ეკა ჭავჭავაძე

.

„გამარჯობა, ცოტა ხნის წინ გამოვიყენე ახალი სარეცხი საშუალება ხელით რეცხვისთვის, იმ საღამოს ხელებზე გამიჩნდა გამონაყარი და ამასთან ერთად დამეწყო ხველა, შემიშუპდა ყელი. შეიძლებოდა, რომ ეს ყველაფერი სარეცხის ფხვნილს გამოეწვია??“

სანამ უშუალოდ შეკითხვას ვიპასუხებთ ორიოდ სიტყვით შევეხებით ალერგიის მიზეზებსა და სიმპტომებზე,

ალერგია ორგანიზმის მოჭარბებული მგრძნობელობაა ამა თუ იმ ფაქტორის (სიცივის, სიცხის, რომელიმე ორგანული თუ არაორგანული ნივთიერების) მიმართ. ამ ფაქტორებს ალერგენებს უწოდებენ.

ალერგენები თავისთავად უწყინარია, მაგრამ ზემგრძნობიარე იმუნური სისტემა, უხეშად რომ ვთქვათ, თავს იზღვევს და მათ ზემოქმედებას მკვეთრი რეაქციით პასუხობს, რაც უსიამოვნო, ავადმყოფურ მოვლენებს: სურდოს, ხველას, შეშუპებას, გამონაყარს - იწვევს.

ალერგია მსოფლიო მედიცინის პრობლემაა. ზოგიერთი ინდუსტრიული ქვეყნის მოსახლეობის მეოთხედი ალერგიული დაავადების ამა თუ იმ გამოვლინებას უჩივის. ალერგიული დაავადებები წლიდან წლამდე ხშირდება და მძიმდება. ამერიკელ მეცნიერთა მონაცემებით, პენიცილინი ყოველწლიურად 200-მდე მძიმე ალერგიულ გართულებას იწვევს, რომელთა მესამედი სიკვდილით სრულდება.

• ალერგიული რეაქციის მიზეზები

ალერგიული რეაქციის მიზეზად შეიძლება იქცეს ყველაფერი, რაც ჩვენს ირგვლივაა: საყოფაცხოვრებო ქიმია, საკვები, ცხოველის ბეწვი თუ ბუმბული, ოთახისა თუ მცენარის მტვერი, ობის სოკო, მწერის შხამი, ლატექსი, მედიკამენტები, კოსმეტიკა, ალკოჰოლი, სიცივე და მზის სხივებიც კი.

ალერგიისთვის დამახასიათებელი სიმპტომების აღმოცენებაში ბრალი ჰისტამინსაც მიუძღვის. ორგანიზმში ალერგენის მოხვედრისას ეს ნივთიერება დიდი ოდენობით გადაიტყორცნება სისხლში და ცხვირ-ხახის ლორწოვანს აღიზიანებს, რასაც სურდო, ცემინება, შეშუპება მოსდევს. მიუხედავად ინტენსიური კვლევისა, ალერგიის ბუნება დღემდე ამოუხსნელია. დაავადების ამა თუ იმ ფორმისადმი განწყობა მემკვიდრეობით გადაეცემა. თუ დედას ან მამას აქვს ალერგია, არსებობს 25%-იანი ალბათობა, რომ დაავადება შვილსაც გამოაჩნდეს. თუ ორივე მშობელია დაავადებული, ალბათობა 80%-მდე იმატებს.

• ალერგიის სიმპტომები

ალერგიაზე მეტყველებს შემდეგი სიმპტომები:

• სურდო და ცრემლდენა;
• მშრალი ხველა ღამღამობით;
• ხიხინი, მსტვენი სუნთქვა და სულხუთვის შეტევები;
• ფხაჭნისა და ქავილის შეგრძნება ყელში;
• გამონაყარი კანზე.

ალერგიის გამოვლინება მრავალფეროვანია. მოსალოდნელია ნებისმიერი ორგანოსა და სისტემის დაზიანება, მაგრამ უპირატესად მაინც კანი, საჭმლის მომნელებელი ტრაქტი და სასუნთქი სისტემა ზიანდება.

რაც შეეხება შეკითხვას: უნდა ვივარაუდოთ, რომ თქვენი ორგანიზმისთვის ალერგენია სარეცხი ფხვნილიც. სწორედ მის მიმართ ალერგიული რეაქციის გამოვლინებად უნდა მივიჩნიოთ ყელის შეშუპება და ხველა. ალერგიის მკურნალობის საუკეთესო გზა ალერგენის დადგენა და, შეძლებისამებრ, მასთან კონტაქტის თავიდან აცილებაა. თქვენს შემთხვევაში ეს არც ისე ძნელია - შეგიძლიათ, უარი თქვათ სინთეზურ ფხვნილებზე და ჩვეულებრივი სარეცხი საპონი გამოიყენოთ. წინააღმდეგ შემთხვევაში ალერგენთან კონტაქტს ყოველთვის შეიძლება მოჰყვეს თქვენ მიერ აღწერილი რეაქცია.

ალერგიისგან განკურნება, სამწუხაროდ, შეუძლებელია. მასთან ბრძოლა იმუნური რეაქციის დათრგუნვას და ამ დროს წარმოქმნილი ნივთიერებების განეიტრალებას გულისხმობს. არსებობს მრავალი ანტიჰისტამინური მედიკამენტი, რომლებსაც სწორედ ალერგიის ერთ-ერთი მედიატორის - ჰისტამინის საწინააღმდეგო ეფექტი აქვს. მათი მეშვეობით შესაძლებელია, ალერგიული დაავადების გამოვლინება მინიმუმამდე დავიყვანოთ. მაგრამ მედიკამენტების ალალბედზე მიღებას არ გირჩევთ. უმჯობესია, კვალიფიციურ ალერგოლოგს მიმართოთ. ალერგოლოგთან ვიზიტი, სპეციალური გამოკვლევები და ექიმის რეკომენდაციების შესრულება დაავადების სიმპტომების თავიდან აცილებაში დაგეხმარებათ.