ლალი ჩხიკვაძე

კვლევის მიმდინარეობისას, ენდოსკოპი ხახიდან და საყლაპავიდან შედის კუჭში და იქიდან გადადის თორმეტგოჯა ნაწლავში, საიდანაც სანაღვლე გზებში ან კუჭუკანა ჯირკვლის სადინარში შეჰყავთ საკონტრასტო ნივთიერება. ეს უკანასკნელი რენტგენით ამ სადინარების ცვლილებების დიაგნოსტირების საშუალებას იძლევა.

შესაძლო სამკურნალო პროცედურის მსვლელობისას, აუცილებლობის შემთხვევაში, შესაძლებელია სანაღვლე გზებიდან კენჭების ამოღება, სტენტის დაყენება ნაღვლის გამოდენის უზრუნველსაყოფად, შევიწროებისას როგორც ნაღვლის, ასევე პანკრეასის სადინარების გაფართოება.

ახალწარმონაქმნის არსებობაზე ეჭვის შემთხვევაში შესაძლებელია ქსოვილის ნიმუშის აღებაც.

კვლევა გრძელდება დაახლოებით 30 წუთი, მაგრამ შესაძლებელია პროცედურის ხანგრძლივობა გაიზარდოს კვლევის დროს გამოვლენილი ანატომიური თავისებურებების გამო.

რა არის კვლევის ჩვებები:

• სანაღვლე გზებში კენჭების არსებობა;
• სანაღვლე გზების შესაძლო დაზიანება;
• სანაღვლე გზებსა და კუჭუკანა ჯირკვლის ახალ­წარმონაქმნები;
• თანმხლები პანკრეატიტი;
• სანაღვლე გზების დახშობა.

კვლევის დაწყებამდე:

არ შეიძლება წყლისა და საკვების მიღება კვლევამდე 6 საათით ადრე.

აუცილებლად უნდა ეცნობოს ექიმს, თუ პაციენტი იღებს სისხლის გამათხელებელ პრეპარატებს (მაგ: ასპირინი, ვარფარინი, კლოპიდოგრელი, რივაროქსაბანი), რადგან აღნიშნული პრეპარატები შეიძლება გახდეს პროცედურის დროს სისხლდენის მიზეზი.

გამოკვლევის წინ პაციენტმა უნდა მოიხსნას კბილის პროთეზი დაზიანების ან სასუნთქ გზებში მოხვედრის თავიდან ასაცილებლად.

კვლევა ტარდება მუცელზე დაწოლილ მდგომარეობაში. წინასწარ აეროზოლის საშუალებით ტარდება ყელის ანესთეზია.

ჩვეულებრივ, კვლევა უმტკივნეულოა, მაგრამ შეიძლება აღინიშნოს მუცელში დისკომფორტი და შებერილობა, ასევე ღებინების რეფლექსი. სასუნთქი გზები თავისუფალია და სასუნთქი გზებისთვის წინაღობას კვლევა არ წარმოადგენს.

კვლევის შემდეგ:

შეიძლება აღინიშნოს ყელის მიდამოს ტკივილი და მეტეორიზმი. პროცედურის შემდეგ რეკომენდებულია საკვებისგან თავის შეკავება 6 საათი.

შესაძლო გართულებები:

• სამკურნალო საშუალებებზე გვერდითი ეფექტების გამოვლენა (ალერგიული რეაქცია);
• კუჭუკანა ჯირკვლის ანთება;
• ღვიძლისა და სანაღვლე გზებში ანთებითი პროცესები;
• სისხლდენა;
• ნაწლავის კედლის პერფორაცია.