მარიკა დვალი

1. ხველა რამდენიმე წუთის წინ ხომ არ დაგეწყოთ?

თუ პასუხი დადებითია, გადადით მე-12 შეკითხვაზე, თუ პასუხი უარყოფითია, გადადით მომდევნოზე.

2. ხომ არ გაქვთ ზედაპირული, გახშირებული სუნთქვა და ხველისას ხომ არ გამოყოფთ მოვარდისფრო ქაფს?

თუ პასუხი დადებითია, შესაძლოა, ხველის მიზეზი ფილტვების შეშუპება იყოს. ეს საკმაოდ მძიმე მდგომარეობაა, რომელიც გულის დაავადებით არის გამოწვეული, დაუყოვნებლივ უნდა მიმართოთ საავადმყოფოს ან გამოიძახოთ სასწრაფო. თუ პასუხი უარყოფითია, გადადით მომდევნო შეკითხვაზე.

3. გამოყოფთ თუ არა ხველისას ლორწოვან ან მოყვითალო ნახველს?

თუ პასუხი დადებითია, შესაძლოა გქონდეთ ზედა სასუნთქი გზების ვირუსული ინფექცია, რომელსაც, ჩვეულებრივ, გაციებას ვუწოდებთ. მიზანშეწონილია, შინ დარჩეთ, უხვად მიიღოთ სითხე და გაციებისას რეკომენდებული პრეპარატები. თუ პასუხი უარყოფითია, გადადით მომდევნო შეკითხვაზე.

4. ხომ არ გამოყოფთ ყვითელ, მოყავისფრო ან მომწვანო ნახველს?

თუ პასუხი დადებითია, შესაძლოა ბრონქიტი გქონდეთ. თუ ხველას და ნახველის გამოყოფას ერთვის ცხელება, ოფლიანობა და საერთო მდგომარეობის გაუარესება, ხველის მიზეზი შესაძლოა ფილტვების ანთება იყოს. აუცილებელია ექიმთან მისვლა, რათა დაინიშნოს სათანადო პრეპარატები. უნდა დარჩეთ შინ, შეასრულოთ ექიმის დანიშნულება, თუ მწეველი ბრძანდებით, თავი დაანებოთ მოწევას. თუ პასუხი უარყოფითია, გადადით მომდევნო შეკითხვაზე.

5. ხომ არ ახლავს ხველას ქოშინი ან ხიხინი?

თუ პასუხი დადებითია, ხველა შესაძლოა ბრონქულ ასთმასთანაა დაკავშირებული. აუცილებელია დიაგნოზის დადასტურება და ექიმის მეთვალყურეობა, სპეციალური მკურნალობა. თუ პასუხი უარყოფითია, გადადით შემდეგ შეკითხვაზე.

6. ხომ არ შეგიმჩნევიათ ქვედა კიდურების შეშუპება, ხომ არ გაწუხებთ ქოშინი ისეთი ფიზიკური დატვირთვისას, რომელსაც ადრე თავისუფლად ართმევდით თავს? ხომ არ ძლიერდება ქოშინი წოლისას?

თუ პასუხი უარყოფითია, გადადით მე-10 შეკითხვაზე. თუ პასუხი დადებითია, გადადით მომდევნოზე.

7. გაქვთ თუ არა გულის დაავადება?

თუ პასუხი დადებითია, ქრონიკული ხველა შესაძლოა გულის შეგუბებითი უკმარისობის შედეგი იყოს. აუცილებელია ექიმთან მისვლა. თუ პასუხი უარყოფითია, გადადით მომდევნო შეკითხვაზე.

8. ხომ არ ამოახველებთ სისხლს ან სისხლიან ნახველს?

თუ პასუხი უარყოფითია, გადადით მე-12 შეკითხვაზე. თუ პასუხი დადებითია, გადადით მომდევნოზე.

9. ხომ არ დაგეწყოთ ცოტა ხნის წინ გულმკერდის ძლიერი ტკივილი, გულისცემის გახშირება, ქვედა კიდურების შეშუპება და უეცარი ქოშინი?

თუ პასუხი დადებითია და ამ სიმპტომებს სისხლიანი ხველაც ახლავს, შესაძლოა ეს ფილტვის არტერიის თრომბოემბოლიის ნიშანი იყოს. დაუყოვნებლივ უნდა მიმართოთ სტაციონარს ან გამოიძახოთ სასწრაფო. თუ პასუხი უარყოფითია, გადადით მომდევნო შეკითხვაზე.

10. ხველასთან ერთად ხომ არ უჩივით ტემპერატურის მომატებას, ღამით ოფლიანობას, ხველისას ან ღრმა ჩასუნთქვისას გულმკერდის ტკივილს?

თუ პასუხი დადებითია, შესაძლოა მიზეზი ტუბერკულოზი ან სასუნთქი გზების სხვა ინფექცია იყოს. უნდა მიმართოთ ექიმს. თუ პასუხი უარყოფითია, გადადით მომდევნო შეკითხვაზე.

11. ხომ არ შეგიმჩნევიათ წონის უმიზეზო კარგვა?

თუ პასუხი დადებითია, შესაძლოა ხველა ფილტვის კიბოს სიმპტომი იყოს. გარდა ამ ნიშნებისა, დაავადებას ახასიათებს სისხლიანი ხველა, ქოშინი, ხიხინი. უნდა მიმართოთ ექიმს. თუ პასუხი უარყოფითია, გადადით მომდევნო შეკითხვაზე.

12. ხომ არ გადაგცდენიათ სასუნთქ გზებში მტვერი, პატარა ნაწილაკი ან სხვა უცხო სხეული?

თუ პასუხი დადებითია, შესაძლოა ხველა დამცველობითი ხასიათისა იყოს და უცხო სხეულისგან სასუნთქი გზების გათავისუფლებას ემსახურებოდეს. თუ ხველა მეტისმეტად ძლიერია და არ ხართ დარწმუნებული, რომ სასუნთქი გზები განთავისუფლდა, უნდა მიმართოთ სტაციონარს.

თუ პასუხი უარყოფითია და ზემოთ მოყვანილი შეკითხვებიდან და მათი პასუხებიდან ვერ მიიღეთ თქვენთვის საინტერესო ინფორმაცია, მიმართეთ ექიმს. თუ მიგაჩნიათ, რომ პრობლემა სერიოზულია, მიმართეთ ექიმს.