ნანა კალანდაძე

როგორი უნდა იყოს საცურაო კოსტიუმი, რომ ჯანმრთელობას არ ავნოს, რომელ ქსოვილზე შევაჩერო ყურადღება?

საცურაოდ განკუთვილი სამოსი უნდა იყოს კარგად მორგებული და გამძლე, ხანგრძლივი ბანაობის შემდეგაც კი ის კარგად უნდა გამოიყურებოდეს, სწრაფად შრებოდეს და არ კარგავდეს ფორმას, ფერს და მომხიბვლელობას მზისა და ზღვის წყლის ზემოქმედების შედეგად.

• ქსოვილი

ყველაზე უბრალო და იაფი საცურაო კოსტიუმი პოლიესტერისგან იკერება. ეს სინთეტიკური მასალა მტკიცე და საკმაოდ გამძლეა, არც მზის სხივების ზემოქმედების შედეგად იცვლის ფერს, მაგრამ ძნელად შრება, მალე კარგავს ფორმას. გამოადგება მას, ვისაც ის მხოლოდ ერთი სეზონისთვის სჭირდება.

კარგი საცურაო სამოსი 15-20% ლაიკრას შეიცავს. ასეთი ქსოვილი მოქნილია, კარგად არის მორგებული სხეულს, გამოკვეთს ფიგურას. ლაიკრის დამატების შემთხვევაში ბამბის ქსოვილებიც კი კარგად ინარჩუნებენ ფორმას. რაც უფრო მეტია ქსოვილში ეს სინთეტიკური კომპონენტი, მით უფრო გამძლე და ძვირფასია საცურაო კოსტიუმი, მით უკეთ ინარჩუნებს ფერს. მაგრამ დააკვირდით პროპორციას, არ შეგაცდინოთ მაღალმა შემცველობამ: თუ ლაიკრა 30%-ზე მეტია, ქსოვილი ვერ სუნთქავს, ეს კი დისკომფორტს შეგიქმნით, თუ გარუჯვას გადაწყვეტთ და შესაძლოა მგრძნობიარე კანი დაგიზიანოთ.

ელასტინი (აშშ-ში იწარმოება სახელწოდებით სპანდექსი) - ეს არის პოლიურეთანული ბოჭკო, რომელსაც შესწევს უნარი, 700%-ით გაიწელოს. მას ელასტიკურობისათვის ამატებენ სხვა მასალებს.

ტაქტელი ლაიკრისა და ტრიკოტაჟის მიკრობოჭკოს ნარევია. ჰგავს პოლიამიდს, მაგრამ ნაკლებად ბზინავს, რბილია, ელასტიკური და ისეთი მსუბუქი, რომ კანზე არც კი იგრძნობა.

პოლიამიდი - ამ ქსოვილისგან დამზადებულს ადვილად ამოიცნობთ დამახასიათებელი ბზინვარების წყალობით. ის მტკიცეა, ელასტიკური, სწრაფად შრება, კარგად გამოკვეთს ფიგურას. დღეს საცურაო კოსტიუმების უმრავლესობა იტალიური ქსოვილისგან იკერება, რომლის 20% ლაიკრაა და 80% - პოლიამიდი.

მიკროფიბრა პოლიამიდის სახესხვაობაა. სასიამოვნო შესახებია, საოცრად მსუბუქი და ნატიფი, სწრაფად შრება, ამიტომ საკმაოდ კომფორტულია.

თუ საცურაო სამოსი დამზადებულია ქსოვილისგან, რომელიც მდგრადია ზღვისა და ქლორირებული წყლის მავნე ზემოქმედების მიმართ, მაშინ აუცილებლად შეამჩნევთ ეტიკეტზე წარწერას: endurance და chlorine resistant.

• სად და როდის ჩავიცვათ

როცა ახალ საცურაო კოსტიუმს ირჩევთ, დაფიქრდით იმაზე, სად აპირებთ მის ჩაცმას - შეზლონგზე, გასარუჯად, წყალში, საცურაოდ თუ კლუბში, ცეკვის დროს.

