ლალი ჩხიკვაძე

ტრავმას აყენებს. სქესობრივი ფუნქციის ესა თუ ის დარღვევა 40 წელს გადაცილებულ მამაკაცთა ნახევარზე მეტს აღენიშნება, მაგრამ ექიმს მათი მხოლოდ 10% მიმართავს.

• მიზეზი აშკარაა

მამაკაცების ცნობიერებაში სიტყვა ”იმპოტენცია” უძლურების, ხელმოცარულობის ასოციაციას იწვევს. არადა, პრობლემა უმეტესად იოლი მოსაგვარებელია. სქესობრივ ”უძლურებას” სრულიად კონკრეტული მიზეზი აქვს, რომელიც შესწავლასა და მკურნალობას საჭიროებს, თუმცა არც ის არის სადავო, რომ სქესობრივი სფეროს დარღვევები დელიკატურ, განსაკუთრებულ დამოკიდებულებას მოითხოვს.

• ერექციული დისფუნქცია

მამაკაცის სქესობრივი დარღვევებიდან ყველაზე მეტად გავრცელებულია ერექციული დისფუნქცია. ეს ტერმინი ერექციის უნარის დაქვეითებას გულისხმობს, იმპოტენცია კი სრული სქესობრივი უძლურებაა, რომელიც, საბედნიეროდ, გაცილებით იშვიათია.

ერექციური დისფუნქცია უმეტესად ამა თუ იმ ორგანოს ან სისტემის ფუნქციის მოშლის შედეგია. მისი ერთ-ერთი ყველაზე გავრცელებული მიზეზი გულ-სისხლძარღვთა დაავადებები გახლავთ. სპეციალისტებს მიაჩნიათ, რომ პოტენციის დაქვეითება შეიძლება განხილულ იქნეს როგორც სისხლძარღვოვანი დარღვევების კერძო გამოვლინება და ფაქტორები, რომლებიც ერექციურ დისფუნქციას იწვევს, სიცოცხლისთვის საშიში გართულებების - ინფარქტის, ინსულტის - განვითარებასაც უწყობს ხელს. სქესობრივი ფუნქცია სტაბილური და სრულფასოვანია მხოლოდ მაშინ, როდესაც ჯანსაღია სისხლძარღვთა სისტემა. როცა სისხლძარღვის კედელი დაზიანებულია (რაც ათეროსკლეროზის, არტერიული ჰიპერტონიის, დიაბეტის, თამბაქოს წევის და სხვა მიზეზების გამო ხდება), სხვა გამოვლინებებთან ერთად აღინიშნება ერექციული დისფუნქციაც.

ცნობილია ერექციული უკმარისობის სხვა მიზეზებიც, რომელთაგან ყველაზე გავრცელებულია სტრესი და ფსიქიკური მოშლილობა. ერექციის პროცესი ძალიან არის დამოკიდებული ფსიქოემოციურ მდგომარეობაზე.

• ისევ სისხლძარღვები

სპეციალისტთა აზრით, ერექციული ფუნქციის დარღვევა შეიძლება ზოგადი სისხლძარღვოვანი პათოლოგიის, კერძოდ, ათეროსკლეროზის, ადრეულ გამოვლინებად მივიჩნიოთ. ის მანამდე იჩენს თავს, ვიდრე აშკარა გახდება გულის კუნთში სისხლის მიმოქცევის დარღვევის ნიშნები. საგულისხმოა, რომ, როგორც ზემოთ აღვნიშნეთ, ერექციული ფუნქციის უკმარისობისას ექიმს მამაკაცთა მხოლოდ 10% აკითხავს, რაც იმაზე მიუთითებს, რომ სისხლძარღვოვანი სისტემის ადრეული დარღვევების სიმპტომები უყურადღებოდ რჩება.

რაღა გასაკვირია, რომ დღემდე მთელ მსოფლიოში ყველაზე მეტი ხალხი გულ-სისხლძარღვთა სისტემის დაავადებებით იღუპება. ჯანდაცვის მსოფლიო ორგანიზაციის მონაცემებით, დედამიწაზე სიკვდილის ყოველი მესამე შემთხვევა გულ-სისხლძარღვთა სისტემის დაავადებით ან მისი გართულებით - ინფარქტით ან ინსულტით - არის გამოწვეული. აქედან გამომდინარე, შეიძლება ითქვას, რომ ნორმალური სქესობრივი ცხოვრება ჯანმრთელობის ერთგვარი მაჩვენებელია, ვინაიდან მამაკაცებს, რომლებიც ამ მხრივ არაფერს უჩივიან, გულ-სისხლძარღვთა სისტემის დაავადებებისა და მათი გართულებების განვითარების ალბათობაც ნაკლები აქვთ.

ერთი სიტყვით, დადგა დრო, მამაკაცები უფრო მეტი ყურადღებით მოეკიდონ თავიანთ ჯანმრთელობას.

უნდა ვიცოდეთ ისიც, რომ სქესობრივი დარღვევების მკურნალობა ინტეგრალურ მიდგომას საჭიროებს. ადამიანმა, რომელსაც სურს, მოიწესრიგოს ცხოვრების ინტიმური მხარე, აუცილებლად უნდა გაიაროს კომპლექსური გამოკვლევა, რათა დაადგინოს ან გამორიცხოს სქესობრივ ფუნქციაზე ამა თუ იმ დაავადების გავლენა. გარდა ამისა, მართებული მკურნალობის მნიშვნელოვანი ასპექტია იმ გავლენის შეფასება, რასაც სქესობრივ ფუნქციაზე სხვა დაავადებების სამკურნალოდ მიღებული პრეპარატები ახდენს. სამწუხაროდ, ზოგიერთი დაავადების, მაგალითად, არტერიული ჰიპერტონიის დროს, რომელიც თვითონვე შეიძლება იქცეს ერექციური დისფუნქციის მიზეზად, ზოგიერთი პრეპარატის მიღებას სქესობრივი ფუნქციის დარღვევა სდევს თან. საბედნიეროდ, არსებობს ისეთი პრეპარატებიც, რომლებიც არტერიულ წნევას ნორმალურ დონეზე გვინარჩუნებს და არც სქესობრივ ფუნქციაზე ახდენს უარყოფით გავლენას.

კიდევ ერთი მნიშვნელოვანი პრობლემაა იმ მამაკაცების სქესობრივი რეაბილიტაცია, რომელთაც ინფარქტი ან ინსულტი გადაიტანეს. სპეციალისტების ამოცანაა, არა მხოლოდ უმკურნალონ, არამედ თავიდან ააცილონ პაციენტს სპეციფიკური დაავადებები და გაუხანგრძლივონ სიცოცხლე მაქსიმალურად მაღალი ხარისხით.

მამაკაცური დაავადებების პროფილაქტიკა ითვალისწინებს შრომის, დასვენების, კვების რეჟიმის სწორ ორგანიზებას. არსებობს სპეციალური ვარჯიშები სქესობრივი ფიზიოლოგიის გასაუმჯობესებლად. გარდა ამისა, 10 წელიწადში ერთხელ აუცილებელია ინდივიდუალური ტესტირება გულ-სისხლძარღვთა დაავადებების რისკის გამოსავლენად. მნიშვნელოვანია ანდროპაუზის _ მამაკაცური კლიმაქსის _ დროული დიაგნოზირებაც. ასეთია იმ პროფილაქტიკური პროგრამების არასრული სია, რომლებსაც სპეციალისტები გვთავაზობენ.