რატომ ატარებენ ექიმები თეთრ ხალათს
ეს ვერსია ხალათს აკავშირებს სამედიცინო პროცედურების დროს სრულყოფილი სისუფთავის აუცილებლობის იდეასთან. მე-19 საუკუნის მეორე ნახევარში, ფრანგი მეცნიერის ლუი პასტერის წყალობით, ექიმები შეთანხმდნენ, რომ დაავადებები გადამდები ბაქტერიებით ვრცელდება და ამის თავიდან ასაცილებლად, უნდა ჩატარდეს დეზინფექცია - სწორედ ის, რასაც ინგლისელი ექიმი ჯოზეფ ლისტერი ქდაგებდა.
დეზინფექცია ნიშნავს სუფთას, მაგრამ რომელ ფერზე ჩანს ჭუჭყი ყველაზე მეტად? თეთრზე.
ამიტომ, პროფესიონალური თეთრი სამედიცინო ტანსაცმელი სწრაფად შემოვიდა მოხმარებაში. ის ინარჩუნებდა სტერილურობის, უსაფრთხოებისა და მუშაობისადმი სერიოზული დამოკიდებულების შთაბეჭდილებას. სისუფთავე და ანტისეპტიკა არის სამედიცინო თეორიისა და პრაქტიკის ორი საყრდენი.
ხალათი - პროფესიონალობის ნიშანი
არსებობს ვერსია, რომლის მიხედვითაც თეთრი ხალათი თავიდანვე გამოარჩევდა ექიმს, რომელიც მუშაობდა სამეცნიერო ცოდნის საფუძველზე თაღლითებისა და შარლატანებისგან განსხვავებით.
თავიდან მხოლოდ ექიმებს ეცვათ თეთრი ხალათები. ექთნებს ეცვათ კაბები, თუნდაც მუქი, და მხოლოდ თეთრი წინსაფრისა და სამკლავურების ტარების უფლება ჰქონდათ. ასე რომ, ხალათი ემსახურებოდა სამედიცინო განათლების მქონე პირის იდენტიფიცირებას.
მოგვიანებით ხალათები ჩაიცვეს ექთნებმა, სანიტრებმა, სამედიცინოს სტუდენტებმა და ფარმაცევტებმა.
მაშინ რატომ აღარ აცვიათ თეთრი ხალათები?
ხალათი არ არის სტერილური
ყველაზე სუფთა თეთრ ხალათსაც კი შეუძლია დაავადების გამომწვევი მიკრობების გადატანა ერთი პაციენტიდან მეორეზე. როცა ეს საკითხი გამოიკვლიეს, ხალათების მეოთხედზე ოქროსფერი სტაფილოკოკიც კი იპოვეს! პათოგენების უმეტესობა აღმოაჩინეს სახელოებზე, ჯიბეებზე და საღილეებზე.
გარდა ამისა, ხალათებს ძალიან იშვიათად რეცხავდნენ, როგორც წესი, როდესაც აშკარად შესამჩნევი ლაქები ჩნდებოდა. თეთრი ხალათი დიდი ხნის განმავლობაში იყო სისუფთავისა და სტერილურობის სიმბოლო, მაგრამ სინამდვილეში საავადმყოფოს შიგნით პათოგენების ერთ-ერთი მატარებელი აღმოჩნდა.
ხალათი შიშს იწვევს
ფსიქიატრები და პედიატრები ამას განსაკუთრებით აღნიშნავდნენ: მათი პაციენტები, რომლებიც უკვე მყიფე ემოციურ მდგომარეობაში იყვნენ, კიდევ უფრო ნერვიულობდნენ თეთრი ხალათის დანახვაზე.
თეთრხალათიან ადამიანს ხომ მხოლოდ საავადმყოფოში ვხედავთ და ამიტომ სტაბილური ნეგატიური ასოციაცია გვივითარდება!
გამოდის, რომ ხალათი ქმნის ემოციურ ბარიერს ექიმსა და პაციენტს შორის. ამიტომ, პრესტიჟულ მაიოს კლინიკაში ექიმებს ავალებენ ჩვეულებრივი საქმიანი ჩაცმულობის ტარებას - ისე, რომ ეს ბარიერი არ შეიქმნას.
ხალათი ხაზს უსვამს უთანასწორობას
ეს არ შეესაბამება ყველა ქვეყანას, მაგრამ აქ არის საინტერესო ფაქტი: აშშ-ში ხალათის სიგრძით შეიძლება გაიგოთ, ვისთან გაქვთ საქმე. სტუდენტებს შეუძლიათ მხოლოდ ძალიან მოკლე თეთრი ხალათის ტარება. სრული სიგრძის ტანსაცმლით სიარულის უფლება აქვთ ექიმებს, რომლებმაც გაიარეს სწავლების სრული კურსი, მათ შორის რამდენიმე წლის განმავლობაში "რეზიდენტი ექიმის" - ანუ დამწყები ექიმის სტატუსში, რომელიც ატარებს საშუალო სიგრძის ხალათს.
ამიტომ მოკლე ხალათში გამოწყობილი ადამიანის აზრს ისე სერიოზულად არ აღიქვამენ.
შედეგად, გაჩნდა ახალი რეკომენდაცია: ატარეთ მოკლე სახელოებიანი სამოსი: სადეზინფექციო საშუალებით ხელების დაბანა ბევრად უფრო ადვილია, ვიდრე ხალათის რეცხვა. ამავდროულად, უმჯობესია, ტანსაცმელი იყოს ისეთი ფერის, რომელიც ამშვიდებს პაციენტებს და ქმნის ნდობის ატმოსფეროს.
გასაკვირი არ არის, რომ ბოლო წლებში ხშირად ვხვდებით ექიმებს ლურჯი, ცისფერი ან ღია მწვანე ფორმებით, ან თუნდაც ვარდისფერი სამოსით.