ფსიქოლოგი გვირჩევს - მკურნალი.გე

ნანა კალანდაძე

.

• "ნამდვილი უიღბლო ვარ, ყოველ შემთხვევაში, ჩემი ნაცნობების ფონზე სრულიად უსუსური ვჩანვარ. იქნებ ამაში მე თვითონ ვარ დამნაშავე - რადგან ჩემს შესაძლებლობებს ბოლომდე ვერ ვიყენებ?ეცადეთ, რაკურსი შეიცვალოთ."

-ნაცნობების ცხოვრებაზე დაკვირვებამ შური კი არ უნდა აღგიძრათ, არამედ დაგანახვოთ, ვინ როგორ გამოიმუშავეს ფულს და როგორ იყენებს ამ თანხას. ნუ შეგაშინებთ საქმიანობის სფეროს შეცვლა, თამამად დაეუფლეთ სიახლეებს.

• "ჩემს მეგობარ მამაკაცს ძალიან აღიზიანებს ჩემი სუნამოს სურნელი. ყოველი შეხვედრისას მესმის: "ისევ სუნამო დაისხი?!" მე კი მწყინს - სასიამოვნო სურნელმა ხომ, პირიქით, მამაკაცში დადებითი ემოცია უნდა გამოიწვიოს?"

-ნუ გამოსცდით საყვარელ მამაკაცზე "ნამდვილი მამაკაცების" შესახებ არსებულ სტერეოტიპებს. გემოვნება, სექსუალურობა ისევე ინდივიდუალურია, როგორც ხასიათი, გარეგნობა, ჩვევები. ეცადეთ, გაგებით მოეკიდოთ იმ ფაქტს, რომ თქვენს მეგობარს ნებისმიერი არომატი აღიზიანებს. ნუ დაისხამთ სუნამოს მასთან შეხვედრის წინ.

• "ჩემს შეყვარებულს ჩვევად აქვს, ყველაფერი, რაც ჩვენ ორს გვეხება, თვითონ გადაწყვიტოს, მე კი ფაქტის წინაშე მაყენებს ხოლმე. მეგობრები მეუბნებიან, რომ საიმედო საყრდენი მყავს, მე კი მეჩვენება, რომ სული მეხუთება."

-როგორც ჩანს, თქვენ ყოველთვის ეთანხმებით შეყვარებულს, რათა ურთიერთობა არ გააფუჭოთ, ხოლო თქვენს უკმაყოფილებას მხოლოდ თქვენს მეგობარ გოგონებთან გამოხატავთ, მაგრამ თუ გსურთ, დიდხანს შეინარჩუნოთ კარგი ურთიერთობა და მასთან ერთად ბედნიერი იყოთ, მნიშვნელოვანია, მკვეთრად გაავლოთ ზღვარი, რომელსაც მან არ უნდა გადააბიჯოს. უმჯობესია, თქვენი უკმაყოფილება პირადად მას გაუზიაროთ.

• "განქორწინების შემდეგ ფანტაზიების სამყაროში ვცხოვრობ. გამუდმებით იდეალურ მამაკაცზე ვფიქრობ, რომელიც დამაფასებს, ვეყვარები და იზრუნებს ჩემზე, მაგრამ სინამდვილეში გავურბივარ ისეთ ადგილებს, სადაც შეიძლება ვინმე გავიცნო."

-თქვენი ოცნებები იმ ტრავმის კომპენსაციაა, რომელიც განქორწინებისას მიიღეთ. იმის წარმოდგენა, რომ საყვარელი და სასურველი ხართ, სულიერ წონასწორობას გიბრუნებთ. მაგრამ რეალური ცხოვრება რომ აიწყოთ, უნდა იყოთ უფრო აქტიური, უფრო ღია. ეცადეთ, მეტი ურთიერთობა გქონდეთ ახლობლე-ბთან, მეგობრებთან. თუ კარჩაკეტილობას გადალახავთ, ახალი ნაცნობების გაჩენასაც შეძლებთ.

• "ჩემი მეგობარი სამუშაოდ ჩემს ოფისში მოვაწყვე, რასაც ახლა ძალიან ვნანობ. მან აქტიური საქმიანობა გააჩაღა, ახლა კი ამტკიცებს, რომ ორივეს თითქმის ერთნაირი ანაზღაურება გვაქვს, თუმცა თვითონ ორჯერ მეტს შრომობს. მასთან საუბარს აზრი არ აქვს. დამღალა ამის მოსმენამ, მაგრამ არც სამსახურიდან წასვლა მინდა. როგორ მოვიქცე?"

-როცა კი თქვენი მეგობარი ამ ტალღაზე ამღერდება, საუბრის თემა შეცვალეთ ან ლაპარაკი შეაწყვეტინეთ იმ მიზეზით, რომ ბევრი საქმე გაქვთ. თუ მასთან შეხვედრას თავს ვერ არიდებთ, პირდაპირ ჰკითხეთ: ნუთუ მიაჩნია, რომ უფრო ნაკლებს უნდა გიხდიდნენ? იქნებ იმაზე მიგანიშნებთ, რომ მას უნდა მოუმატონ ხელფასი? ურჩიეთ, ეს საკითხი გენერალურ დირექტორთან გაარკვიოს. რა თქმა უნდა, არ ღირს სამსახურიდან წასვლა, თუ საამისოდ სხვა მიზეზი არ გაქვთ.

• "ძალიან გულუბრყვილო ვარ, ყველას ვენდობი, ყველაფერი მჯერა, მერე კი, როცა ცხვირს წავიტეხ, დიდხანს განვიცდი. მომბეზრდა ხანმოკლე შეხვედრები, ნამდვილ სიყვარულზე ვოცნებობ. როგორ დავაღწიო თავი ამ ბავშვურ თვისებას?"