თუ კლუბში თავის მოწონება გსურთ, აირჩიეთ მიკროფიბრის ან პოლიამიდისგან დამზადებული ორნაწილიანი კოსტიუმი, რომელიც მორთული იქნება დეკორატიული დეტალებით: თასმებით, აპლიკაციებით, პლისეთი, გოფრეთი...

არსებობს საინტერესო დეტალი - “უჩინარი” სამაგრები ბიუსტჰალტერზე. ისინი მიმაგრებულია გარეგანი ნაკერის გარეშე და მკერდს უზადოდ უნარჩუნებს ფორმას.

თუ სიმსუქნის დამალვა გსურთ, შეარჩიეთ მთლიანი ორმაგი საცურაო სამოსი, რომელსაც შიგნიდან კორსეტის ბადე ექნება ჩაკერებული.

საცურაო კოსტიუმის ნაკერებში ხშირად შედის ნაირ-ნაირი პარეო, რომელთა წყალობით გამოჩნდებით არაჩვეულებრივად მომხიბვლელი როგორც ზღვის სანაპიროზე, ისე საღამოს საცურაო აუზთან.

თუ გარუჯვა გსურთ, საუკეთესოა მიკრომოდელი, რომელიც მაქსიმალურად აშიშვლებს სხეულს, მაგრამ თუ იდეალური ფორმებით ვერ დაიკვეხნით, აირჩიეთ კლასიკური თარგის კოსტიუმი, ოღონდ ისეთი ქსოვილისა, რომელიც ატარებს ულტრაიისფერ სხივებს. ნამზეური თანაბარი იქნება.

თუ მზის სხივებისადმი მგრძნობიარე ბრძანდებით, შეგიძლიათ, ჩაიცვათ უკანასკნელი გამოგონება - თავისებური სტილის ბიკინი, რომელიც ერთი ტონის ქსოვილისგან არის დამზადებული და მუქი ლაქებით იფარება,

თუ მეტისმეტად ბევრ დროს გაატარებთ ზღვის სანაპიროზე. საცურაოდ უმჯობესია დაფარული მთლიანი კოსტიუმი. ის მოხერხებულად ზის სხეულზე.

ყოველი გაცურვის შემდეგ საღამოს აუცილებლად გაავლეთ ჩვეულებრივ წყალში. წინააღმდეგ შემთხვევაში ქსოვილი დაკარგავს დრეკადობას და ფერს.

ზოგიერთი რჩევა:

გსურთ დაივიწყოთ კანთან დაკავშირებული პრობლემები და დატკბეთ ლამაზი ნარუჯით? ამისთვის საჭიროა სწორად შეარჩიოთ კანის მოვლის საშუალებები: გამოიყენოთ კენკრის ექსტრაქტით გაჯერებული ბალზამები ხელისა და ფრჩხილებისთვის, განსაკუთრებით მაშინ, როცა ზღვის სანაპიროზე იმყოფებით, მარილიანი წყალი და მზის სხივები ზოგჯერ აუხეშებს ხელის კანს და ფრჩხილებს.

მზეზე დიდხანს ყოფნის შემდეგ აუცილებლად წაისვით კანის დამატენიანებელი კრემები, საშხაპე გელი, რომელიც სურნელოვან ზეთებს შეიცავს. სასარგებლოა ანთების საწინააღმდეგო თერმული წყლის გამოყენება - ის სიხალისეს მატებს კანს. არსებობს ჰიპოალერგენური ბალზამები, რომელთა ხმარება სასურველია გარუჯვის შემდეგ.

ზღვაზე წასვლის წინ ყოველთვის ვიკეთებ ეპილაციას, მაგრამ თმის ღერები კანში მეზრდება. როგორ მოვიქცე?

- აუცილებლად გამოიყენეთ დამატენანებელი კრემები, ასევე - სპეციალური საშუალებები, რომლებიც თმის კანში ჩაზრდას უშლის ხელს. იქნებ ხანგრძლივი ეპილაციის გაკეთება გერჩივნოთ სალონში, სადაც ეპილაციის შემდგომი მოვლის სპეციალურ საშუალებებს შემოგთავაზებენ.