ლალი ჩხიკვაძე

გარდა ამისა, ცოტაოდენი ფანტაზია და ძველმანიც კი შეიძლება ახლებურად წარმოვაჩინოთ. მოდა ადამიანს თავს არ ახვევს განსაზღვრულ იმიჯს; პირიქით, გვეხმარება, ვიპოვოთ საკუთარი სტილი და ტანსაცმლის საშუალებით თავი უკეთ წარმოვაჩინოთ. "იყავით ის, რაც ხართ!" - ასეთია 2010 წლის ზაფხულის დევიზი.

მამაკაცის სამოსის შექმნისას დიზაინერები უფრო მეტ ყურადღებას უთმობენ მოგზაურობის მოყვარულებს, ამიტომ მათ კოლექციებში უპირატესობა თავისუფალ სტილსა და ფართო, მოხერხებულ ტანსაცმელს ენიჭება.

ცნება "ახალგაზრდული მოდა" თანდათან კარგავს მნიშვნელობას: ფართო, მოხერხებულ სვიტერს და განიერ შარვალს მრავალრიცხოვანი ჯიბეებით შესანიშნავად მოირგებენ როგორც 14 წლის ბიჭუნა, ასევე 60 წლის მამაკაცი. მთავარია, სამოსი შეესაბამებოდეს თქვენს სტილს და მასში თავს კომფორტულად გრძნობდეთ.

• ყოველდღიური სამოსისთვის ვირჩევთ ნეიტრალურ, კონსერვატიულ ფერებს, სხვა დროისთვის კი უმჯობესია მკვეთრი ფერის აქცენტები გამოვიყენოთ. ყველაზე პოპულარულია შინდისფერი სამოსი. ამ ფერის ნაქსოვი სვიტერი ან პულოვერი ყოველი თავმოყვარე მამაკაცისთვის აუცილებელია.
• ზაფხულის მცხუნვარე მზე კორპორაციულ სტილზე უარის თქმის საბაბი არ არის. საქმიანი მამაკაცებისთვის კლასიკური კოსტიუმი საზაფხულოდაც გარდერობის უმთავრესი ელემენტია. ბუნებრივია, ოფისში და, მით უმეტეს, საქმიან შეხვედრაზე მაისურსა და შორტებში გამოწყობილი ვერ გამოცხადდებით - ტანსაცმლის საქმიან სტილს საზოგადოდ მიღებული ნორმები და ეტიკეტი გვკარნახობს. ერთადერთი, რაც შეგვიძლია, ის არის, რომ შალის ქსოვილი საზაფხულოდ აბრეშუმითა და სელით შევცვალოთ.

მამაკაცის გარდერობისთვის შესანიშნავი დამატება იქნება 100%-იანი ბამბის ქსოვილისგან შეკერილი შარვალი. თხელი, ნატურალური ქსოვილის სამოსი მსუბუქიც არის და სიცხეში სატარებლად მაქსიმალურად კომფორტულიც. სითბოგამტარ ნატურალურ ქსოვილებს ერთი დიდი უპირატესობა აქვს: ზაფხულში გადახურებისგან გვიცავს, ხოლო შემოდგომის გრილ დღეებში სითბოს შენარჩუნებაში გვეხმარება.

• აქსესუარი სტილის მთავარი ნიშანია. სწორედ ის ანიჭებს მამაკაცის ტუალეტს სრულყოფილ იერსა და შარმს, ამიტომ მთავარ თუ არა, პირველხარისხოვან როლს ნამდვილად ასრულებს. შეუძლებელია თანამედროვე მამაკაცის წარმოდგენა ტექნოლოგიური საათის გარეშე, რომელსაც ციფერბლატით შიგნით ატარებენ.
• სწორად შერჩეული სურნელი ნებისმიერ სიტუაციას შეესატყვისება - როგორც პაემანს, ასევე საქმიან შეხვედრასა თუ გასაუბრებას. ამდენად, მოდის ტენდენციებს ამ კუთხითაც უნდა მივადევნოთ თვალი.
• თანამედროვე მამაკაცი მოვლილი და მოწესრიგებული მამაკაცია. სამწუხაროდ, მამაკაცთა უმრავლესობას დღემდე მიაჩნია, რომ სახისა თუ ხელების მოვლა მხოლოდ ქალების პრეროგატივაა.
• გარდერობის პრობლემური ნაწილია წინდები. მათი ფერი კოსტიუმისას უნდა შეესაბამებოდეს, ხოლო ფეხსაცმელთან შედარებით ოდნავ ბაცი უნდა იყოს. ეცადეთ, შეარჩიოთ შარვლის ტონალობის წინდა. თუ ზუსტად ამ ფერს ვერ მიაგენით, შეიძინეთ შარვალზე ერთი ტონით მუქი ან ბაცი.

თეთრი წინდები საქმიანი სტილისთვის მიუღებელია. მკვეთრი, ექსტრემალური ფერები შეიძლება გამოიყენოთ ვარჯიშისა და დასვენების დროს. ასევე მიუღებელია ნახატები, ორნამენტები და წარწერები. უკიდურეს შემთხვევაში, ნახატი მოკრძალებული უნდა იყოს: ზომიერი ინგლისური ბადე, საფირმო ლოგოტიპი, წერტილები. წინდები მაღალი უნდა იყოს. შიშველი ფეხი მაშინაც კი არ უნდა ჩანდეს, როდესაც ფეხიფეხგადადებული ზიხართ.

ქსოვილებიდან უპირატესობა მიანიჭეთ თხელ, ხარისხიან ბამბის ქსოვილს. დასაშვებია ლიკრის მცირე - 2%-მდე - შემცველობა. კომფორტულია ასევე შალისა და ბამბის, აბრეშუმისა და ბამბის ნარევისგან მოქსოვილი წინდები - ისინი ფეხებს სუნთქვის საშუალებას აძლევს. სინთეტიკა წინდის ქსოვილში 5%-ზე მეტი არ უნდა იყოს. სუფთა აბრეშუმის წინდებს მხოლოდ ფრაკთან ატარებენ.

წინდის რეზინი არ უნდა იყოს მეტისმეტად მჭიდრო და არ უჭერდეს ფეხს. იმაზე ლაპარაკი, რომ წინდები ყოველდღე უნდა გამოიცვალოთ, ალბათ უხერხულიც კია. ამიტომ მამაკაცს 7 წყვილი წინდა მაინც უნდა ჰქონდეს - თითო კვირის ყოველი დღისთვის. გაითვალისწინეთ: სუფთა და მოწესრიგებული სამოსი უბრალო კაპრიზი არ არის - ასეთი ჩაცმულობით გარშემო მყოფთა მიმართ პატივისცემას გამოვხატავთ, რაც საპასუხო პატივისცემის საწინდარია.