ჟურნალის რედაქცია

• სპეციალისტები გვარწმუნებენ, რომ აღმოაჩინეს ფსიქიკური დარღვევების ნამდვილი მექანიზმი

ორგანიზაცია Diamond Light Source-ის მეცნიერებმა ადამიანის თავის ტვინში, კერძოდ, ჰიპოფიზის უჯრედების ზედაპირზე, აღმოაჩინეს ელემენტი, რომელიც სტრესის, შფოთვისა და დეპრესიის განვითარებაში მონაწილეობს. მეცნიერებმა აქამდეც იცოდნენ, რომ ჰიპოფიზი სისხლში გადაისროდა სტრესულ ნივთიერებებს, მაგრამ გაურკვეველი რჩებოდა სტრესზე პასუხის ინიცირების მექანიზმი.

დღეს კი სწავლულები ამ საიდუმლოს გასაღებად ცილა CRF1-ს მიჩნევენ. მეცნიერებმა სცადეს ამ ცილის სტრუქტურისა და ფუნქციის შესწავლა. ვარაუდობენ, რომ ეს მათ ახალი ანტიდეპრესანტების შექმნაში დაეხმარება. კერძოდ, შესაძლოა შეიქმნას მოლეკულა, რომელიც უჯრედულ სტრუქტურაში ჩაინერგება და CRF1-ს დაბლოკავს, ეს კი გაწყვეტს სტრესული პასუხისკენ მიმავალ ჯაჭვს.

ცილა CRF1 შეკავშირებულია ჰიპოფიზის უჯრედების მემბრანასთან, სადაც იგი რეაგირებს ჰიპოთალამუსის მიერ გამოთავისუფლებულ სტრესულ მოლეკულებზე. როდესაც ასეთი მოლეკულები გაჩნდება, აქტიურდება უჯრედები, რომლებიც ჰორმონებს გადმოისვრის. როდესაც მათი აქტიურობა დიდხანს გასტანს, ადამიანს შფოთვა და დეპრესია ეუფლება.

• ნიგოზი ანემიისა და ჭკუასუსტობის პროფილაქტიკური საშუალებაა

მეცნიერები კარგა ხანია იცნობენ ნიგვზის სასარგებლო თვისებებს, კერძოდ, იციან, როგორ უხდება იგი ტვინს. კალიფორნიის უნივერსიტეტის თანამშრომლებმა (სან-ფრანცისკო) დაადგინეს, რომ ჭკუასუსტობას კავშირი აქვს სისხლში რკინის შემცველობასთან. ცნობილია, რომ რკინის ნაკლებობის დროს ვითარდება ანემია, რომლის შედეგადაც ეცემა სისხლში ერითროციტების რაოდენობრივი და ხარისხობრივი მაჩვენებლები.

სისხლის ამ უჯრედებს გადააქვთ ჟანგბადი, რომელიც უმნიშვნელოვანესი ელემენტია. თუ მისი სატრანსპორტო ფუნქცია ვერ შესრულდა, ტვინის უჯრედები შიმშილს განიცდიან ჟანგბადის ნაკლებობის გამო და ქვეითდება გონებრივი აქტივობა. კვლევის ავტორს კრისტინა იაფეს მიაჩნია, რომ ტვინში ჟანგბადის მიწოდების შემცირება ვნებს მეხსიერებას და ადამიანის კოგნიტიურ შესაძლებლობებს. შედეგად შესაძლოა მივიღოთ ნეირონების დაზიანება და ჭკუასუსტობა.

არსებობს ამ სავალალო მდგომარეობიდან მარტივი გამოსავალი - სწორი კვება. ექიმები გვირჩევენ, მეტი ნიგოზი მივირთვათ.

მეორე ადგილზე არიან ბარდისებრნი, ღვიძლი, თევზი, ხორცი. სასარგებლოა ხმელთაშუაზღვისპირეთის დიეტა, რომელიც მდიდარია ხილითა და ბოსტნეულით.

მეცნიერები გვირჩევენ, სისხლში რკინის დონესა და ცხოვრების წესს განსაკუთრებული ყურადღება მივაქციოთ 65 წლიდან.

• რძემჟავა პროდუქტები ალერგიის პროფილაქტიკის ეფექტური საშუალებაა

ტაილანდელმა მეცნიერებმა კვლევების საფუძველზე დაადგინეს, რომ რძემჟავა პროდუქტების ყოველდღიური მიღება ალერგიის პროფილაქტიკის ეფექტური საშუალებაა. რძემჟავა პროდუქტებში მათ აღმოაჩინეს ნაერთები, რომლებიც ხელს უწყობს ორგანიზმში იმუნოგლობულინ Е-ს დონის დაქვეითებას.

აღსანიშნავია, რომ იმუნოგლობულინ Е ორგანიზმს ყოველგვარი ინფექციისა და ვირუსისაგან იცავს, მაგრამ მისი ჭარბი კონცენტრაცია ალერგიის მიზეზად იქცევა.

ტაილანდელმა მეცნიერებმა შეამჩნიეს, რომ რძემჟავა პროდუქტების რეგულარული მოხმარება ხელს უწყობს იმუნოგლობულინ Е-ს ნორმალური დონის შენარჩუნებას, განურჩევლად ამ ცილის საწყისი დონისა.

შეგახსენებთ იმასაც, რომ დაბალცხიამიანი რძის ნაწარმის ყოველდღიური მიღება აუცილებელია ხანში შესულთათვის ძვლოვანი ქსოვილის დასაცავად და ოსტეოპოროზის თავიდან ასაცილებლად.