თინათინ გოცაძე

უსიამოვნო შეგრძნებებს იწვევს თვალების გადაძაბვაც, მონიტორებთან და ტელეფონის ეკრანებთან ხანგრძლივად კონტაქტი დასაბამს აძლევს თვალის სიმშრალეს. ამის გამო ხშირია ქავილისმაგვარი, ზოგჯერ ჭიანჭველების ცოცვის შეგრძნება თვალების არეში, ასევე სხვა სახის სიმპტომები. რა ხდება ამ დროს თვალის ლორწოვანში, რა პროცესები ვითარდება? როგორ მოვიქცეთ ამ სიმპტომების არსებობისას, როგორ ავირიდოთ ეს უსიამოვნებანი? ამ და სხვა საინტერესო საკითხებზე გვესაუბრება რესპუბლიკური ცენტრალური კლინიკური საავადმყოფოს, ლაიონსების თვალის დიაბეტური კლინიკა „საქართველოსა“ და ბოჭორიშვილის სახელობის კლინიკის ექიმი-ოფთალმოლოგი, მედიცინის დოქტორი – ქეთევან ტყებუჩავა:

– ქალბატონო ქეთევან, რა იწვევს თვალების ქავილს? ფაქტია, რომ ბევრ ადამიანს აწუხებს ანალოგიური შეგრძნება თვალების არეში, რა განაპირობებს ამ შეგრძნებებს?

– თვალების არეში ქავილის შეგრძნების მიზეზი ხშირად თვალის ლორწოვანში მიმდინარე პროცესია. კონიუნქტივიტი თვალის ლორწოვანი გარსის დაავადებაა, რომელიც კლინიკურად გამოვლინდება სიწითლით, შეშუპებით, ტკივილით და ქავილით. კონიუნქტივიტის გამომწვევი მიზეზი მრავალგვარია. ის შეიძლება იყოს ინფექციური, ალერგიული, ენდოგენური და სხვა გარეგანი მიზეზებით განპირობებული. ადამიანებს ხშირად აქვთ ქავილის შეგრძნება თვალის არეში, რაც შეიძლება გამოწვეული იყოს ზემოთ აღნიშნული მიზეზებით. ამასთანავე ამ სიმპტომებს თან ახლავს ცრემლდენა, გამონადენი და ხანდახან მხედველობის დაქვეითებაც. კონიუნქტივიტის კლასიფიკაციაში არჩევენ ბანალურ ინფექციურ, ალერგიულ და მშრალი თვალის სინდრომით გამოწვეულ კონიუნქტივიტებს. დაავადების მკურნალობა დამოკიდებულია გამომწვევ მიზეზზე. ბაქტერიული კონიუნქტივიტის დროს მკურნალობა ტარდება ანტიბიოტიკებით. ალერგიულის დროს მივმართავთ ანტიჰისტამინური პრეპარატებით მკურნალობას. არსებობს დემოდეკოზით გამოწვეული ბლეფაროკონიუნქტივიტი, რომლის დროსაც მკურნალობა არის სპეციფიკური.

– კლინიკურად თუ განსხვავდება ალერგიული კონიუნქტივიტი ინფექციურისგან? როგორია მკურნალობის ტაქტიკა თითოეულის შემთხვევაში?

– ბანალური ინფექციური კონიუნქტივიტის დროს აღინიშნება უხვი გამონადენი, ხანდახან ჩირქოვანი. საჭიროა ბაქტერიული ფლორის გამოკვლევა და ანტიბიოტიკის შერჩევა მაღალი მგრძნობელობის მიხედვით. ალერგიული კონიუნქტივიტის დროს აღინიშნება ძლიერი ცრემლდენა, ქავილი, მოსალოდნელია რქოვანას დანისვლა და მხედველობის გაუარესება. ამ დროს მკურნალობა ხდება ანტიჰისტამინური პრეპარატებით. განსაკუთრებით საყურადღებოა გაზაფხულის კატარი, რომელიც ხშირად რთულდება კერატიტით. ალერგიული კონიუნქტივიტის მკურნალობა ხდება ანტიჰისტამინური პრეპარატებით, როგორც ადგილობრივად, ისე ზოგადად.

– რას გვეტყვით თვალების გადაძაბვით გამოწვეულ უსიამოვნებებსა და პრობლემებზე? რას იწვევს მონიტორებსა და ტელეფონის ეკრანებთან ხანგრძლივად კონტაქტი?

– ბოლო წლებში გახშირდა მონიტორთან ხანგრძლივი მუშაობის შედეგად ლორწოვანის ძლიერი გაღიზიანება, სიწითლე, ქავილი და უცხო სხეულის შეგრძნება. საყურადღებოა, რომ ეს ჩივილები უვითარდებათ ბავშვებს და მოზარდებს. მიზეზი არის ახლო მანძილზე მხედველობის ორგანოს ხანგრძლივად დაძაბვა და ხამხამის გაიშვიათება. მნიშვნელოვან როლს ასრულებს იმუნიტეტის დაქვეითება. პროცესი იმდენად ხშირია და თან ახლავს გართულებები, რომ ჩამოყალიბდა ცალკე ნოზოლოგიად „მშრალი თვალის სინდრომის“ სახელწოდებით. ამიტომ საჭიროა მხედველობის ორგანოს დაცვა, მონიტორთან მუშაობის დროის კონტროლი და რქოვანას დამცავი საშუალებების სისტემატური გამოყენება. კონიუნქტივიტის სიმპტომების გამოვლენისას ნებისმიერ შემთხვევაში საჭიროა ექიმ-ოფთალმოლოგის კონსულტაცია სწორი დიაგნოსტირებისათვის და მკურნალობის კურსის დასანიშნად.