-თუ თქვენს ცხოვრებაში ჯერ არ ყოფილა ნამდვილი სიყვარული, ამას მაინცდამაინც გულუბრყვილობას ნუ დააბრალებთ. 17 წლის ასაკში ყველას როდი ეძლევა სერიოზული ურთიერთობის გაბმის შესაძლებლობა. გულუბრყვილობა კი შესანიშნავი თვისებაა, უფრო სასიამოვნო, ვიდრე უნდობლობა ყველასა და ყველაფრის მიმართ. მაგრამ თუ ეს თვისება ხელს გიშლით, ეცადეთ, ორიენტაცია ფაქტებსა და რეალურ მოვლენებზე აიღოთ. ნუ მისცემთ თავს უფლებას, ფანტაზიებმა გაგიტაცოთ, ოცნების კოშკებს ნუ ააგებთ. გრძნობებს კი დაკვირვებით მოეკიდეთ.

• "ჩემი პატარა გოგონა ჩემზე ნაწყენია, რადგან უმცროს ვაჟს მეტ დროს ვუთმობ - ის ხუთი წლისაა, ბიჭი კი ორის. მეუბნება, რომ არ უნდა უფროსობა. ჰგონია, რომ არ მიყვარს, რადგან არ ვასეირნებ საბავშვო ეტლით, არ ვეხმარები ჩაცმაში. როგორ მოვიქცე?"

-უფროსი ბავშვები ხშირად ეჭვიანობენ უმცროსებზე, ეჩვენებათ, რომ ისინი მათ წილ სიყვარულს ისაკუთრებენ. სამწუხაროდ, ამას მშობლებიც უწყობენ ხელს ამგვარი ფრაზებით: "შენ უკვე დიდი ხარ, შენ თვითონ ჩაიცვი, ნუ ჭირვეულობ". ეცადეთ, უფროს შვილს მხოლოდ მეტი კი არ მოსთხოვოთ, არამედ პრივილეგიებიც მიანიჭოთ - აჩვენოთ, რით სჯობს უფროსობა. დააწვინეთ დასაძინებლად ნახევარი საათით გვიან, წვეულების დროს მიეცით უფლება, დიდხანს დარჩეს სტუმრებთან. ხაზი გაუსვით, რომ აფასებთ მის ცოდნას, უნარს. დაიხმარეთ რაიმე ნივთის შერჩევაში, ბინის დალაგებაში და, რაც მთავარია, ხშირად შეაქეთ.

• "ჩემს მეგობარს მიაჩნია, რომ ძალიან ლამაზია და პირდაპირ მოითხოვს, კომპლიმენტები უთხრან. ვინმემ თუ უბრალოდ სიმპათიური უწოდა, ბრაზდება და შეიძლება, ატირდეს კიდეც. წამდაუწუმ მეკითხება: "ხომ ლამაზი ვარ?" არ ვიცი, რა ვუპასუხო, რადგან მზეთუნახავად ნამდვილად არ მიმაჩნია. უბრალოდ, ნაზია და საყვარელი, მასთან ჩხუბი კი არ მსურს. მოვატყუო?"

-როგორც ჩანს, თქვენს მეგობარს მეტად ფაქიზი თავმოყვარეობა აქვს, მტკივნეულად განიცდის ყველაფერს, რაც გარეგნობას უკავშირდება. სულის სიღრმეში ის არ არის დარწმუნებული თავის მომხიბვლელობაში, ამიტომაც სჭირდება ასე სხვისი მხარდაჭერა. მისი გულის მოსაგებად ტყუილი საჭირო არ არის, არც მტკივნეულ ადგილას დარტყმის მიყენებაა ლამაზი. ეცადეთ, იპოვოთ ისეთი ფორმულირება, რომელიც ორივესთვის ხელსაყრელი იქნება. მაგალითად, კითხვაზე უპასუხეთ: "დიახ, კარგი ხარ!" ან "მე ძალიან მომწონხარ". ამასთანავე, მიანიშნეთ, რომ ადამიანების უმრავლესობას უბრალოდ მომხიბვლელად მიიჩნევთ, ხოლო სილამაზე, თქვენი აზრით, განსაკუთრებული რამ არის.

• "მე და ჩემი დედამთილი ვერაფრით შევთანხმდით იმაზე, თუ როგორ აღვზარდოთ ბავშვი. ის ჩემს 6 წლის გოგონას საძაგლად ანებივრებს. მაგალითად, მე და ჩემმა ქმარმა მივაჩვიეთ, რომ ჭამის შემდეგ ჭურჭელი გასარეცხად წაიღოს. ბებია კი ამას არ აკეთებინებს, არც საოჯახო საქმეებში იშველიებს. რამდენად საშიშია მოთხოვნების ასეთი განსხვავება?"

-ბავშვები იოლად ხვდებიან, რომ ახლობლები მათ სხვადასხვაგვარად ექცევიან. მაგალითად, დედასთან შეიძლება ხმამაღლა სიმღერა, მამას კი ხმაური არ უყვარს. იმ ფაქტმა, რომ ბებია თავისებურად ზრდის, არა მგონია, თქვენს გოგონაზე ცუდად იმოქმედოს. ბავშვი ხვდება, რომ ეს სხვა ტერიტორიაა და სხვა მოთხოვნები, შინ დაბრუნებისას კი ისე უნდა მოიქცეს, როგორც თქვენ სთხოვთ.