებს მივმართოთ, მოვიგონოთ ისეთი საქმიანობა, რომელიც ბავშვს ამ რთულ პერიოდს ადვილად გადაატანინებს.
თუ ბავშვის მდგომარეობა იძლევა საშუალებას, მიეცით უფლება, ხატოს. საწოლში საამისოდ საჭირო პირობების შექმნა ძნელი არ არის: საკმარისია, იპოვოთ ბრტყელი, სწორზედაპირიანი მაგარი ნივთი, რომელზეც ბავშვი სახატავ რვეულს დადებს. შესთავაზეთ, დახატოს რაიმე ისეთი, რაც სასიამოვნო ასოციაციებსა და მოგონებებს აღუძრავს: ზაფხული, აგარაკი, ზღვის სანაპირო... სასიამოვნო რამეებზე ფიქრი ბავშვს განწყობილებას აუმაღლებს და იმის გაცნობიერებაში დაეხმარება, რომ ავადმყოფობა ჩვეულებრივი მოვლენაა, როგორც მოვიდა, ისევე წავა. კარგი განწყობა, დადებითი ემოციები ბავშვს ენერგიას შემატებს და ავადმყოფობის დაძლევაში დაეხმარება.
ყურადღებით დააკვირდით ბავშვის ნახატს. გაამახვილეთ ყურადღება ფერთა გამაზე: მუქი და ბაცი ტონები იმაზე მეტყველებენ, რომ ბავშვი თავს სუსტად გრძნობს, ხოლო ნათელი, კაშკაშა ფერები მიგვახვედრებენ, რომ საქმე გამოჯანმრთელებისკენ მიდის. გაითვალისწინეთ: ავადმყოფი ბავშვი ირჩევს იმ ფერს, რომელიც მას ჯანმრთელობის ასოციაციას უქმნის.
თუ ბავშვს ხატვა არ სურს, ნუ დააძალებთ - ეს იმას ნიშნავს, რომ პატარა ჯერ კიდევ სუსტად გრძნობს თავს და ზედმეტი აქტიურობისთვის ძალა არ შესწევს. ასეთ შემთხვევაში შესთავაზეთ უფრო მშვიდი საქმიანობა, თუნდაც ფოტოსურათების თვალიერება. ყურადღება გაამახვილეთ იმ ფოტოებზე, სადაც პატარა მხიარული და ბედნიერი ჩანს, რომლებიც მას სასიამოვნო წუთებს გაახსენებს.
თუ ბავშვი თავს უკვე კარგად გრძნობს, შესთავაზეთ თამაში, რომელიც გონებრივ აქტიურობას მოითხოვს. მაგალითად, "გამოიცანი, რა შეიცვალა" (აჩვენეთ რამდენიმე სათამაშო, ხოლო შემდეგ, როცა ის თვალებს დახუჭავს, მოაცილეთ ან დაამატეთ ერთი), "რომელ ხელში მაქვს მონეტა?". თამაში რთული არ უნდა იყოს, რათა ბავშვმა გამარჯვება შეძლოს. გამარჯვებით გამოწვეული სიხარული მას ძალას შემატებს.
ბავშვს შეგიძლიათ შესთავაზოთ კონსტრუქტორის ან თავსატეხის აწყობა, აპლიკაციის გაკეთება. გარდა ამისა, მოიმარაგეთ საბავშვო ჟურნალები გამოცანებით, გასაფერადებლებით, თავსატეხებით ("მოძებნე განსხვავებები ნახატებში", "დაეხმარე თაგუნას, გაიაროს ლაბირინთები და ყველგან მივიდეს") და ა.შ. უკიდურეს შემთხვევაში, კარგი გასართობი იქნება ლეპტოპზე ან მობილურ ტელეფონში ჩაწერილი თამაშიც, მაგრამ ასეთი გასართობით ბავშვს დიდხანს თავის შექცევის ნებას ნუ დართავთ - შესაძლოა, თვალები ან თავი ასტკივდეს. თუ მოიცლით, ძალიან კარგი იქნება, თუ ბავშვს წაუკითხავთ წიგნს, ჩაურთავთ ვიდეოწიგნს ან მუსიკას. გაითვალისწინეთ: ავადმყოფობის დროს ბავშვი უფრო ადვილად აღიქვამს ნაცნობს (წიგნს, მელოდიას), რადგან ახალი ინფორმაციის გააზრება უფრო მეტ ენერგიას მოითხოვს. მეორე მხრივ კი, შესაძლოა, სწორედ ახალი წიგნი ან სათამაშო იქცეს იმ რესურსად, რომელიც ბავშვის გამოჯანმრთელებას დააჩქარებს. სასურველია, ავადმყოფ ბავშვს ვუყიდოთ ლამაზი, ხალისიანი ფიგურებით მოხატული ჭურჭელი. ეს მას მადას შემატებს და ძალ-ღონის აღდგენაში დაეხმარება."